Lev 26
26
Urtisanik pa kiwi' ri yeniman-tzij
1Ja yin Jehová ri i-Dios, roma ri' ninbij chiwe chi man ke'iben wachibel richin niya' kiq'ij y yixxuke' chikiwech, wachibel ri e paban, ri paban taq abej y ri abej ri ek'o wachibel chuwech. 2Kan tichajij k'a ri q'ij richin uxlanen y kan tiya' rejqalen ri wachoch akuchi niya-wi nuq'ij. Yin Jehová ri yibin.
3Wi rix kan xtitzeqelibej ri pixa' ri nuya'on chiwe, y kan xtiyek pa taq iwánima y xtiben ri nubij, 4yin xtinteq k'a pe job pa ruq'ijul, y ri itiko'n y ri che' kan janila xkewachin. 5Kan janila k'a xtiwachin ri jalajoj ruwech ixin, y k'a yixtajin na k'a chuch'ayik ja ri' toq xtapon chik ri q'ij richin xtiwachin ri uva. Y yixtajin na k'a chuwuxik ri uva ri' toq napon chik ri q'ij richin yixtikon chik qa jun bey. Roma ri' xkixwa' jebel y kan xtich'uch'u' ri iwánima, y rik'in k'a ch'uch'ujil xkixk'oje' chiri' pa iruwach'ulew. 6Kan xtik'oje' uxlanibel-k'u'x iwik'in chupan ri ruwach'ulew ri' y toq yixwer kan man jun k'a xkixbin. Xtinben k'a chi xkek'is ri k'uxunela' taq chikopi' y kan man jun k'a labal xtibanatej chi'ikojol. 7Xtinben k'a chike ri e etzelanel iwichin chi xke'animej chiwech y rix kan xke'ikamisaj k'a. 8Ri e wok'al etzelanel iwichin xke'animej chikiwech e wo'o' iwinaq. Y ri e 10,000 xke'animej chikiwech e wok'al iwinaq. Konojel ri etzelanel iwichin xkeken k'a chiwech. 9Yin kan xkixinwajo' k'a y kan xkixink'iyerisaj, y ri nujikiban richin xtinbenya' chiwe kan xtinbenya' k'a. 10Kan k'a xtitej na ri iyakon kan roma kan pa ruk'iyal ri xk'oje' iwik'in; y toq xtik'en-pe ri k'ak'a' itiko'n, k'o chi xtiwelesaj-el ri k'a k'o na iwik'in richin niyek kan ri k'ak'a'.
11Yin kan xkik'oje' k'a chi'ikojol y kan man xkixinwixowaj ta. 12Y jantape' k'a xkik'oje' chi'ikojol y kan ja yin ri i-Dios y rix kan ix nutinamit. 13Ja yin Jehová ri i-Dios ri xinelesan-pe iwichin pan Egipto richin chi man xixxime' ta chik pa samaj. Xinben chiwe richin xel ri ejqa'n chiwij y xixsolkopitej chuxe' ri ejqa'n ri'.
Ri ruk'ayewal ri nuk'en-pe roma man ninimex ta tzij
14Wi rix o ri iwijatzul man ninimaj ta nutzij y man niben ta achi'el ri nubin chiwe, 15y wi rix xtiwixowaj ri pixa' ri nuya'on chiwe, y man xtitaqej ta ri nuch'abel, y wi xtiq'ej ruwi' ri jikibel-tzij ri qabanon, 16yin kan xtinteq k'a pe jun nimalej ruk'ayewal ri nuk'en-pe xibinri'il. Chuqa' xtinteq k'a pe jun nimalej yabil chiwij richin xtuk'is ri iwuchuq'a' y xtinteq k'a pe nimalej k'aten chiwij y xtipe k'a por pa runaq' taq iwech roma ri nimalej k'aten ri'. Y kan xkixmayamo' k'a qa. Ri itiko'n ri xtiben-qa kan man xtitej ta chik roma xa ja ri etzelanel iwichin xketijo. 17Yin xkiyakatej k'a chiwij y kan xkixch'akatej k'a pa kiq'a' ri etzelanel iwichin y ja rije' ri xkek'oje' pan iwi'; y rix xkixanimej k'a, stape' man jun oqotayon iwichin.
18Wi chire ronojel re', man ninimaj ta nutzij kan xtinya' k'a wuqu' mul ri rutojbalil pan iwi' roma ri imak. 19Kan xtinqasaj k'a iq'ij, ri kaj man chik xtuya' ta pe job, y roma ri' kan xtikowir ri iwulew. 20Kan man jun k'a xtuq'ajuj ri isamaj ri xtiben roma ri itiko'n kan man xtik'ase' ta chik y ni ta ri che' man xtikiya' ta chik kiwech.
21Y wi rix chaq nipaba-iwi' chinuwech y wi chaq man ninimaj ta nutzij, xtinya' chik wuqu' mul rutojbalil pan iwi'. 22Kan xtinben chi xkepe k'uxunela' taq chikopi', kan xkekitej ri iwalk'ual, chuqa' xkekitej ri iwawej y kan xkixk'is, y kan xtitole' kan ri bey.
23Y wi rik'in ronojel re' man xtiq'il ta iwi' xa kan chaq niben ri itzel chinuwech yin, 24kan xkiyakatej chiwij y kan xtinya' chik wuqu' mul rutojbalil pan iwi' roma ri imak ri ye'iben. 25Y kan xtinya' k'a labal pan iwi', richin nitoj roma xiq'ej ruwi' ri jikibel-tzij ri qabanon. Y wi rix kan xtiwajo' xtito-iwi' pa jun tinamit ri sutin rij chi tz'aq, yin kan xkenteq-pe nimalej taq yabil chiwij ri nikitaluj-ki' y kan xkixtzaq pa kiq'a' ri etzelanel iwichin.
