Ez 46
46
Jujun ruchojmilal richin ri jalajoj ruwech nimaq'ij
1Yin Jehová ninbij: Ri okibel ri k'o pa relebel-q'ij chire ri ruwa-jay ri k'o chunaqaj ri wachoch, xtitz'ape' ronojel q'ij, jak'a xtijaqe' chupan ri q'ij richin uxlanen. Y chuqa' xtijaq toq ninimaq'ijux ri q'ij richin ri k'ak'a' ik'. 2Chupan ri q'ij ri', ri q'atoy-tzij k'o chi nok-apo chupan ri okibel ri' y xtipa'e-el rik'in ri jun che' ri chapayon ri okibel. Rokik ri' ri sacerdote xtikiporoj ri chikop ri xtiporox jumul y chuqa' ri kamelabel richin niq'alajin chi junan ruwech wik'in. Ri q'atoy-tzij k'o chi nuya' nuq'ij chiri' pan okibel y xeri' nel-el chiri'. Jak'a man xtitz'ape' ta chijun ri q'ij ri'. 3Ri pa taq q'ij richin uxlanen y pa taq nimaq'ij richin ri k'ak'a' ik', ri winaqi' k'o chi nikiya' nuq'ij chiri'. 4Ri kajlabal ri chikopi' ri k'o chi nuk'en-pe ri q'atoy-tzij chupan ri q'ij richin uxlanen richin yeporox jumul, ja ri waqi' karne'l ri k'o jun kijuna' y jun achij karne'l ri kan tz'aqet. 5Y pa ruwi' chik ri achij karne'l ri', k'o chi nuk'en-pe juwineq libra jalajoj ruwech ixin. Y pa ruwi' ri waqi' taq karne'l xtuk'en-pe ri janipe' nrajo' rija'. Jak'a rik'in chikijujunal ri wo'o' libra jalajoj ruwech ixin, k'o chi nuya' jun litro aceite richin olivo. 6Ri q'ij toq ninimaq'ijux toq nalex ri k'ak'a' ik' ri', ri q'atoy-tzij k'o chi nuk'en-pe jun nima-alaj achij wákix, waqi' alaji' karne'l y jun achij karne'l ri kan tz'aqet. 7Y rik'in ri wákix xtuk'en-pe juwineq libra jalajoj ruwech ixin, y k'o chi xtuk'en-pe juwineq libra rik'in ri achij karne'l. Jak'a kik'in ri waqi' karne'l xtuk'en-pe ri janipe' nrajo' rija'. Y rik'in chikijujunal ri wo'o' libra jalajoj ruwech ixin, k'o chi nuya' jun litro aceite richin olivo. 8Y toq ri q'atoy-tzij xtok-apo pa ruwa-jay, k'o chi nok-apo pan okibel ri k'o pa relebel-q'ij y k'o chi chiri' xtel-wi-pe.
9Y ri pa taq nimaq'ij toq konojel winaqi' ye'ok-apo richin nikiya' nuq'ij, k'o chi kere' nikiben: Ri xke'ok-apo pan okibel ri k'o pa xokon, k'o chi ye'el-el pa xaman. Y ri xke'ok-apo pan okibel ri k'o pa xaman, k'o chi ye'el-el pa xokon. Man xke'el ta el chupan ri okibel ri akuchi ye'ok-wi. 10Y ri q'atoy-tzij k'o chi nok-apo pa nabey y chiri' nik'oje-wi, k'a toq yek'is na pe konojel winaqi', k'ari' nel-pe rija'.
11Y chupan ri ch'aqa' chik nimaq'ij k'o chi xtisuj-apo juwineq libra jalajoj ruwech ixin rik'in jun nima-alaj achij wákix, y chuqa' rik'in jun achij karne'l. Jak'a kik'in ri taq karne'l xtiya' ri janipe' ri nalex pan iwánima. Y rik'in chikijujunal ri wo'o' libra jalajoj ruwech ixin, k'o chi niya' jun litro aceite richin olivo. 12Toq ri q'atoy-tzij nalex-pe pa ránima richin nuya' jun sipanik chuwe richin niporox jumul o richin niq'alajin chi junan ruwech wik'in, xtijaq k'a ri okibel ri k'o pa relebel-q'ij. Rija' k'o chi nok-apo ri chiri' y xtuya' k'a ri sipanik achi'el rubanik ri niban chire ri nuya' pa taq q'ij richin uxlanen. Y toq rija' nel chik el ri chiri', jari' toq nitz'apex chik kan ri okibel ri'.
