Gén 39

Ri José y ri rixjayil ri Potifar

1Kere' k'a xk'uluwachitej: Toq ri José xuk'uex-el k'a pan Egipto, ri ismaelita xkik'ayij kan chiri'. Y ri xloq'on richin ri José, jun achin aj-Egipto rubini'an Potifar; y re' jun aj samaj richin ri rey y chuqa' aj-raqen kichin ri achi'a' e chajinela' richin ri rey. 2Jak'a ri Jehová kan xuto-wi ri José y ronojel k'a ri nuben, kan utz k'a nel chuwech. Y rija' nisamej k'a pa rachoch ri rajaw ri k'o chiri' pan Egipto. 3Y ri rajaw kan xunabej chi ri Jehová kan k'o-wi rik'in ri José, roma ronojel ri nuben rija', ri Dios kan nuben chire chi kan utz nel chuwech. 4Re' xuben chi utz xtz'et roma ri Potifar. Y ri José xok iliy richin rija' y xuben chire chi ja rija' xok aj-raqen pa rachoch y pa ruq'a' rija' xuya-wi ri janipe' k'o rik'in. 5Y kan xaxe k'a toq ri Potifar xuya' kan ronojel pa ruq'a' ri José, ri Jehová xuya' urtisanik pa ruwi' ri ek'o pa rachoch y pa ruwi' ri rutiko'n. 6Y roma kan pa ruq'a' k'a ri José k'o-wi ronojel, ri Potifar kan man jun chik ri nuch'ob, xaxe chik ok ri ruway ri nutej ri noqaqa chuk'u'x.

Y ri José kan jebejoj ok nitzu'un y kan jebel ok rubanik. 7Y jari' k'a toq kere' ri xk'uluwachitej: Ri rixjayil ri Potifar kan xurayij k'a ruwech ri José y roma ri' k'o k'a jun q'ij toq xubij chire: Yin ninrayij chi yak'oje' wik'in, xcha'.

8Jak'a rija' xubij chire: ¡Ni! Ri awachijil in ruya'on kan richin ninchajij ronojel ri k'o pa rachoch y rokik chi yin ink'o wawe', rija' man jun achike ta nuch'ob rij. 9Chupan re awachoch man jun ri k'o ta más ruq'ij achi'el yin. Y roma ri' ri wajaw ruya'on q'ij richin ninben ronojel. Yin yitikir ninben ri ninwajo' rik'in ri k'o pa nuq'a', jak'a awik'in rat kan man jun xtinben, roma rat at rixjayil ri wajaw; yin man yitikir ta ninben ri nabij rat, roma man ruk'amon ta y yimakun chuwech ri Dios, xcha' ri José chire ri ixoq.

10Stape' ri ixoq ri' ronojel k'a q'ij nubochila' ri José richin chi nik'oje' rik'in, y nutej ruq'ij chi nijel-apo chunaqaj, jak'a ri José kan man jun bey ri xrajo' ta. 11Y k'o k'a jun q'ij toq ri José k'o chi xok-apo pa jay richin niberubana' rusamaj, y e maneq chik ch'aqa' ri pa jay; 12jari' toq xpe ri ixoq ri', xuchop ri José chi rutziaq y xubij chire: Katanpe pa ch'at wik'in, xcha' chire.

Y ri José junanin xukol-el-ri' pa ruq'a', y xel-el pa jay. Jak'a ri rutziaq ri ruq'un xa xk'oje' kan pa ruq'a' ri ixoq. 13Y toq ri ixoq xutz'et chi ri tzieq richin ri José xk'oje' kan pa ruq'a', toq xanimej-el chuwech, 14xsik'in richin chi xeroyoj ri aj pa rachoch y k'ari' xubij chike: Titz'eta', ri hebreo ri xuk'en-pe ri wachijil re pa qachoch, xaxe richin chi nitze'en chiqij. Rija' xrajo' chi xk'oje' ta wik'in, y roma ri' yin kan xisik'in rik'in ronojel wuchuq'a'. 15Jak'a toq xrak'axaj chi yin xisik'in rik'in ronojel wuchuq'a', xanimej y xel-el pa jay y roma ri' kan man xuk'uaj ta chik el re rutziaq, xcha' ri ixoq.

16Y ri tzieq ri' k'a xk'oje' na kan rik'in rija', richin chi nuk'ut na apo chuwech ri rachijil toq napon pa rachoch. 17Y toq xapon k'a ri rachijil, rija' xubij k'a chire: Ri asamajel hebreo ri ak'amon-pe, xaxe xpe richin xrajo' xuya' nuk'ix. 18Jak'a yin xisik'in rik'in ronojel wuchuq'a' y jari' toq rija' xanimej-el pa jay, y xuya' kan ri rutziaq re wawe' wik'in, xcha' ri ixoq.

19Y toq ri Potifar xrak'axaj ri ch'abel ri xubij-apo ri rixjayil chire chirij ri José, xyakatej janila royowal. 20Xberuk'ama-pe ri José y xberuya' kan pa cárcel. Y chiri' xtz'ape' wi kan ri José. 21Jak'a ri Jehová kan xuto-wi ri José y xujoyowaj k'a ruwech, y xuben chi utz xtz'et roma ri aj-raqen richin ri cárcel y chuqa' xuben chi utz nitz'et ri rubanobal. 22Y ri aj-raqen richin ri cárcel, pa ruq'a' ri José xuya-wi ri kichajixik konojel ri ek'o chupan ri cárcel ri'; y pa ruq'a' chuqa' rija' xuya-wi ronojel ri nik'atzin chi niban ri chiri'. 23Y roma kan pa ruq'a' ri José k'o-wi ronojel, ri aj-raqen richin ri cárcel kan man jun chik nuch'ob pa ruwi' ronojel, roma ri Jehová kan nuto-wi ri José y ronojel ri nuben kan utz nel chuwech.

Currently Selected:

Gén 39: KQC

Highlight

Copy