26Chupan ri q'ij ri' jari' toq man xtinya' ta chik pe iway, jari' toq juba' ok xtik'oje' y roma ri' lajuj ixoqi' xkek'oje' chuchi' jun q'aq' richin nikiben iway. Y toq nikijech, jutaqba' ok nikiya' chiwe y kan man xtinoj ta ipan rik'in.
27Wi rik'in ri' man xkininimaj ta, y kan nipaba-iwi' chinuwech, 28yin chuqa' xtinpaba-wi' chiwech y rik'in k'a woyowal xtinya' chik wuqu' mul rutojbalil pan iwi' roma ri mak ri ye'iben. 29K'ari' k'a xke'itej-qa ri imi'al-ik'ajol roma wayjal. 30Kan xkenwulaj k'a ri akuchi niya-wi kiq'ij ri i-dios pa ruwi' taq juyu', xkenwulaj chuqa' ri porobel ri akuchi niporox-wi pom y kan xkixinkamisaj. Y xtinmontonij k'a ri ich'akul junan kik'in ri i-dios ri chuqa' maneq kik'aslen, y kan xkixinwixowaj. 31Kan xtitole' k'a kan ri itinamit, y kan man jun chik xke'apon ri akuchi niya-wi kiq'ij ri i-dios, y kan man utz ta chik xtinseq ri jubulej pom.
32Xtitole' k'a kan ri iruwach'ulew, y ri e etzelanel iwichin xkepe richin yek'oje' chupan ri iruwach'ulew y kan xtikimey k'a ri rubanik. 33Y yin kan xkixintaluj k'a el ri chikikojol ri winaqi' pa taq kiruwach'ulew, y yin kan xtinya' k'a pe labal pan iwi' richin chi xkixkamisex. Kan xtitole' k'a kan ri iruwach'ulew, y ri itinamit kan xkek'is k'a.
34Kan jari' xtuxlan ri iruwach'ulew y xtitole' kan ruwech, y rokik rix ixk'o pa taq kiruwach'ulew ri etzelanel iwichin. 35Keri' xtuxlan ri iruwach'ulew rokik man ixk'o ta rix chuwech, roma man xiya' ta q'ij chire richin xuxlan, y keri' xtuxlan k'iy juna' ri man xuxlan ta iwoma rix y koma ri iwijatzul toq xixk'oje' chuwech.
36Y ri kik'in ri iwijatzul ri man xkeken ta, ri xkebek'oje' pa kiruwach'ulew ri etzelanel kichin, yin xtinben chike richin xkemayamo-qa. Xtinben k'a chike chi xtikixibij-ki' xaxe roma nitzaq-pe jun ruxaq che' y xke'animej k'a achi'el xa ta k'o e oqotayon rik'in espada y kan xketzaq, stape' man jun e oqotayon. 37Xtikipojila' k'a ki' chikiwech achi'el xa ta e animajineq-pe pa labal y kan man xketikir ta xtikipaba' ki' chikiwech ri e etzelanel kichin. 38Xkek'is k'a chikikojol ri winaqi' ri e richin ch'aqa' chik ruwach'ulew. Kan xkek'is k'a chupan ri kiruwach'ulew ri e etzelanel kichin. 39Y ri man xkeken ta, ri xkek'oje' kan chikikojol ri etzelanel kichin, kan xkek'is k'a roma ri itzel kibanobal, achi'el xeken ri ite-itata' roma ri kimak.
40Stape' ri iwijatzul, xtikiya' chikij ri itzel taq kibanobal rije' y chuqa' ri kichin ri kite-kitata', roma konojel rije' man xkinimaj ta nutzij; y xa xkipaba-ki' chinuwech. 41Roma ri' yin xtinpaba-wi' chikiwech rije', y xkenteq chuqa' el pa kiruwach'ulew ri etzelanel kichin. Y chiri' xtiqasex k'a kiq'ij y xtikejqalej ri kimak. 42Chirij ri' k'ari' xtoqaqa chinuk'u'x ri nujikibel-tzij ri nubanon rik'in ri Jacob, ri Isaac, y rik'in ri Abraham, chuqa' xtoqaqa chinuk'u'x ri ruwach'ulew. 43Rokik k'a ri iwijatzul ek'o chupan ri kiruwach'ulew ri etzelanel kichin, k'o chi xtitole' k'a kan ri iruwach'ulew rix richin xtuxlan. Jari' k'a toq rije' xtoqaqa chikik'u'x chi ek'o pa ruk'ayewal roma ri kimak, y chuqa' roma man xkiya' ta rejqalen ri nupixa' y man xkinimaj ta ri xinbij chike. 44Man rik'in ri' stape' ek'o pa kiruwach'ulew ri etzelanel kichin, man kan ta jumul xkenmalij kan richin man xkek'is ta jumul ri iwijatzul, richin keri' man xtik'is ta ri jikibel-tzij ri qabanon iwik'in rix israelita, roma ja yin Jehová ri i-Dios. 45Kan xtoqaqa k'a chinuk'u'x ri jikibel-tzij ri qabanon iwik'in toq xixinwelesaj-pe chikikojol ri aj-Egipto, y xinok i-Dios chikiwech konojel nima'q taq tinamit. Yin Jehová ri yibin, xcha'. 46Ja k'a ronojel ruwech pixa' re' ri xuya' ri Jehová chire ri Moisés richin xuya' chike ri ruwinaq israelita ri chiri' pa ruwi' ri juyu' Sinaí.
Currently Selected:
Lev 26: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.