Gén 24

Ri Abraham xuteq rukanoxik rixjayil ri Isaac

1Ri Abraham xa xrijix yan k'a chiri', kan janila chik k'iy rujuna'. Jak'a ri Jehová kan rurtisan rik'in ronojel. 2Y jari' toq xch'on rik'in jun rusamajel ri k'o pa rachoch ri k'o más ruq'ij y ri k'o pa ruwi' ri rubeyomel y xubij chire: Taya-pe la aq'a' chuxe' re wa', 3richin chi naya' atzij chuwe yin y chuwech ri Jehová ri Dios, ri rajaw ri kaj, y ri rajaw re ruwach'ulew, richin chi man taya' q'ij chi ri nuk'ajol Isaac nik'ule' ta rik'in jun xten aj wawe' pa Canaán. 4Kabiyin chupan ri nutinamit kik'in ri wach'alal y chiri' tak'ama-pe jun xten richin nok rixjayil ri nuk'ajol, xcha' ri Abraham.

5Ri rusamajel xubij chire: Rik'in ta juba' chi ri xten man ta nrajo' nipe chuwij k'a chupan re ruwach'ulew re'. ¿Achike k'a xtinben yin? ¿Nintzolij-el ri ak'ajol k'a ri akuchi at eleneq-wi-pe rat?, xcha'.

6Y ri Abraham xubij chire: Ni, man ninya' ta q'ij richin nak'uaj-el ri nuk'ajol k'a kela'. 7Roma ri Jehová Dios, ri rajaw ri kaj, ri xinelesan-pe chupan ri rachoch ri nata', y ri xinelesan-pe chiri' chupan ri ruwach'ulew kichin ri wach'alal, rija' kan rujikiban rutzij chuwe chi chike ri wijatzul yin xtuya-wi re ruwach'ulew Canaán. Y rija' kan xtuteq-pe jun ángel richin chi xkaruto', richin chi k'a chila' xtak'en-pe ri xten ri xtok rixjayil ri nuk'ajol, 8y wi ri xten ri' xa man xtrajo' ta xtipe chawij, rat xkatotej chuwech re ya'on-tzij re xtabebana'; jak'a ri nuk'ajol man jun bey tak'uaj-el k'a kela', xcha' ri Abraham.

9K'ari' ri rusamajel xuya-ok ruq'a' chuxe' ri ra' ri rajaw y xujikiba-rutzij richin nuben re jun taqikil re'. 10Y ri samajel xeberuk'ama' k'a pe e lajuj camello y xerucha' k'a el ri sipanik ri más e jebel chukojol ri rubeyomel ri Abraham; y xyakatej na wi el y xbe k'a pa rutinamit kan ri Nacor ri k'o pa ruwach'ulew Mesopotamia. 11Y toq xapon chiri', xeruxukuba' k'a ri camello chuchi' ri tinamit chunaqaj jun pozo y xqaq'ij yan k'a qa, y jari' toq ri xtani' ye'eran ya'. 12Y xubij k'a ri samajel: Jehová Dios richin ri Abraham y wichin yin, tabana' utzil chi ronojel ri nutaqikil kan ta utz xtel chinuwech, y taya' joyowanik pa ruwi' ri wajaw. 13Wakami, rokik re ink'o chuchi' re pozo re', ri xtani' richin re tinamit re' xkepe k'a chi relesaxik kiya'. 14y ja ta k'a ri xten ri achoq chire xtinbij-wi: Taqasaj la kuku'*f21* y tabana' utzil taya' juba' nuya' richin ninqum, y wi rija' xtubij chuwe: Taqumu' ri aya', y chuqa' xtinya' kiya' ri a-camello, xticha' ta chuwe, ja ta k'a xten ri' ri akanon rat, richin chi xtok rixjayil ri Isaac; y rik'in ri' xtinwetamaj k'a yin chi kan xaya' wi ri ajoyowanik pa ruwi' ri wajaw, xcha' ri samajel.

15Y kan k'a man jani tuk'is-qa rubixik re ch'abel re' chire ri Dios, toq ri Rebeca rumi'al ri Betuel xapon chuchi' ri pozo, y ruya'on-el ri kuku' chuwi-rutele'n. Y ri Betuel ri' kalk'ual ri Milcá y ri Nacor, ri runimal ri Abraham. 16Y ri Rebeca kan jun xten ri jebel ok, y kan man jun bey k'o ta pe achin rik'in. Rija' xapon-qa chuchi' ri pozo, xunojisaj-pe ri rukuku' y kan jari' k'a nitzolin-el. 17K'ari' ri rusamajel ri Abraham junanin xbe richin xch'on rik'in y xubij chire: Yin janila chaqi'j nuchi', tabana' jun utzil chuwe, tasipaj juba' nuya' la ak'uan chupan la akuku', richin ninqum, xcha' chire.

