Zac 1
1
Pixabanik richin xtitzolej ta pe ruk'u'x ri tinamit Jerusalem
1Ri Jehová xch'on wik'in yin Zacarías, ruk'ajol kan ri Berequías, rumam ri Idó y q'alajirisey ruch'abel ri Dios. Y xuya' jun rutzijol chuwe richin ninbij chike ri nuwinaq. Y re' xbanatej chupan ri ruwaqxaq ik' chire ri ruka'n juna' chire ri q'atbel-tzij richin ri rey Darío. 2-3Ri ojer kan xyakatej janila woyowal chikij ri ite-itata'. Roma ri' wakami rix titzolej-pe ik'u'x wik'in y yin xkitzolej chik iwik'in. 4Roma ri' rix man tikowirisaj-iwi' achi'el xkikowirisaj-ki' rije' toq xban ch'owen kik'in koma ri e nabey q'alajirisey nuch'abel yin Jehová k'iytisanel richin ronojel. Ri q'alajirisanela' ri' xkibij chi titzolej-pe kik'u'x wik'in, y tikiya' kan ri itzel taq bey y ri itzel taq banobel. Jak'a rije' xa xkiben chi man xq'ax ta chikiwech y man xkak'axaj ta ri xinbij chike. 5Roma ri' rije' xa xeken yan. Chuqa' xeken ri q'alajirisey nuch'abel. 6Ri nuch'abel ri xinbij chike ri nusamajela' e q'alajirisey nuch'abel kan xbanatej kik'in ri ite-itata'. Jak'a toq rije' xtzolej-pe kik'u'x wik'in, xkibij chi yin kan xinben kik'in achi'el ri ruk'amon, roma rije' kan itzel ri kibanobal. Y roma ri' xinben kik'in achi'el ri xinch'ob, xcha' ri Dios.
Ri nabey achi'el achik'
7Toq q'axineq chik oxi' ik', ri Jehová xch'on chik wik'in chupan jun achi'el achik'. Y re' xbanatej chupan ri q'ij juwineq kaji' chire ri ik' Sebat. 8Y jare' ri xk'utumej chinuwech pa jun tokoq'a': Xintz'et k'a chi jun achin ch'okol chirij jun kiej keq rij. Y pa'el k'a pa jun taq'aj kojol juyu', chikikojol q'echa'. Y chirij-el rija' ek'o jun tzobaj kiej. Ek'o keq, ek'o k'aqo'j, y seq kij. 9Y chiri' chinuxikin, k'o k'a ri ángel richin ri Jehová ri nich'on wik'in. Y yin xink'utuj chire ri achike nel chi tzij ronojel re'. Y ri ángel xubij chi kan xtuq'alajirisaj chinuwech. 10Jari' toq ri achin ri' xubij chi rije' e taqon-pe roma ri Jehová richin nokinik'oj chijun re ruwach'ulew.
11Y toq ri achi'a' xek'achoj kan chire ri kisamaj, xkibij chire ri achin ri k'o kojol q'echa' chi rije' xkik'is yan rutz'etik chijun ruwach'ulew, y xkitz'et kan chi maneq oyowalen kik'in konojel winaqi', y k'o uxlanen kik'in. 12Jari' toq ri ángel xch'on-q'anej rik'in ri Dios y xubij chire: Rat Jehová ri at k'iytisanel richin ronojel, ¿k'a janipe' xtajoyowaj kiwech ri e aj-Jerusalem y ri ch'aqa' chik tinamit richin Judá, ri aya'on-pe ri rutojbalil-mak pa kiwi' oxk'al lajuj juna'?, xcha'. 13Ri Jehová kan rik'in k'a ch'uch'uj taq ch'abel xuk'uluba-pe ri ruch'abel. 14Y xeri' ri ángel xubij chuwe richin chi tinbenya' rutzijol chike ri nuwinaq. Y jare' k'a ri rutzijol: Yin Jehová ri k'o ronojel uchuq'a' wik'in, kan janila nik'o ruwi' yixinwajo' rix winaqi' aj-Jerusalem y chuqa' ri juyu' Sión. 15Yin woyowal juba' chiwe. Jak'a kan janila xyakatej woyowal chikij ri nima'q taq ajawaren ri kan nikina' chi kan jebel e jikil, roma kan xik'o chik ruwi' ri q'axo'n ri xkiben chiwe. 16Roma ri', rik'in k'a ri joyowanik xkitzolej chik iwik'in rix aj-Jerusalem. Y xtinben chi xtipabex chik q'anej ri wachoch y ri itinamit. Yin Jehová ri yibin, xcha'. 17Y chirij ri' ri ángel xubij chik chuqa' chi xtinbenya' rutzijol chi ri Jehová xtiberubana' chik jun bey chike ri nutinamit chi xkebe pa jotol, y chi ri Jerusalem xtok chik rutinamit, y xtuya' chik kuqubabel-k'u'x kik'in ri winaqi' ri ek'o chiri'.
Ri ruka'n achi'el achik'
18Chirij ri' k'o chik k'a xk'utumej chinuwech y xintz'et k'a chi ek'o kaji' uk'a'. 19Ri ángel k'o wik'in, y roma ri' xink'utuj k'a chire ri achike nel chi tzij re'. Y rija' xubij chuwe chi ri kaji' uk'a' ri' nel chi tzij ri kaji' ruwach'ulew ri xetalun kichin ri tinamit Jerusalem y ri ruwach'ulew Judá y ri Israel. 20Chirij ri' ri Jehová xeruk'ut chik chinuwech e kaji' achi'a' e samajiy taq ch'ich'. 21Y yin xink'utuj ri achike nokibana' ri achi'a' ri'. Y rija' xubij chuwe chi ri kaji' uk'a' jari' ri ruwach'ulew ri xetalun-el kichin ri winaqi' aj-Judá, richin chi man chik xtikiyek-q'anej-ki'. Jak'a re e kaji' achi'a' re' e peteneq richin nokiya' nimalej xibinri'il pa kiwi' ri kaji' ruwach'ulew ri', y nokik'isa' roma ja rije' ri xetalun kichin ri aj-Judá.
Currently Selected:
Zac 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
