Gén 40

Ri José xubij ri achike yek'ulun-wi chi tzij ri ka'i' achik'

1Y toq q'axineq chik k'a k'iy q'ij, e ka'i' chike ri achi'a' ri e rusamajela' ri rey k'o k'a xkimakuj; ri jun ja ri aj-raqen pa kiwi' ri yeya'on-apo vino chire, y ri jun chik ja ri aj-raqen pa kiwi' ri e banoy kaxlan-wey. 2Y roma ri' ri rey xyakatej royowal chikij ri e ka'i' samajela' ri', 3y xeberuya' kan pa cárcel ri k'o chiri' pa rachoch ri aj-raqen kichin ri chajinela' richin ri rey, ri akuchi tz'apel-wi ri José. 4Y ri Potifar xeruya' k'a pa ruq'a' ri José richin chi yerilij; y ri ka'i' achi'a' ri' kan k'iy k'a q'ij xek'oje' ri chiri'.

5Y chi e ka'i' rusamajela' ri rey, ri ek'o pa cárcel, chikijujunal xkiben k'a jun achik'. Y chikijujunal ri achik' ri' kan k'o k'a nuk'exewachuj. 6Y nimaq'a' ruka'n q'ij, toq ri José xapon kik'in, xerutz'et k'a chi rije' yebison yetzu'un. 7Y rija' xuk'utuj k'a chike y xubij: ¿Achike roma janila yixbison yixintz'et yin?, xcha'.

8Y rije' xkibij chire: Chiqajujunal roj k'o jun qachik' ri xqaben y man jun ri k'o wawe' chiqakojol ri nitikir ta nibin chiqe achike yek'ulun-wi, xecha' chire ri José.

K'ari' ri José xubij chike: Xaxe ri Dios ri nitikir niq'alajirisan ri achik', titzijoj k'a chuwe ri xiwachik'aj, xcha' chike.

9K'ari' ri aj-raqen kichin ri yeya'on vino chire ri rey, xutzijoj k'a ri rachik' chire ri José y xubij: Yin xinwachik'aj chi k'o jun ruche'el-uva ri chinuwech, 10y ri ruche'el-uva ri' k'o oxi' ruq'a', y re' xebe'el-pe taq ral, y kan chi'anin k'a xeruya' janila rusi'j, y ri rusi'j xekiya' uva y kan jari' xechaq'aj chi'anin, 11y ri ruqumbal ri rey, k'o cha pa nuq'a', y ninbenk'ama' cha pe ri uva y ninyitz' chupan ri qumbel, y k'ari' cha ninya-apo chire ri rey, xcha'.

12Y ri José xubij k'a chire: Ri awachik' kere' nik'ulun chi tzij: Ri oxi' ruq'a' nel chi tzij oxi' q'ij. 13Pan oxi' q'ij apo ri rey xkaroyoj chik y xkatapon chik jun bey chupan ri ak'ojlen y xtaya' chik apo ri vino chire ri rey, achi'el ri abanon-pe toq xasamej pa nabey. 14Kinoqaqa k'a chi'ak'u'x toq xtiq'ajer ri xinbij chawe. Tabana' utzil kach'on rik'in ri rey, richin chi k'o ta jun q'ij yinel-el wawe'. ¡Tajoyowaj k'a nuwech richin xkinel ta el wawe' chupan re jay re'! 15Yin xa in jun hebreo, y xa in eleq'an-pe chupan ri nutinamit, y man jun achike roma ink'o wawe', roma xa man jun numak nubanon, xcha'.

16Y toq ri achin aj-raqen kichin ri yebanon kaxlan-wey xrak'axaj k'a ri xuq'alajirisaj ri José chirij ri jun achik' y kan jebel ri nuk'exewachuj, jari' toq xutzijoj chuqa' apo ri rachik' rija', y xubij: Yin xinwachik'aj chi e nutelen oxi' chakech seq taq kaxlan-wey. 17Chupan ri jun chakech ri k'o-q'anej nabey ek'o k'a jalajoj ruwech kaxlan-wey ri richin ri rey, jak'a ri aj-xik' taq chikopi' xepe richin xokitija-el.

18Y ri José xubij k'a chire: Ri awachik' kere' ri nik'ulun-wi chi tzij: Ri oxi' chakech nel chi tzij chi oxi' q'ij. 19Pan oxi' q'ij apo ri rey xkaroyoj y xtrelesaj ajolon y k'ari' xkarutzeqeba' chutza'n jun che', y xkepe k'a ri aj-xik' taq chikopi' xtokitija-el ri ach'akul, xcha' chire.

20Y pa rox q'ij, ri rey xtz'aqet chik k'a jun rujuna' y rija' xuben jun nimalej wa'in kichin konojel ri rusamajela' ri nima'q kiq'ij. Chikiwech k'a konojel ri e royon toq xuteq kik'amik ri e ka'i' aj-raqen ri', ri e tz'apel pa cárcel. 21Y ri aj-raqen chike ri e ya'ol vino chire, xya'ox chik jun bey ri rusamaj, y rija' kan xuya' chik ri vino chire ri rey achi'el ri rubanon-pe. 22Jak'a rik'in ri aj-raqen kichin ri yebanon kaxlan-wey, kan xbanatej achi'el ri xuq'alajirisaj ri José chire; kan xtzeqebex richin xjitz' chuqul. 23Jak'a ri aj-raqen chike ri e ya'ol vino chire ri rey, man xunataj ta chik ri José, xa xumestaj chi k'o kan ri chiri' pa cárcel.

Currently Selected:

Gén 40: KQC

Highlight

Copy