18Y ri xten kan jari' chi'anin xuqasaj-qa ri rukuku' xuch'elej pa ruq'a' y xubij: Táta, taqumu' k'a aya', xcha' chire.

19Y toq xuya' yan ruya' ri achin, chuqa' xubij chire: Xtinwelesaj chuqa' kiya' la a-camello k'a toq xketane' na richin ye'uk'ya', xcha'. 20Rija' kan jari' xujem kan chi'anin ri ya' ri k'o chupan ri rukuku' chiri' chupan ri qumbel-ya', y kan xupararej-ri' chi relesaxik ya' y keri' xrelesaj k'a ya' kichin konojel ri camello ri'. 21Y ri rusamajel ri Abraham xaxe k'a rutzuliben ri najin chubanik ri xten ri' y man jun k'a ch'abel xubij, roma najin nuch'ob rij, wi ri Jehová jari' najin chik chuto'ik chupan re jun taqikil re' o ni. 22Y toq ri xten xtane' yan k'a richin nuya' kiya' ri camello, jari' toq ri achin xuya' k'a jun retz'aba'l-rutza'n ri banon rik'in q'anapueq y ri ralal jubama nik'aj onza. Y xuya' chuqa' ka'i' retz'aba'l ruq'a' ri e banon rik'in q'anapueq, y chikijujunal kalal jubama oxi' onza rik'in nik'aj. 23Y k'ari' xuk'utuj k'a chire: ¿Achoq at mi'al k'a rat? Y chuqa' tabana' utzil tabij chuwe, ¿man jun kami akuchi yojuxlan-wi kan juba' chirachoch ri atata'?, xcha'.

24Y ri xten xubij: Yin in rumi'al kan ri achin ri xubini'aj Betuel ri kalk'ual kan ri Milcá y ri Nacor. 25Pa qachoch kan k'o akuchi yixk'oje-wi kan richin yixuxlan y chuqa' k'o páxa y k'iy q'os kichin ri a-camello, xcha' rija' chire.

26K'ari' ri achin xulukuba-qa-ri' richin xuya' ruq'ij ri Jehová, 27y xubij: Nim aq'ij-ak'ojlen rat Jehová ru-Dios ri wajaw Abraham y at nu-Dios chuqa' yin, rat janila xajoyowaj ruwech ri wajaw y xaben ri xasuj chire y chuqa' xak'ut ri bey chinuwech yin chi choj xinoqaqa-el pa kachoch ri rach'alal ri wajaw, xcha'.

28K'ari' ri xten xbe junanin chirachoch richin xberutzijoj ronojel re' chike ri rusamajela' ri rute'. 29Y ri Rebeca k'o k'a jun ruxibal rubini'an Labán y re ruxibal re' toq xrak'axaj, kan jari' xuben-el richin nibe k'a rik'in ri rusamajel ri Abraham ri k'o kan chuchi' ri pozo. 30Y toq ri Labán xutz'et ri retz'aba'l-rutza'n ri rana' y ri retz'aba'l-ruq'a' y chuqa' xrak'axaj ri bin el chire ri Rebeca roma ri rusamajel ri Abraham, rija' junanin xbe, k'a rik'in ri samajel ri', ri k'o kan chunaqaj ri pozo kik'in ri ru-camello. 31Y ri Labán xberubij k'a chire ri samajel ri': Jo', qojok-apo, rat ri at urtisan-pe roma ri Jehová ¿Achike roma k'a atk'o na wawe'? Yin xinchojmirisaj yan kan ri jay akuchi yabek'oje-wi y chuqa' ri kik'ojelibal ri a-camello, xcha' ri Labán.

32K'ari' ri rusamajel ri Abraham xapon k'a pa rachoch ri Labán, y ri Labán xuqasaj kan ronojel ri ejqa'n chikij ri camello y xuya' kan kiq'os. Y k'ari' xuya' ruya' ri rusamajel ri Abraham y ri e beneq rik'in richin nikich'ej kaqen.

