Gén 7
7
Toq ri ya' xumuq ri ruwach'ulew
1K'ari' ri Jehová xubij chire ri Noé: Rat, ri awixjayil, ri e ak'ajol, ri e awali' kixok chupan ri nima-barco; roma xa kan xaxe rat ri choj ri abanobal chinuwech yin chikikojol re sol winaqi' re ek'o wakami. 2Xke'akusaj k'a kan wuqu' k'ulaj chikopi' ri e utz richin kamelabel, jak'a ri ch'aqa' chik ri man e utz ta richin kamelabel, xaxe jujun k'ulaj chi achij chi ixoq xke'akusaj kan. 3Chuqa' ri aj-xik' taq chikopi' e wuqu' k'ulaj chi achij chi ixoq xke'akusaj kan richin man yek'is ta ri kijatzul chuwech re ruwach'ulew. 4Roma ri wuqubix-apo, yin xtinbenya-pe ya' kawineq q'ij y kawineq aq'a' y re' kan xtumuq ri ruwach'ulew, y xkenk'is k'a konojel ri k'o kik'aslen y xkenmes k'a el konojel ri e nubanon, ri ek'o chuwech re ruwach'ulew, xcha'. 5Y ri Noé kan xuben k'a ronojel ri xbix chire roma ri Jehová.
6Y chupan ri q'ij ri' ri Noé k'o chik k'a 600 rujuna', jari' toq xpe ri ya' ri xtumuq ri ruwach'ulew. 7Ri Noé, ri rixjayil, ri e ruk'ajol y ri kixjayilal rije' xe'ok k'a chupan ri nima-barco richin yekolotej chuwech ri ya' ri xtumuq ri ruwach'ulew. 8Chuqa' xe'ok ri aj-xik' taq chikopi' y ronojel kiwech chikopi' ri ek'o chuwech re ruwach'ulew; ri e utz richin ri kamelabel y chuqa' ri man e utz ta richin kamelabel; 9ri chikopi' chi achij chi ixoq xe'ok-apo chupan ri barco ri' rik'in ri Noé, achi'el xubij kan ri Dios chire rija'.
10Y toq xapon k'a ri wuqu' q'ij, jari' toq xpe ri ya' ri xtimuqun ri ruwach'ulew. 11Y toq ri Noé 600 rujuna', pa ruka'n ik' chire ri juna' ri', ri q'ij wuqlajuj, ja k'a q'ij ri' toq ri ralaxbel-ya' xebebos-pe chuwech re ruwach'ulew, y ri chila' chikaj kan niq'ejej-pe ri ya'. 12Y ri job xuben k'a kawineq q'ij y kawineq aq'a'. 13Y ri q'ij toq k'o chi nipe ri ya' ri xtimuqun ri ruwach'ulew, jari' toq ri Noé y ri rixjayil, y ri Sem, ri Cam, ri Jafet, y ri kixjayilal rije' xe'ok chupan ri achi'el nima-barco. 14Chuqa' konojel ri jalajoj kiwech chikopi' ri e richin k'echelaj, ri e richin chuwa-jay, ri e jepejeq y konojel ri jalajoj kiwech aj-xik' taq chikopi'. 15Konojel re' xe'ok rik'in ri Noé chupan ri achi'el nima-barco ri', y pa k'ulaj k'a xe'ok konojel ri chikopi' ri nikijiq'aj kaq'iq'. 16Chi achij chi ixoq k'a xe'ok-apo, achi'el rubin kan ri Dios chire ri Noé, y kan ja ri Jehová xtz'apen kan ri ruchi' ri nima-barco ri'.
17Y ri ya' ri xq'ejej-pe chikaj y ri ya' ri xebebos-pe chuwech ri ruwach'ulew, kan keri' xuben kawineq q'ij chuwech ri ruwach'ulew; y ri ya' xnimer y xutelej-el ri nima-barco ri' chuwech ri ruwach'ulew. 18Ri ya' kan janila k'a xnimer pa ruwi' re ruwach'ulew y xutelej ri nima-barco y keri' beneq k'a pa ruwi' ri ya'. 19Kan xnimer janila, roma ri' ronojel ri nima'q taq juyu' ri ek'o chuxe' ri kaj xerumuq kan. 20Chike ri juyu' ri' xjote' chik kaji' jaj rik'in jun q'a'aj pa jotol. 21Y xeken k'a konojel ri k'o kik'aslen chuwech ri ruwach'ulew; ri aj-xik' taq chikopi', ri ye'awajix, ri chikopi' richin pa k'echelaj, y konojel ri chikopi' ri e jepejeq, y konojel ri winaqi'. 22Y keri', konojel ri nikijiq'aj kaq'iq' chuwech re ruwach'ulew xeken. 23Keri' k'a xbanatej toq xek'is konojel chuwech re ruwach'ulew, nitiker-el rik'in ri wineq y napon k'a rik'in ronojel kiwech taq chikopi', ri nikiqirirej-ki' y ri aj-xik' taq chikopi'; konojel re' xerumes k'a el. Xaxe chik ri Noé y ri ek'o rik'in chupan ri nima-barco ri xek'ase' kan. 24Ri ya' wo'o' ik' k'a xumuq ri ruwach'ulew, toq najlex-pe rik'in ri nabey q'ij toq xbeqaqa-pe ri ya' chikaj y xebebos-pe ri ya' chuwach'ulew.
Currently Selected:
Gén 7: KQC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.