Génesis 40

El tnic' José cyi'j cabe witzic'

1Te tibajxi jlu, aju k'ol tc'a rey ex aju binchal pan e cub tz'ak tuj jun cyil twitz cypatrón, aju rey te Ejipt. 2Tzaj tk'oj Faraón cyi'j cabe tmajen lu, ti'j nejenel cye k'ol tc'a ex ti'j nejenel cye binchal pan, 3ex e ocx tpresin max tja nejenel cye soldad cwentil te, tuj pres jatum tocxtok José. 4Atzunte nejenel cye soldad cwentil te Faraón e je'x tk'o'n ke cabe xjal lu tuj tcwent José, ex nim k'ij e ten tuj pres.

5At jun ak'bil cycabil pres lu, aju k'ol tc'a rey ex aju binchal pan, oc jun cywitzic' ex attok t-xilen teyle te junjun witzic'. 6Tejtzun tpon José que'yilte cye te prim, o til in che bisuntok. 7Xitzun tkanin José cye keju ajbel te Faraón, akeju ate'tok tuc'il tuj pres max tuj tja tpatrón:

—¿Tiku'n bis ta' cywitze ja'lo? Chi José.

8Xitzun cytzak'we'n te cyja':

—At jun kwitzic'e soc may', ex mi a'l jun chic'balte keye ti t-xilen, che chi.

Xitzun tma'n José cye cyja':

—¿Myapetzun a Dios in tzaj chic'bante cyxilen witzic'? Cytx'olbantze weye tza'n tten cywitzic'e soc, chi José.

9Atzunte nejenel cye k'ol tc'a rey xi ttx'olba'n twitzic' te José, ex xi tma'n te cyja':

—Tuj nwitzic'e xwile jun wi' tkan uva tcubtok nwitze, 10ex attok ox tk'ab. Jurat ẍe tzaj t-xul, ẍe japun t-xmacal, ex sul cyk'ij twitz. 11K'i'ntok wu'ne tuj nk'abe aju tc'abl Faraón. Ẍe tzajtzun wi'ne ke uva, xcu'x nyatz'o'ne cya'l tuj tc'abl Faraón ex xi nk'o'ne tuj tk'ab, chi nejenel cye k'ol tc'a rey.

12Xitzun tma'n José te cyja':

—Aju t-xilen twitzic'a, atzun jlu: Ke ox tk'ab uva, atzun in cyma'n cyi'j ox k'ij. 13Oc cybaj ox k'ij, c'elex k'i'na tu'n Faraón tuj pres, c'oquel k'o'na juntl maj ti'j tak'una ex cxel tk'o'na tc'a ic tza'n nej. 14Octzun texa tzalu, bix chin tzaj tna'na, bix tzaj k'ak'an tc'u'ja wi'je, bix yolina wi'je twitz Faraón ex bix chin ex ti'na tzalu, 15tu'nju nok o chin tzaj elk'a'ne tuj cytx'otx' aj Hebrey, ax icx nokx gan in octz k'o'ne tuj pres, porque minti' jun il o bant wu'ne tzalu, chi José.

16Tej tbinte nejenel cye binchal pan tbaniltok tbinx t-xilen witzic' otok txi tchic'ba'n José, xi tma'n te José cyja':

—Ax icx weye soc nwitzcy'a'ne, xwile tjaxtok ox chi'l tuj nwi'ye ex tcu'xtok sak pan cyuj. 17Aju chi'l tjaxtok tibajxi, nojnitok tu'n tcyakil wik pan in xi twa'n Faraón; atzun ke chyu'j in che wa'ntok ti'j pan tcu'x tuj chi'l tjaxtok tuj nwi'ye, chi nejenel cye binchal pan.

18Xitzun ttzak'we'n José te cyja':

—Aju t-xilen teya twitzic', atzun jlu: Ke ox chi'l, atzun in cyma'n cyi'j ox k'ij. 19Oc cybaj ox k'ij, c'elel k'i'n twi'ya tu'n Faraón, cjawil yobina ti'j jun tze' ex cxel chyo'n tchibjala cyu'n chyu'j.

20Tujtzun toxin k'ij japun tabk'iyil Faraón, ex cub tic'sa'n jun nink'ij junx cyuc'il ke aj sanjelal ate'tok ttxlaj. Cywitz cycyakil xjal otok che tzaj txco'n tuj ic'sabl k'ij, xi tma'n tu'n tetz k'i'n tuj pres aju nejenel cye k'ol tc'a, tuc'ix nejenel cye binchal pan. 21Xi tk'o'n Faraón juntl maj tak'un nejenel cye k'ol tc'a, ex oc ten k'ol tc'a Faraón ic tza'nx nej; 22atzunte nejenel cye binchal pan, jaw tyoban ic tza'nx otok txi tchic'ba'n José. 23Minti' tzaj na'n José tu'n nejenel cye k'ol c'abj, nok o'cx ic' tna'njtz tu'n.

Currently Selected:

Génesis 40: MAMH

Highlight

Copy