33Y xya'ox k'a apo chikiwech ri k'o chi nikitej, jak'a ri rusamajel ri Abraham xubij: Nabey chire richin nintej nuway k'o chi ninbij-apo ri nutaqikil, xcha'.

Y ri Labán xubij chire: Tatzijoj k'a chiqe achike roma toq xatoqaqa wawe', xcha'.

34K'ari' xubij: Yin in rusamajel ri Abraham. 35Ri Jehová janila ruya'on urtisanik pa ruwi' ri wajaw, rubanon chire chi xok nimalej beyom, e ruya'on k'iy rukarne'l y wákix, chuqa' ruya'on saqipueq y q'anapueq chire, e k'iy rusamajela' ek'o chi achi'a' chi ixoqi', chuqa' k'iy ru-camello y rubur. 36Y ri Sara ixjayilonel richin ri wajaw, rija' pa rurijixinen xk'oje' jun ral y chire re ala' re' niya'ox-wi kan ronojel ri k'o rik'in ri wajaw. 37Y ri wajaw xuben chuwe chi xinjikiba-nutzij chuwech y xubij chuwe: Man takanoj rixjayil ri nuk'ajol chikikojol ri kimi'al ri aj-Canaán re akuchi ojk'o-wi. 38Xa kan kabiyin pa kachoch ri nte-nata' kik'in ri nuwinaq, chiri' takanoj-pe jun rixjayil ri nuk'ajol, xcha' pe ri wajaw. 39Jak'a yin xinbij chire: Rik'in juba' ri xten man xtrajo' ta xtipe chuwij. ¿Achike k'a xtinben yin?, xicha' chire. 40Y rija' xubij chuwe: Ri Jehová ri kan nuben ri nubij chuwe, rija' xtuteq-pe ri ru-ángel ri xtibe awik'in richin utz xtel ronojel chawech y keri' xtak'en-pe jun rixjayil ri nuk'ajol chikikojol ri alk'ualaxela' ri e aj pa rachoch kan ri nata'. 41Toq xkatapon kik'in ri wach'alal, wi rije' man xtikiya' ta pe ri xten chawe, xkatotej k'a kan rat chuwech re ya'on-tzij re', xcha' ri Abraham chuwe.

42Keri' k'a toq xinoqaqa-el k'a re wawe' rik'in ri pozo. Xich'on k'a rik'in ri Jehová y xinbij: Jehová, Dios wichin yin y richin ri wajaw, tabana' utzil kinato' k'a chupan re jun taqikil re', 43yin ink'o wawe' chunaqaj ri pozo y ri xten ri xtipe richin noruk'ama' ruya' y xtinbij chire: Tabana' utzil taya' juba' nuya' richin ninqum, xkicha' chire, 44y wi rija' xtubij chuwe: Taqumu' ri aya' nabey rat, chirij re' ninweraj kiya' ri a-camello, xticha', ja k'a xten re' ri acha'on-pe rat Jehová richin xtok rixjayil ri ruk'ajol ri wajaw, xicha' chire ri Dios. 45Toq yinajin chubixik re ch'abel re' pa wánima, jari' toq xbek'ulun-pe ri Rebeca rik'in ri rukuku' chuwi-rutele'n richin xberuk'ama-qa ruya' chuchi' ri pozo y jari' toq xinbij chire: Tabana' jun utzil chuwe, tasipaj juba' nuya', xicha' chire. 46Chi'anin xuqasaj-pe ri rukuku' ri chuwi-rutele'n y xubij chuwe: Taqumu' ri aya', táta y chuqa' xtinya' kiya' ri a-camello, xcha' chuwe. Y yin xinqum k'a ri ya' y xuya' chuqa' ri kiya' ri nu-camello. 47K'ari' xink'utuj chire: ¿At achoq mi'al k'a rat?, xicha' chire. Y rija' xubij chuwe: In rumi'al ri Betuel y ri wati't-numama' ja ri Milcá y ri Nacor, xcha' chuwe. K'ari' xinya' jun retz'aba'l-rutza'n, y ka'i' retz'aba'l-ruq'a'. 48K'ari' xinlukuba-wi' richin xinya' ruq'ij-ruk'ojlen ri Jehová Dios, ri ru-Dios chuqa' ri wajaw Abraham, roma xiruto' richin xiruk'en-pe chupan ri qitzij bey y xinoqaqa-el kik'in ri rach'alal ri wajaw richin ninkanoj-el ri rixjayil ri Isaac. 49Wakami k'a tibij ri qitzij chuwe, wi nijoyowaj ruwech ri wajaw richin niya-el ri xten chuwe. Y wi man niya' ta, tibij chuqa' chuwe, richin keri' yin xtinkanoj akuchi xkibe-wi, xcha' ri rusamajel ri Abraham.

