Gén 25

Ri e rijatzul ri Abraham rik'in ri Queturá

1Ri Abraham xukanoj chik jun rixjayil y re ixoq re' rubini'an Queturá. 2Y xek'oje' chik waqi' kalk'ual y ja k'a kibi' re': Ri Zimrán, ri Jocsán, ri Medán, ri Madián, ri Isbac y ri Súah. 3Y ri Jocsán kitata' ri Sebá y ri Dedán; y rija' xeralk'ualaj k'a ri asureo, ri letuseo, y ri leumeo. 4Y ri e ralk'ual ri Madián ja ri Efá, ri Éfer, ri Hanoc, ri Abidá y ri Eldaá. Konojel re' e ral-riy kan ri Queturá. 5Jak'a ri Abraham kan xaxe chire ri Isaac xuya-wi kan ronojel ri rubeyomel. 6Y chike ri ralk'ual ri kal ri e concubina*f22* xaxe juba' sipanik xuya-el chike y xeruteq-el nej k'a pa relebel-q'ij richin xeruch'er rik'in ri Isaac rokik k'a k'es na rija'.

Ri rukamibal y ri rumuqubal ri Abraham

7Ri Abraham xk'ase' k'a el chuwech ri ruwach'ulew, 175 juna'. 8Ri Abraham xken k'a roma rurijixinen y keri' k'a xk'olotej-el chuwech ri ruwach'ulew. 9Ri Isaac y ri Ismael xkimuq k'a ri kitata' chupan ri jul richin Macpelá, ri k'o chupan ri ojer rulew ri Efrón, ruk'ajol ri Sóar hitita, re ulew re' k'o chuwech ri Mamré. 10Re ulew re' ruloq'on kan ri Abraham chike ri e rijatzul ri Hit, chiri' k'a xmuq-wi ri Abraham chunaqaj ri Sara ri rixjayil. 11Chirij ri rukamik ri Abraham, ri Dios xuya' urtisanik pa ruwi' ri Isaac ri ruk'ajol y rija' xk'oje' chiri' rik'in ri pozo ri rubini'an Pozo Richin ri kan K'es y ri Yirutz'et.

Ri e rijatzul ri Ismael

12Jare' ri e rijatzul ri Ismael, ri ralk'ual kan ri Abraham rik'in ri Agar aj-Egipto ri loq'on samajel ri xk'oje' rik'in ri Sara. 13Jare' k'a ri kibi' ri e ralk'ual ri Ismael: Ri nimalaxel rubini'an Nebaiot, y ri ch'aqa' chik ja ri Quedar, ri Adbeel, ri Mibsam, 14ri Mismá, ri Dumá, ri Masá, 15ri Hadar, ri Temá, ri Jetur, ri Nafís y ri Quedmá. 16Ja kibi' re' ri e kablajuj ralk'ual ri Ismael, y rik'in re bi'aj re' xetamatej ri kitzobaj y ri akuchi ek'o-wi-qa. Y chikijujunal re jun jay winaqi' re' xk'oje' tata'al pa kiwi'.

17Y ri Ismael xk'ase' k'a el 137 juna' y xken, y keri' xk'olotej-el chuwech re ruwach'ulew. 18Ri e rijatzul xek'oje' chupan ri ruwach'ulew ri nitiker-el rik'in ri Havilá ri k'o pa Sur ri k'o chuwech ri Egipto y xe'apon k'a pa ruwach'ulew Asiria, y kan kich'aron k'a ki' kik'in ri ch'aqa' chik kach'alal.

Toq xe'alex ri Jacob y ri Esaú

19Jare' ri rijatzul ri Isaac ri ruk'ajol kan ri Abraham: Ri Abraham xralk'ualaj ri Isaac. 20Ri Isaac k'o chik kawineq rujuna' toq xk'ule' rik'in ri Rebeca, rumi'al ri Betuel, rana' ri Labán; rije' e arameo aj-Padán-aram. 21Ri Isaac xuk'utuj k'a chire ri Jehová chi ri rixjayil nik'oje' ta ral roma rija' man alanel ta, y ri Jehová xrak'axaj y ri Rebeca xek'oje' k'a ral. 22Y ri ak'uala' ri xkebe'alex rik'in rija' e kua'ch y kan janila chik nikiben oyowal, y rija' xubij: ¿Achike roma kere' nuk'uluwachin?, xcha'. Y k'ari' xbe richin xberuk'ulubej ri Jehová. 23Y ri Jehová xubij chire:

E ka'i' nima'q taq tzobaj winaqi' richin

ri ruwach'ulew ek'o awik'in,

kan man junan ta pe kiwech,

ri jun más xtik'oje' ruchuq'a' chuwech ri jun chik,

y ri nimalaxel xtiberusamajij ri chaq'laxel, xcha'.

24Toq xtz'aqet ri q'ij richin xe'alex, kan e kua'ch na wi xe'alex rik'in. 25Ri xalex nabey janila rusumal y ri rusumal kan kaqkoj k'a ri nitzu'un, y re ak'ual re' xubini'aj Esaú.*f23* 26K'ari' xalex ri chaq'laxel y kan ruchapon-pe pa ruxtuxil ri Esaú, y roma ri' xubini'aj Jacob.*f24* Y ri Isaac oxk'al k'a rujuna' chiri' toq ri rixjayil xeralaj ri ak'uala' ri'.

Ri Esaú man xuya' ta rejqalen chi rija' jun nabey al

27Xek'iy-q'anej ri ak'uala', y ri Esaú xok-q'anej jun achin richin pa juyu', y xok jun jebelej kanonel; y ri Jacob man keri' ta, rija' jun achin ri man niq'ajan ta y niqa' chuwech nik'oje' kan pa rachoch. 28Ri Isaac janila xrajo' ri Esaú, roma yerutej ri taq chikopi' ri nuk'en-pe pa juyu'; jak'a ri Rebeca ja ri Jacob más xrajo'.

29K'o jun q'ij ri Jacob nuben keq kineq' pa pul-ik y ri Esaú xtzolin-pe pa juyu' janila kosineq-pe y rik'in wayjal, 30y xubij chire ri ruchaq': Taya' chuwe la q'utun la yatajin chubanik, roma yiken roma wayjal, xcha'. Y roma ri' Edom chuqa' xbix chire ri Esaú y re' nel chi tzij keq. 31Y ri Jacob xubij chire: Ninya' chawe ri q'utun wi ja yin xkinok nimalaxel pan ak'exel richin ninwichinaj kan ri awichin rat, xcha' chire.

32K'ari' ri Esaú xubij: Yin kan yiken yan roma wayjal; taya-pe ri aq'utun chuwe. ¿Achike ta k'a xtik'atzin-wi chuwe ri xtinwichinaj kan toq yin xa in kamineq chik?, xcha'.

33Y ri Jacob xubij chire ri runimal: Tajikiba' atzij chinuwech re wakami, xcha'.

Y rija' kan keri' xuben, y xuya' q'ij chire ri Jacob chi ja rija' nichinan kan pa ruk'exel. 34Keri' k'a xuben ri Jacob, xuya' k'a kaxlan-wey y ri keq kineq' chire ri rubanon, y ri Esaú jebel xwa', xuk'ya' y xyakatej-el y xbe. Keri' k'a xuben ri Esaú, kan man jun rejqalen xuya' chire chi ja rija' ri nimalaxel.

Currently Selected:

Gén 25: KQC

Highlight

Copy