Ez 47
47
Ri alaxibel-ya' ri nel-pe pa rachoch ri Dios
1Ri achin ri xuk'ut ri rachoch ri Dios chinuwech xuben chuwe richin xitzolin chik ri pan okibel ri k'o chunaqaj ri rachoch ri Dios. Jari' toq xintz'et chi ri chuxe-qa ri ruchi-jay nibulbu'x-pe ya' ri nel-pe re kere' pa relebel-q'ij. Ri ya' niqaqa-pe pa rijkiq'a' ri rachoch ri Dios y pa xokon chire ri porobel. 2Xeri' ri achin xuben chuwe richin xinel-el chiri' chuwa-jay pan okibel ri k'o pa xaman y xuben chuwe richin xinpiskolij-el-wi' chirij ri tz'aq richin yinapon pan okibel ri k'o pa relebel-q'ij. Y ri raqen-ya' ri' nibulbu'x xel-pe chuxe' ri tz'aq pa rijkiq'a' ri okibel.
3Ri achin ri' k'o k'a jun k'an pa ruq'a', y xbiyin-qa pa xulan chuchi' ri raqen-ya'. Y toq xbiyin 299 jaj rik'in ka'i' q'a'aj, xuben chuwe richin xinq'axaj ri raqen-ya'. Y ri ya' ri' chuqul-waqen xapon-wi-q'anej. 4Chirij ri' xbiyin chik qa 299 jaj rik'in ka'i' q'a'aj y xuben chuwe richin xinq'axaj chik ri ya' ri'. Y xapon-q'anej chuwa-nuch'ek. Xbiyin chik qa 299 jaj rik'in ka'i' q'a'aj y xuben chik chuwe richin xinq'axaj chik ri ya'. Y xapon-q'anej xenupan. 5Xbiyin chik qa 299 jaj rik'in ka'i' q'a'aj y ri raqen-ya' xa kan man yitikir ta chik ninq'axaj, roma ri ya' ri' xa kan janila xnimer rupan. Xa kan xaxe k'a yimuxan ri yitikir ninq'axaj. 6K'ari' xubij chuwe chi kan tintz'eta' jebel. Y chirij ri' xuben chuwe richin xitzolej chik chuchi' ri raqen-ya' ri'.
7Y xintz'et chi, chi e ka'i' ruchi' ri raqen-ya' ek'o janila che'. 8K'ari' ri achin xubij chuwe: Re ya' re' nibiyin-qa pa relebel-q'ij y napon k'a pa raqen-ya' Jordán. K'ari' nok-apo chupan ri Tzayi-Choy. Y toq napon-qa chiri', ri ya' ri k'o chupan ri Tzayi-Choy kan nok k'a ki'. 9Xabakuchi napon-wi ri raqen-ya' ri' kan xkek'ase' k'a jalajoj ruwech chikopi' e richin ya' y janila ker, roma ri ya' richin ri raqen-ya' ri nel-pe pa rachoch ri Dios kan nuben chire ri ya' k'ey chi nok choj ya'. 10Kan k'a pan En-gadi ri k'o pa xaman, k'a pan En-eglaim ri k'o pa xokon chire ri Tzayi-Choy, xkek'oje' ri e chapoy taq ker y chiri' k'a xtikisa-wi ri kiya'l richin nikichop ker. Y ri ker ri ek'o chiri' kan pa ruk'iyal ri xkek'oje', y kan jalajoj k'a ri ker achi'el ri ek'o chupan ri palou. 11Jak'a akuchi ri niq'ate-wi rubey ri ya' y ri ch'abeq xa kan jantape' tzey, richin chi chiri' nel-wi-pe ri atz'an. 12Y chi e ka'i' ruchi' ri raqen-ya' ri' xkebek'iy-pe jalajoj kiwech che'. Y ri che' ri' kan xkewachin y e tijel ri ruwech. Ri kixaq man jun bey xketzaq-el y jantape' yewachin. Ik'-ik' yechaq'aj kiwech ri che' ri', roma ri niya'an richin ja ri ya' ri nel-pe pa rachoch ri Dios. Y ri ruwech kan richin yetij y ri kixaq ri che' ri' kan xtik'atzin richin aq'om, xcha' ri achin ri'.
