Ri Amos 8
8
Ri chicäch chak' qui wäch tak che'
1Are wa' xuc'ut ri Dios ri Ajawaxel chnuwäch: C'o jun chicäch chak' tak qui wäch che',
2ri are' xuc'ot nu chi': “¿Jas ri cawilo Amos?”
“Jun chicäch”, xincha'.
Xubij c'ut ri Ajawaxel chwe: “Ri Israel chak'ajinak chic; man quensacha' ta chi u mac mawi ta chi ne jumul.
3Pa ri k'ij ri' ri bix tak ri queban chupam ri rachoch ri ajawinel quejalwächitaj na pa bik'bitem. E q'uia winak quecäm na, xa c'u pa matzatzil querokilax apan tak ri cäminakib jela'. Ri Ajawaxel u jiquibam u bixic.”
Canakajin ri u k'atic tzij puwi' ri Israel
4Chitatabej wa', ix ri qui ban c'ax chque ri e mach'amoj quebic'axc'obisaj c'ut ri mebayib ri e c'o pa ri ulew;
5ix ri je quibij wa': “¿Jampa' lo coc'ow ri nimak'ij re ri nabe ic', rech cuya' cakac'ayij ri trico? ¿Jampa' lo coc'ow ri k'ij re uxlanem, rech pakal quebekac'ayij wi ri e qui wächinic tak ri kulew quebekacoj c'u tak pajbal ri k'ipom qui pam xukuje' tak pajbal ri e c'o tak qui jech'?
6¡Quebekac'axc'obisaj tak c'ut ri meba' c'ä chquic'ayij ta na quib pa ka k'ab che pataninelab che qui tojic tak ri qui c'as, pune' c'u xa' juc'ulaj xajäb qui c'as! ¡Cakac'ayij c'u ne na ri u pam trico!”
7Ri Ajawaxel xuban ri chi'nic ri kas cäban na rumal ri u juluwem ri Jacob: “Mawi c'u jubik' cäsach na pa nu jolom ri qui banom.”
8¿La ma ta c'u lo cäbirbob ri ulew
rumal ronojel wa'?
¿La ma ta c'u lo quebok'
conojel ri winak ri e jekel chi'?
¡Ri ulew cäpaki' na,
cäkaj c'u na,
jacha' ri cäquiban
ri u ja'lil ri Nil
quepakic, quekaj c'ut!
9 # 8.9 Ri aj asiriyab e quitz'ibam chquipam tak ri e qui wuj chi pa ri u k'ijol ri Amos, pa ri junio rech ri junab wukub sient 0xc'al oxib (763) majok chalax ri Crist, xc'ulmatajic chi xoc ri ic' chuwäch ri k'ij, xk'ekumar c'u u wäch ri k'ij, ri xilitaj c'ut pa Siriy xukuje' pa conojel tak ri nimak tak tinimit ri e c'o nakaj che. Cujiquiba' u bixic ri Ajawaxel:
“Pa ri k'ij ri',
quinban na chi cuc'u' rib ri k'ij
pa tiq'uil k'ij
kas c'u pa k'ij quinch'uk na
ri k'ij ruc' k'ekumalil.
10Quebenq'uex na tak ri nimak'ij
pa cok'exic cäminakib,
ri e tak bix pa bit'oj tak ib
cuc' cäminakib;
quinban na chi quebicoj
tak atz'iak re bis,
quebitolorisaj c'ut ri i jolom
che u c'utic ri c'axc'ol.
Quejuyuw c'u na
jacha' ri cuban ri xutzak jun u c'ojol
ri xa' jun c'olic
ronojel c'ut cäq'uis na pa c'ayil.”
11Cujiquiba' u bixic ri Ajawaxel:
“Quepe na k'ij
aretak quintak ulok numic
cho ri uwächulew;
man numic taj che u tijic wa,
mawi chaki'j chi' che ruq'uiaxic ja',
xane' wi'jal
che u tatabexic ri u tzij ri Ajawaxel.
12Quewacatilob c'u na tak ri winak
quequitzucula' ri u tzij ri Ajawaxel,
quebe na chuchi' ri jun plo
xukuje' chuchi' ri jun plo chic,
c'ä pa ri riquiak'ab elebal k'ij
c'ä pa ri elebal k'ij,
man c'u quecuin ta na che u rikic.
13Je'licalaj tak alitomab
xukuje' alabom
ri sibalaj c'o qui chuk'ab
quechukchub rumal chaki'j chi'
pa ri k'ij ri'.
14Ri Cäquiban ri chi'nic
ri kas cäban na
pa qui bi' ri e diosib
ri e c'o pa Samar;
ri caquibij:
‘Rumal ri u c'aslemal ri a dios,
oh Dan’,
‘Rumal ri qui c'aslemal ri diosib
pa Beerseb’,
quetzak na
rech man quewalij ta chi na.”
Currently Selected:
Ri Amos 8: QUICH1
Highlight
Share
Copy
Want to have your highlights saved across all your devices? Sign up or sign in
Biblia Quiché © Sociedades Bíblicas Unidas, 1995.
