Eclesiastés 9
9
Aju ximbetz ti'j chwinklal ex camic.
1In cub tenxixe ximal ti'j ex ma tz'el nnic'e ti'j, cyak'unben ke xjal tz'aklxix ex ke xjal at cynabl atzun ta' tuj tk'ab Dios. Ate xjal misicyer ba'n tu'n ka cc'ujlanjtzel ex ka c'elel ic'un. 2Cyja'tzun, aju cbajel ti'j jun xjal, axju cbajel cyi'j cycyakil xjal; aju cbajel ti'j ju xjal tz'aklxix, axju cbajel ti'j ju xjal mya tz'aklxix; aju cbajel ti'j ju xjal ba'n tmod, axju cbajel ti'j ju xjal mya ba'n tmod; aju cbajel ti'j ju xjal ttx'jon tib, axju cbajel ti'j ju xjal mya ttx'jon tib; aju cbajel ti'j ju xjal in xi k'onte chojbil, axju cbajel ti'j ju minti' in xi tk'o'n chojbil; aju cbajel ti'j ju xjal ba'n, axju cbajel ti'j ju xjal aj il; aju cbajel ti'j ju xjal in xi ttziyan jun yol twitz Dios, axju cbajel ti'j ju xjal minti' in xi ttziyan jun yol twitz Dios.
3Atzunju mya ba'n lu in tzaj cyibaj cycyakil xjal tzalu twitz tx'otx': Aju cbajel ti'j jun, axtzunju cbajel cyi'j cycyakil. Ax icx t-ximbetz xjal nojni tu'n mya ba'n acux itz'x mya tuj tumel ta' t-ximbetz; te tibajxi jlu in cyimtzun.
4At mas oybil teju xjal acux itz'x; mas ba'n jun tx'yan itz', twitz jun balun cyimni. 5Porque ke xjal itz'x ke, ba'n cyu'n ka oc che cymel, atzun ke xjal cyimni ke, minti' ba'n cyu'n ex minti'tl twi' cyc'u'j in cyc'mo'n, ex mi a'l jun in tzaj na'nte cye. 6Atzun in cub naj cyc'ujlalil ex cyic'bil ex tlo'ch cyc'u'j, minti'tl cyoclen ti'j tcyakilju in bant tzalu twitz tx'otx'.
7Txi'ya ex wa'nxa twaya tuc'il tzalajbil, tzalajxa ti'j tc'a'ya ta'l twitz uva, porque aju tak'unbena ba'n ma tz'el tuj twitz Dios. 8Cucx k'on oca t-xbaluna puro sak que'yin ex cucx k'on jaxa perjum tuj twi'ya. 9Tzalajxa tuj tank'ibla tuc'il t-xu'jila c'ujla'nxix tu'na, porque tcyakil k'ij tank'ibla ma tzaj tk'o'n Dios twitz tx'otx' nokx gan, ex o'cx jlu in tcamba'na tu'nju nimxix in ak'nana twitz tx'otx'. 10Ex tcyakilju at tu'n tbant tu'na, tz'oc tililx tu'na tu'n tbant, porque oc tpona ma tuj cynajbil cyimni, mi jun ti'xti cbantel tu'na ex minti' jun tu'n t-ximana ti'j, porque ma chixin minti' nabl ex minti' ojtzkibl at.
Mya tuj tumel aju in baj cyi'j xjal
11At mastl ma wile tzalu twitz tx'otx': Mya tu'nju cyuw che kelan xjal jacu che camban ti'j ojkelbil, ex mya tu'nju cyuw cyc'u'j xjal tuj k'oj jacu che camban tuj k'oj; mya tu'nju at cynabl xjal jacu cnet cyu'n, ex mya tu'nju list ke xjal jacu che oc te k'inun; mya tu'nju xnak'tzamni ke xjal jacu cyc'am jun xtalbil; tcyakil jlu según t-swert xjal. 12Porque mi jun xjal ba'n tu'n jtoj ba'n tpon or tu'n tcyim; ic tza'n ke cyiẍ in che tzyet tu'n xyub, ex ic tza'n ke chyu'j in che tzyet tu'n c'obil; icxtzun tten xjal, masque minti' ximan tu'n, pero nok minaben in tzaj mya ba'n tibaj.
13At juntl ma wile tzalu twitz tx'otx' ex ma tz'oc te jun xnak'tzbil ma' t-xilen te weye: 14At jun tal tnam ch'in ex mya nim xjal najl tuj, oc tzokpaj jun rey nim tipumal ti'j ex baj cytxolban cyib ke t-soldad rey ti'jele ex jaw cybincha'n cyxwe'tzbil ti'jele tu'ntzun cyocx tuj. 15Ex tuj tnam lu najltok jun xinak meba pero at tnabl, ex tu'nju at tnabl o clet tnam tu'n, pero ya te tibajxi mi jun tzaj na'nte teju xinak lu.
Mas at tajben nabl twitz tcyakil ti'xti
16Entons o nmaye cyja': Masque minti' in xi niman tyol jun xjal at nabl ex mi a'l jun in xi tk'o'n twi' ti'j ju in tma'n, pero mas ba'n tu'n koc at knabl twitzju tu'n koc cyuw kc'u'j.
17Aju yol in xi k'met tuj cheba tu'n jun xjal at tnabl, mas in xi bi'n twitz tyol jun xjal in sch'in wen toc te nejenel cye ke xjal minti' cynabl.
18Mas ba'n ju nabl cywitz ke ubl in che ajben tuj k'oj. Nok tu'n jun xjal aj il jacu tzaj nimcu mya ba'n tu'n.
Currently Selected:
Eclesiastés 9: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993