Ri ruk'ulba't ri ruwach'ulew Israel
13Chirij re' ri Jehová xubij: Toq rix israelita xtich'er ri ruwach'ulew richin niwichinaj, k'o chi nich'er chiwech ri ruwach'ulew pa kablajuj tzobaj, achi'el ri kajlabal ri e rijatzul kan ri Israel. Y ri e rijatzul kan ri José, xtikichinaj kan ka'i' mul chikiwech ri ch'aqa' kach'alal. Y yin xtinbij chiwe ri akuchi ek'o-wi ri kik'ulba't. 14Yin xinya' nutzij richin xinya' re ruwach'ulew re' chike ri iwati't-imama' y roma ri' kan xtich'er k'a junan chiwech richin xtiwichinaj.
15Y jare' k'a ruk'ulba't ri ruwach'ulew ri k'o pa xaman. Nitiker-pe rik'in ri palou y niq'ax-pe kere' pa relebel-q'ij chunaqaj ri tinamit Hetlón y nibe kela' pa tinamit Sedad. 16Choj nibe rik'in ri tinamit Berotá, ri Sibraim ri k'o pa ruwach'ulew Damasco y napon k'a pa tinamit Hamat. Napon pa tinamit Hasar-haticón y jari' napon rik'in ri ruk'ulba't ri ruwach'ulew Haurán. 17Ja k'a k'ulba't re' ri k'o pa xaman ri nibe chuchi' ri palou y napon k'a pa tinamit Hasar-enán ri k'o pa xaman chire ri ruwach'ulew Damasco y ri Hamat.
18Ri k'ulba't ri k'o kere' pa relebel-q'ij choj nibe pa xokon chukojol ri ruwach'ulew Haurán y ri Damasco; k'ari' nibe pa qajbel-q'ij y napon k'a pa raqen-ya' Jordán. K'ari' nixule-qa pa xokon chire ri raqen-ya' ri' ri nuch'er ri ruwach'ulew Galaad rik'in ri ruwach'ulew Israel. Napon k'a chuchi' ri Tzayi-Choy y choj nibe chuchi' ri ya' k'a toq napon rik'in ri tinamit Tamar ri k'o pa xokon chire ri Israel.
19Ri k'ulba't ri k'o pa xokon nitiker-el rik'in ri tinamit Tamar y choj nibe pa qajbel-q'ij. Niq'ax-el rik'in ri alaxibel-ya' Meribá-cadés y napon k'a pa ti ch'uti'n raqen-ya' richin Egipto y napon k'a pa palou.
20Ri ruk'ulba't ri k'o pa qajbel-q'ij nitiker-el pa raqen-ya' richin Egipto y nibe pa xaman chuchi' ri palou y napon k'a pa taq taq'aj chuwech-pe ri tinamit Hamat.
21Jak'a ruwach'ulew re' ri xtitaluj chiwech achi'el rubanik ri kablajuj itzobaj. 22Jari' ri ulew ri xtiwichinaj kan rix y chuqa' ri nikichinaj kan ri winaqi' ri man e rijatzul ta kan ri Israel, rije' xkek'oje' chi'ikojol y chuqa' ri kalk'ual. Xtiben chike chi kan achi'el e iwinaq israelita y toq xtich'ar ri ruwach'ulew, rije' k'o chi xke'ichinan iwik'in. 23Y xabachike tzobaj xkek'oje-wi, chiri' k'o chi xtikichinaj kan kulew. Ja yin Jehová ri yibin.
Currently Selected:
Ez 47: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.