50K'ari' ri Labán pa rubi' ri Betuel, ri rutata', xubij: Rik'in ri Jehová peteneq-wi ronojel re'; roj man jun yojtikir niqabij chawe wi ja' o ni. 51Ja Rebeca re' ninjech-el chawe, tak'uaj k'a el y katzolin k'a; xtok ta k'a rixjayil ri ruk'ajol ri awajaw, achi'el xubij ri Jehová, xcha'.

52Toq ri samajel xrak'axaj re ch'abel re', xulukuba-qa-ri' pan ulew richin xuya' ruq'ij ri Jehová. 53Y ri samajel xuya-apo jalajoj ruwech sipanik ri banon rik'in saqipueq y q'anapueq, y tzieq, richin xusipaj chire ri Rebeca y chuqa' xeruyala' sipanik chire ri ruxibal y ri rute'. 54Xeri' xewa' y xe'uk'ya', rija' y konojel ri e beneq chirij y chiri' xewer-wi kan. K'a ri ruka'n q'ij nimaq'a' yan xeyakatej y ri achin xubij chike: Tikuyu' juba', tiya' q'ij chuwe richin yitzolin rik'in ri wajaw, xcha' chike.

55K'ari' ri ruxibal y ri rute' xkibij: Tik'oje' na chik juba' ri Rebeca qik'in y k'a pa jun lajuj q'ij k'ari' k'a xtibe, xecha'.

56Y ri samajel xubij: Tibana' utzil man yiniq'et-qa roma kan ja ri Jehová xbanon richin utz xel ri nutaqikil. Tikuyu' juba', tiya' q'ij chuwe richin yitzolin yan pa rachoch ri wajaw, xcha'.

57Y rije' xkibij: Tiqoyoj na k'a ri xten y achike na k'a xtubij rija', xecha'.

58K'ari' xkoyoj y xkik'utuj chire: ¿Nawajo' richin yabe yan chirij re achin re'?, xecha' chire.

Y rija' xubij: Ja', ninwajo' yibe, xcha'.

59K'ari' xkijech k'a el ri Rebeca y ri ixoq ri xk'iytisan richin, ri rusamajel ri Abraham y konojel ri e peteneq chirij. 60Xkiya' k'a urtisanik pa ruwi' ri Rebeca y xkibij chire: Qach'alal roj, xkatok ta k'a te'ej kichin e 1,000 winaqi' y ri awal-awiy xke'ichinan kan ri tinamit ri ye'etzelan kichin, xecha'.

61K'ari' ri Rebeca y ri xtani' ri e raj-ik' xech'oke-el chikij ri camello y xekitzeqelibej-el ri e rusamajela' ri Abraham. Keri' k'a xbanatej toq ri rusamajel ri Abraham xuk'uaj-el ri Rebeca, y xuchop bey.

62Y ri Isaac tzolejineq k'a el akuchi k'o-wi ri pozo ri rubini'an Pozo Richin ri kan K'es y Yirutz'et, roma rija' k'o pa ruwach'ulew Négueb. 63Toq xqaq'ij yan qa, rija' xbebiyaj juba' pa juyu', jari' toq xerutz'et ri camello e peteneq. 64-65Chuqa' ri Rebeca xutz'et-pe ri Isaac y xuk'utuj chire ri samajel: ¿Achike k'a ala' la tzalan-pe pa juyu' y peteneq kere'?, xcha'.

Y ri samajel xubij chire: Ja wajaw la', xcha'. K'ari' ri Rebeca xqaqa-qa chirij ri ru-camello y xutz'apej rupalej rik'in ri rutziaq ri ruq'un.

66Keri' k'a xkik'ul-ki' ri samajel rik'in ri Isaac y ri samajel xutzijoj chire ri Isaac ronojel ri xuben. 67K'ari' ri Isaac xuk'en-pe ri Rebeca pa rachoch kan ri rute', richin xok rixjayil y kan janila xrajo' y xumestaj-el ri rubis roma k'a juba' tiken-el ri rute'.

Currently Selected:

Gén 24: KQC

Highlight

Copy