Gén 8
8
Toq xk'is-el ri ya' ri xmuqun ri ruwach'ulew
1Jak'a ri Dios kan xuya-wi ri rutzil pa ruwi' ri Noé y ronojel kiwech chikopi' ri ek'o chupan ri nima-barco ri'; y roma ri' ri Dios xuben k'a chi xq'ax jun kaq'iq' pa ruwi' ri ruwach'ulew y ri ya' xuchop-qa ruqajinen. 2Y ri ralaxbel taq ya' ri xebebos-pe chuwech ri ruwach'ulew xetz'apetej yan k'a chiri', y chuqa' ri ya' ri niq'ejej-pe chikaj xtane' yan, y ri job maneq chik. 3Y ri ya' beneq-qa ruqajinen. Y toq xapon ri wo'o' ik' tumuq ya' ri ruwach'ulew, 4chupan ri q'ij wuqlajuj richin ri ik' wuqu' richin ri juna', jari' toq ri nima-barco ri' xbech'oke' pa ruwi' jun rutza'n ri nimalej raqen juyu' Ararat. 5Ri ya' beneq k'a qa ruqajinen y k'a chupan ri nabey q'ij chire ri ik' lajuj, richin ri juna' ri' k'ari' xebeq'alajin-pe juba' kitza'n ri nima'q taq juyu'.
6Y toq q'axineq chik kawineq q'ij, jari' toq ri Noé xujeq ri ventana richin ri nima-barco ri'. 7Xrisq'opej k'a el jun qo'ch y re qo'ch re' nibe-nipe nibe-nipe rokik royoben chi nichaqer ri ruwach'ulew. 8K'ari' xuteq-el jun paloma, richin niberutz'eta' kan wi xk'is yan qa ri ya' chuwech ri ruwach'ulew. 9Y ri ti paloma ri' kan man xril ta akuchi xpa'e-wi y k'ari' xtzolin-pe chupan ri nima-barco ri', roma ri ya' k'a k'o na pa ruwi' ri ruwach'ulew. K'ari' ri Noé xukusaj chik apo ri ti paloma rik'in.
10Y toq xapon k'a ri ruwuq q'ij, ri Noé xuteq chik jun bey ri ti paloma. 11Y ri ti paloma ri' xtzolin k'a tiqaq'ij y rutzuken-el jun ruxaq olivo; y rik'in ri' ri Noé xretamaj chi maneq chik ya'. 12Y rija' kan k'a xroyobej na jun chik wuqu' q'ij, k'ari' xuteq chik el ri ti paloma y ri' kan man xtzolin ta chik pe rik'in.
13Y ri Noé 601 chik k'a rujuna', chupan ri nabey q'ij chire ri nabey ik', jari' toq ri ya' xk'is-qa chuwech ri ruwach'ulew. Y ri Noé xrelesaj-el ri ruwi' ri nima-barco y xutz'et chi ri ruwach'ulew peteneq ruchaqirinen. 14Chupan ri q'ij juwineq wuqu' chire ri ruka'n ik', jari' toq jebel chaqi'j chik ri ruwach'ulew. 15K'ari' xch'on ri Dios rik'in ri Noé y xubij chire: 16Noé, katel-pe chupan ri nima-barco, chuqa' ri awixjayil, ri e ak'ajol, y ri kixjayilal rije'. 17Chuqa' ke'awelesaj k'a pe konojel ri chikopi' ri ek'o awik'in, ri aj-xik' taq chikopi', ri nima'q taq chikopi' y ri e jepejeq, richin yebe chuwech re ruwach'ulew; y ke'alan k'a y kek'iyer k'a chuwech re ruwach'ulew, xcha' ri Dios chire ri Noé.
Toq ri Noé xe'el-pe chupan ri nima-barco
18K'ari' xel-pe ri Noé y ri rixjayil, y chi e oxi' ruk'ajol y ri kixjayilal rije'. 19Y chikij rije' xe'el-pe pa taq tzobaj konojel ri jalajoj kiwech taq chikopi', ri e jepejeq, ri aj-xik' taq chikopi'. Konojel k'a xe'el-pe chupan ri nima-barco. 20Y ri Noé xuben k'a q'anej jun porobel richin xusuj kamelabel chire ri Jehová y xeberuk'ama-pe chikikojol ri aj-xik' taq chikopi' y ri ch'aqa' chik ri e utz richin kamelabel y xeruporoj chuwech rija'. 21Y ri Jehová kan xqa' chuwech y kan nijubulin ri ruxla' ri kamelabel, y xubij pa ránima: Man jun bey chik xtinya' ruk'ayewal pa ruwi' re ruwach'ulew roma ri rumak ri wineq; stape' ri wineq xaxe nuch'ob nimakun ri k'a pa ralaxik-pe; kan man k'a xkenkamisaj ta chik konojel ri k'o kik'aslen, achi'el re xinben wakami.
22Rokik nik'oje' re ruwach'ulew xtik'oje' tiko'n y kan xtiwachin.
Y man jun bey k'a xtik'is ri tew, ni ri k'aten,
ri job y ri saq'ij, ni ta ri paq'ij y ni ta ri aq'a', xcha' ri Dios.
Currently Selected:
Gén 8: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
