Eclesiastés 10

1Tu'n jun us cyimni in tzuwix tbanil perjum tu'n. Cyja'tzun, masque nok ch'in tchcyinil ju xjal at tnabl, pero tu'n jlu jacu tz'oc ic tza'n jun xjal minti' tnabl ex minti' nimbil te.

2Aju t-ximbetz ju xjal at tnabl o'cx toc ti'j ju ba'n, atzunju xjal minti' tnabl o'cx toc t-ximbetz ti'j ju mya ba'n.

3Aju xjal minti' tnabl, ti'j tcyakilju in tbincha'n in tyec'un tib ka minti' tnabl, ex in tma'n ka ake txkantl minti' cynabl.

4Ka ma tzaj tk'oj cawil ti'ja, mi'n cyaj tcolina toclena; porque ka ma cub tmansin tiba, c'ic'ex ti'j nimcu mya ba'n.

5At jun mya ba'n ma wile tzalu twitz tx'otx' ex a jlu in bant cyu'n ke cawil: 6Aju xjal minti' tnabl nno'c k'o'n toclen mas ma', ex atzun teju xjal ma' t-xilen nno'c k'o'n toclen mas ch'in. 7O wile ke majen in che bet cyjax ke cyibaj chej, ex atzun ke xjal ma' cyoclen in che bet tu'n cykan, mer ic tza'n majen ke.

8Aju xjal in cu'x lacunte jun jul, tujx jul lu cxel tz'ak. Aju xjal in cub tilin te tapya, c'oquel tx'a'n tu'n lobaj.

9Aju xjal in xpelin ti'j abj, jacu bant ttza'w tu'n abj. Aju xjal in tx'emin si', jacu bant tcub ttx'emin tib.

10Ka ma baj ttzi' si'wbil c'uxbil ex ka minti' ma cub jakut ttzi' juntl maj, taj nim kipun tu'n ttx'emit si' tu'n. Mas ba'n tu'n tbant tcyakil tuj tumel ex tuc'il nabl.

11Ka minti' ma cub mansin lobaj ex ka ma tz'oc tx'a'n jun xjal tu'n, minti' tajben jlu teju xjal ba'n cyoc lobaj mans tu'n.

12Ke tyol ju xjal at tnabl mejorxix tbinx, atzun ke tyol ju xjal minti' tnabl in che ajben te xitbil te te,

13nno'c ten k'malte ke yol minti' cynabl ex aju bajsbil te tyol, mas plojxix.

14Aju xjal minti' tnabl, minti' in baj tgan tu'n tyolin. Mi jun xjal ba'n tu'n aju cbajel yajxi, porque ¿alcye jun jacu tz'el tnic' ti'j ju tzul te tibajxi?

15Aju xjal minti' tnabl in baj tbyon tib ti'j ak'untl, ex minti'lpe ba'n tu'n aju be in pon tuj tnam.

16Bec'bil twitz nasyon aju toc jun c'wa'l te rey tuj, ex ke xjal ma' cyoclen ate' tuj, primxix nno'c nintz wa'n cyu'n.

17At tzalajbil teju nasyon aju toc jun xjal ba'n tnabl te rey tuj, ex ke mastl xjal in che cawin tuj in che wa'n ic tza'nx or te wabl, tu'n toc t-xel cyipun otok baj ex mya tu'n tchyo'n cywi'.

18Aju xjal cy'aj in tzaj tilj twi tja; ka minti'x ma tbincha ti'j, cbel tilj tcyakil tja.

19Aju pan, atzun tajben tu'n kwa'n ti'j; ex aju ta'l twitz uva, atzun tajben tu'n ktzalaj; ex aju pwak at tajben ti'j tcyakil.

20Mi'n yolina mya ba'n ti'j rey ex mi'n cub t-ximana jun mya ba'n ti'j. Mi'n yolina mya ba'n ti'j xjal k'inun masque junx teya at, porque ke chyu'j ba'n che lipan twitz cya'j jacu che'x k'malte cye.

Currently Selected:

Eclesiastés 10: MAMH

Highlight

Copy