13Kan ronojel k'a q'ij ri nimaq'a' yan, xtisuj jun alaj karne'l ri k'o jun rujuna' ri kan tz'aqet. Y re' kan xtiporox jumul chinuwech. 14Rik'in ri chikop ri', k'o chi nik'en-pe oxi' libra jalajoj ruwech ixin ri ke'en chik y jun litro aceite ri xtiya'ox chirij ri ke'en ri'. Re jun banobel re' kan k'o chi niban richin q'asen. 15Keri' ri alaj karne'l, ri sipanik richin jalajoj ruwech ixin y ri sipanik richin aceite richin yeporox jumul k'o chi yesuj chinuwech ronojel nimaq'a'.
Ri ruchojmilal pa ruwi' ri ulew
16Yin Jehová ninbij: Wi ta ri q'atoy-tzij nusipaj juba' ulew chire jun ralk'ual, re ulew re' kan xtok k'a richin ri alk'ualaxel ri' y kan xtok chuqa' kichin ri e rijatzul. 17Jak'a wi ri q'atoy-tzij nusipaj ta juba' ulew chire jun rusamajel, re ulew re' achi'el xa ta xaxe nuqej ri samajel. Y toq xtapon ri juna' richin nitzolix ronojel, ri ulew ri' xa xtok chik richin ri q'atoy-tzij y xtikichinaj kan ri e ralk'ual rija'. 18Chuqa' ri q'atoy-tzij maneq ruq'a' richin numej ta kan ri rulew jun chik wineq. Wi rija' nrajo' nuya' kan kulew ri ralk'ual, k'o chi nuya' kan chike ri kan rulew rija', richin keri' man jun chike ri winaqi' israelita ri man nik'oje' ta kan rulew y chuqa' man nelesex ta el chupan ri rulew, xcha' ri Dios.
Ri jay ri akuchi niban-wi q'utun.
19Xeri' ri achin ri xuk'ut ri rachoch ri Dios chinuwech, xiruk'uaj-el pa xokon chire ri ruwa-jay ri k'o chunaqaj ri jay ri'. Y xuk'ut k'a chinuwech ka'i' chik jay ri ek'o pa ruxikin chike ri kachoch ri sacerdote. 20Y xubij chuwe chi ri sacerdote k'o chi chiri' nikiroqowisaj-wi ri ti'ij kichin ri chikopi' ri yesuj richin kamelabel richin kuyubel-mak, richin ch'a'oj y ri sipanik richin jalajoj ruwech ixin. K'o chi chiri' nikiroqowisaj-wi ri ti'ij richin man nikelesaj ta el ri chuwa-jay akuchi ek'o-wi ri winaqi', richin man jun xtikik'uluwachij ri winaqi' ri'.
21-22Xeri' xiruk'uaj-el chuwa-jay ri rusutin-rij ri rachoch ri Dios y xintz'et chi pa taq kaji' ruxikin, k'o jujun chik taq ruwa-jay. Y chikijujunal kablajuj jaj raqen y beleje' jaj ruwech. 23Y chi kaji' ruxikin ri taq ruwa-jay ri' k'o chik jun ti tz'aq ri banon rik'in abej. Y chuxe-qa ri tz'aq ri' ek'o ri akuchi nibox-wi q'aq'. 24K'ari' ri achin xubij chuwe: Ri samajela' richin ri rachoch ri Dios, ja re wawe' nikiroqowisaj-wi ri ti'ij kichin ri chikopi' ri xtikisuj ri winaqi', xcha' chuwe.
Currently Selected:
Ez 46: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
