Miq 2
2
Ri ruk'ayewal pa kiwi' ri winaqi' ri yejak'ek'
1Kan toq'ex k'a kiwech ri winaqi' ri nikich'ob achike etzelal nibekibana'.
Rije' ja ri chi'aq'a' nikich'ob itzel taq banobel,
y kan xaxe k'a niseqer-el kan jari' nibekibana' ri etzelal ri xkich'ob rij.
Rije' kan yetikir k'a nikiben roma kan k'o uchuq'a' pa kiq'a'.
2Nikirayila' k'a rulew ri jun chik y nikiben kan kichin chire.
Nikirayila' ruwech jay kichin ch'aqa' chik y nikimej kan.
Rik'in tz'ukun-tzij nikeleq'aj kan ri rachoch ri jun chik wineq.
Ronojel ri kichinan kan ri kiwinaq nikelesaj kan chike.
3Roma ri' ri Jehová ruch'obon chik chi,
xtiberuya' jun ruk'ayewal pa kiwi' re winaqi' re',
y kan man xketikir ta xtikikol-ki'.
Y stape' rije' yebiyin rik'in nimirisanen,
ri Dios xtuben k'a chike chi kan xtiqaqa kiq'ij,
roma toq xtapon ri q'ij ri' kan richin ruk'ayewal y tijoj-poqonal.
4Chupan ri q'ij ri' kan xtiban k'a jun bix richin tze'en chikij.
Y kere' k'a nubij:
Kan xojwulex k'a jumul,
y ronojel ri k'o qik'in xa xch'ar chikiwech ch'aqa' chik.
Wakami ri Dios xrelesaj ri qulew roj,
y xuya' kan pa ruq'a' ri etzelanel qichin.
5Keri' ronojel ri ulew ri kichinan kan, xtelesex chike richin jumul.
6Ri winaqi' richin ri tinamit nikibij chuwe yin Miqueas:
Man chaq yojach'olij.
Ri Dios man xqojruya' ta pa wululen.
7¿Nach'ob rat chi ri tinamit Israel qajineq etzelanik pa ruwi'?
¿Nach'ob chi ri Dios xik'o yan ruk'u'x qik'in?
¿Kan qitzij kami chi nuben ronojel re'?
¿Nach'ob chi ri Dios man utz ta yerutz'et ri yemakun?
8Rix kan ix yakatajineq k'a chikij ri nuwinaq achi'el jun etzelanel.
Kan nimej kan ri kitziaq ri achi'a' ri e tzolejineq-pe pa labal.
9Rix kan ye'iwelesaj-el ri ixoqi' chupan ri kachoch ri akuchi janila yekikot-wi;
y ri ruk'amon ta richin nikichinaj kan ri taq kal, rix niweleq'aj kan chike.
10Kixyakatej k'a y tichapa' bey roma rix man xtiwil ta chik uxlanibel-k'u'x chuwech re ruwach'ulew.
Iwoma rix re ruwach'ulew re' man ch'ajch'oj ta chik,
y roma ri' xtiwulex kan.
11Rix xa niwajo' jun q'alajirisanel ri ruk'uan itzel bey,
ri xaxe q'oloj ruk'amon-pe,
ri nubij ta chiwe chi xtik'oje' iwik'in pa ruk'iyal vino y ya' ri niq'abarisan.
Ri xtibin keri' chiwe, jari' k'a ri q'alajirisanel ri iwichin rix.
Ri Jehová kan xkerumol chik ri rutinamit
12Ri Jehová xubij:
Xkenmol chik konojel ri winaqi' israelita;
xkenmol k'a ri xek'oje' kan chire ri rijatzul kan ri Jacob.
Xkenya' akuchi man jun xtinaqo kichin,
achi'el nuben ri yuq'unel kik'in ri karne'l pa ki-coral.
Chupan ri ruwach'ulew ri' xkek'oje' pa ruk'iyal winaqi',
achi'el jun soq'olbel nojineq rik'in karne'l, xcha' ri Dios.
13Ri Miqueas xubij:
Ri Jehová xtiwulan ri ruchi' ri tinamit ri akuchi ek'o-wi pa ximonri'il ri rutinamit rija', richin xkerelesaj-pe.
Ja rija' ri ki-rey ri xtinabeyej-pe chikiwech;
y rije' xtikitzeqelibej-pe.
Currently Selected:
Miq 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
