Génesis 48

Cub cy'iwla'n Efraín ex Manasés tu'n Jacob

1Te tibajxi jlu, pon tkanil tuc'il José, otok yabt tman. Xi'tzun José tuc'il ex xi ti'n Manasés ex Efraín, akeju cabe tcy'ajal. 2Tej tbinte Jacob otok tzul José aju tcy'ajal lolte te, jaw tipuman tib, cub ke' twi twatbil, 3ex xi tma'n te José cyja': Aju Dios at tipumal tu'n tbant tcyakil tu'n cub tyec'un tib nwitze tuj tnam Luz tuj tx'otx' Canaán, ex cub cy'iwla'n kine tu'n. 4Tzaj tma'n weye cyja': Wu'ne cchmetel nim tbaja ex nim tiyjila. Ti'ja che elel nimcu c'loj xjal. Cxel nk'o'ne tx'otx' lu cye tiyjila che ul itz'j te tibajxi, ex c'oquel te cye te jumajx, chi Dios. 5Atzun ja'lo, weye Efraín ex Manasés, akeju cabe tcy'ajala e ul itz'j tzalu tuj Ejipt tej na'nxtok wule tuc'ila tuj tx'otx' lu. Weye ke jlu ic tza'n Rubén ex Simeón. 6Atzun ke tc'wa'la che ul itz'j cyibajxi ke jlu, atzun ke teya, ex nok tu'nju cyerman cyib tuc'il Efraín ex Manasés at cyoclen ti'j etzbil cyuc'il. 7Tej wajtze tuj Padan-aram cyaj cyim Raquel aju ttxu'ya tuj tx'otx' Canaán, tej ch'ixtok ncanune tuj Efrata, ex cu'x nmaku'ne tuj tbeyil Efrata, aju ax juntl tbi Belén, chi Jacob.

8Til Israel ke tcy'ajal José ex xi tkanin te cyja':

—¿Alcye ke jlu? Chi Israel.

9Xi ttzak'we'n José te tman:

—Atzun ke ncy'ajale o che tzaj tk'o'n Dios tzalu, chi José.

Xitzun tma'n tman te cyja':

—Che tlak'bantza ke nwitze tu'ntzun cycub ncy'iwla'ne, chi tman.

10Myaxix ba'ntok tbak' twitz Israel tu'nju otok tijin. Tu'ntzun jlu minti'xix in tiltok. E je'x tlak'ba'n José ke tcy'ajal twitz tman; atzun te e tzaj tchle'n, el ttz'uban cywitz, 11ex xi tma'n te José cyja':

—Minti'tok ximan wu'ne tu'n twile twitza; atzunte Dios o tzaj tk'o'n ambil weye tu'n twile cywitz ke tc'wa'la, chi Israel.

12E je'l ti'n José ke tcy'ajal cywi tch'ec tman, cub moc'e' ex pon tacl tibaj twitz max twitz tx'otx'. 13E tzajtzun ti'n ke cabe tcy'ajal, ate Efraín tuj tbank'ab, ex ate Manasés tuj tnayaj, ex e pon tlak'ba'n twitz tman. Cyja'tzun cyaj ten Efraín tuj tnayaj Israel ex Manasés tuj tbank'ab. 14Tejtzun cyxi tnukpi'n Israel ke tk'ab cyibaj, aj tk'o'n tbank'ab tibaj twi Efraín aju tz'inbaj; atzun tnayaj tibaj twi Manasés, masque atok tzicbaj. 15Cubtzun cy'iwla'n José tu'n Jacob, ex chi cyja':

Aju Dios o niman nchmane Abraham ex nmane Isaac te, aju Dios cwentin kine tu'n atxix tej wul itz'je ex cucx ja'lo,

16aju anjel in chin clete tu'n tuj nimcu mya ba'n, awt cy'iwlante cye cu'xun lu, ex cucxwit tzaj na'n nbiye cyi'j ke cu'xun lu, tuc'ix tbi Abraham aju nchmane, ex tbi Isaac aju nmane. Chmet-xwit nim cyiyjil twitz tx'otx', chi Jacob.

17Mya ba'n ela tuj twitz José tu'nju cub tk'o'n tman tbank'ab tibaj twi Efraín. Tu'ntzun jlu tzaj ttzyu'n José tk'ab tman, tu'n tel ti'n tibaj twi Efraín ex tu'n tcub tk'o'n tibaj twi Manasés, 18ex xi tma'n te tman cyja':

—Mi'n, tat. Mic'x ttenju. Ate Manasés tzicbaj. Atzun k'onca tbank'aba tibaj twi', chi José.

19Atzunte tman minti' o tcuya ex xi tma'n te cyja':

—Ba'n wu'ne, ncy'ajal. Ba'n wu'ne. Ax icx te cu'xun lu c'oquel te jun c'loj xjal nim toclen. Atzunte tz'inbaj mas toclen ctel twitz tzicbaj, ex che oquel ke tiyjil te nimcu c'loj xjal, chi tman José.

20Tujxtzun k'ij lu e baj tcy'iwla'n ke cabe cu'xun lu ex tma cyja':

—C'ajbel cybiye cyu'n aj Israel te jun cy'iwbil, ex oc cyma': Awt Dios cy'iwlante cyeye ic tza'n tbincha cyi'j aj Efraín ex aj Manasés, che chilo, chi Israel.

Cyja'tzun xi tk'o'n Israel mas toclen Efraín twitz Manasés. 21Xi tma'n Israel te José cyja':

—Weye chin cymele; atzunte Dios ctel cyuc'ile ex che ajele tu'n tuj cytx'otx' ke cyxe'chele. 22O txi nk'o'ne mas nim tx'otx' teya cywitz ke termaniya, aju el wi'ne cye aj Amorrey tej nk'ojine cyi'j tu'n nspadiye ex tuc'ix xobl npleche, chi Israel.

Currently Selected:

Génesis 48: MAMH

Highlight

Copy