1 Crón 26
26
Ri chajinela' richin ruchi' ri rachoch ri Dios
1Toq xjach kan ri q'ij richin ri kisamaj ri e aj-raqen richin nikichajij ri ruchi' rachoch ri Dios, kere' k'a rubanik xk'oje' kan: Chike ri e rijatzul ri Coré, ri Meselemías, rumam ri Ebiasaf; 2-3jare' ri e ruk'ajol ri Meselemías: Ri Zacarías, ri Jediael, ri Zebadías, ri Jatniel, ri Elam, ri Johanán y ri Eliehoenai.
4-5Ri Dios kan xrurtisaj ri Obed-edom rik'in e janila ruk'ajol. Y jare' ri rucholajen ri kibi', ri Semaías, ri Jozabad, ri Joah, ri Sacar, ri Natanael, ri Amiel, ri Isacar y ri Peultai.
6Ri Semaías, xek'oje' e k'iy ruk'ajol ri kan xepa'e' kof pa kiwi' ri aj pa kachoch roma e achi'a' ri k'o kejqalen. 7Y ri kibi' ja ri Otní, ri Rafael, ri Obed, ri Elzabad, ri Elihú y ri Samaquías. 8Konojel rije' e rijatzul ri Obed-edom, y kan k'o kejqalen y kuchuq'a' richin ye'ilin. Y konojel rije' e oxk'al ka'i'.
9Ri e ruk'ajol y ri e rach'alal ri Meselemías e waqxaqlajuj, konojel kan e achi'a' ri k'o kejqalen y kuchuq'a' richin ye'ilin.
10Ri Hosá rijatzul kan ri Merarí xek'oje' ruk'ajol. Xuya' ri Simrí aj-raqen pa kiwi' ri e rach'alal, stape' man ja ta rija' ri nabey alk'ualaxel. 11Ri ch'aqa' chik ruk'ajol kibini'an Hilquías, Tebalías y ri Zacarías. Ri e ruk'ajol y ri e rach'alal ri Hosá, konojel rije' e oxlajuj.
12Konojel re achi'a' re' y ri aj-raqen kan chi sol chi sol k'a xesamej richin nikichajij ri ruchi' ri rachoch ri Dios. 13Y ri Dios xuk'ut k'a chikiwech ri achoq pa ruwi' niqaqa-wi ri samaj ri', stape' e ch'uti'q o e nima'q.
14Ri Dios xuk'ut k'a chikiwech ri Selemías y ri Zacarías ri ruk'ajol ri chuqa' jun aj-na'oj. Y ri Selemías xk'ulumaj kan ri ruchi' ri k'o pa relebel-q'ij chire ri rachoch ri Dios, y ri Zacarías xk'ulumaj kan ri k'o pa xaman. 15Ri Obed-edom xk'ulumaj kan ri k'o pa xokon, y ri e ralk'ual nikichajij ri yakonabel chupan ri rachoch ri Dios. 16Ri Supim y ri Hosá xkik'ulumaj kan ri ruchi' ri k'o pa qajbel-q'ij, y ri ruchi' rubini'an Saléquet akuchi nibe-wi ri bey pa jotol, chuqa' nilitej pa qajbel-q'ij.
Keri' k'a rubanik richin yesamej: 17Ronojel q'ij e waqi' chajinela' e levita yek'oje' chuchi' ri rachoch ri Dios ri k'o pa relebel-q'ij, kaji' yek'oje' pa xaman, kaji' pa xokon, y e ka'i' ri yechajin ri yakonabel. 18E kaji' yechajin pa qajbel-q'ij chire ri ruwa-jay chuchi-pe ri bey, y e ka'i' ri yechajin ri ruwa-jay. 19Keri' k'a rubanik ri samaj ri xya'ox chike ri kijatzul kan ri Coré y ri Merarí.
Ri chajinela' richin ri beyomel
20Y ch'aqa' chik levita jari' yechajin ri beyomel richin ri rachoch ri Dios y ri yakonabel richin ri sipanik. 21Ri Ladán rijatzul kan ri Guersón, y rija' rutata' ri Jehiel, 22Ri e ruk'ajol ri Jehiel ja ri Zetam y ri Joel, y pa kiq'a' rije' k'o-wi ri beyomel ri ek'o pa rachoch ri Dios.
23Ch'aqa' chik chajinela' ja ri Ishar, ri Hebrón y ri Uziel, e rijatzul kan ri Amram. 24Ri Sebuel ja rija' ri aj-raqen ri k'o pa ruwi' ri beyomel ri', y rija' rijatzul kan ri Guersón, ri ruk'ajol kan ri Moisés. 25Ri Eliézer rach'alal kan ri Guersón, y ri e rijatzul kan ri Eliézer ja ri Rehabías, ri Isaías, ri Joram, ri Zicrí y ri Selomit.
26Pa kiq'a' ri Selomit y ri e rach'alal k'o-wi kan ri yakonabel richin ronojel ri e jachon pa ruq'a' ri Dios koma ri rey David, ri aj-raqen pa kiwi' ri ek'o pa kachoch, y ri e aj-raqen pa kiwi' ri aj-labal. 27Ri kich'akon-pe pa labal, xkisuj richin nikusex chupan ri rachoch ri Dios. 28Y chuqa' k'o chiri' ri rujachon kan ri Samuel ri nitz'eton ri peteneq, ri rujachon kan ri Saúl ruk'ajol ri Cis, ri Abner ruk'ajol ri Ner y ri Joab ral ri Seruiá. Ronojel re' pa kiq'a' ri Selomit y ri e rach'alal ya'on-wi kan.
Ch'aqa' chik aj-samaj e richin ri rey David
29Ri Quenanías rijatzul kan ri Ishar, y ri e ruk'ajol rija' ja rije' ri e aj-raqen pa kiwi' ri ruwach'ulew y to'onela' chikikojol ri winaqi' richin ri Israel.
30Ri Hasabías rijatzul kan ri Hebrón, y rija' k'o pa kiwi' e 1,700 achi'a' ri kan k'o janila kejqalen. Y rije' e aj-raqen pa ruwi' ri rusamaj ri Dios y ri rey chiri' pan Israel ri k'o pa qajbel-q'ij chire ri raqen-ya' Jordán.
31-32Ri Jerías rijatzul kan ri Hebrón. Y ri David xerucha' kan 2,700 achi'a' ri kan e rach'alal richin xe'ok aj-raqen pa ruwi' ri rusamaj ri Dios y ri rey chiri' pa relebel-q'ij chire ri raqen-ya' Jordán. Y ronojel re' xbanatej chupan ri juna' kawineq chire ri q'atbel-tzij richin ri rey David, toq xuteq kajlaxik ri e rijatzul kan ri Hebrón. Konojel ri achi'a' ri' aj pa tinamit Jazer richin Galaad.
Currently Selected:
1 Crón 26: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
