ᑭᔅᑫᓕᑖᑯᑖᑫᐎᓐ 5
5
ᐊᓂᑭ ᑎᑎᐱᔦᑭᓂᑲᓐ ᓀᔥᑕ ᐊᓇ ᒫᓂᔥᒑᓂᔥ
1ᓂ ᑮ ᐙᐸᑌᓐ ᒫᑲ ᐅ ᑭᒋᓂᔅᑮᒃ ᐊᓇ ᐅᑭᒪᐗᐱᐎᓂᒃ ᑳ ᐊᐱᑦ, ᒪᓯᓇᐃᑲᓐ ᐁ ᒪᓯᓇᐃᑳᑌᒃ ᐱᒋ ᓀᔥᑕ ᐁ ᐅᔅᐱᔅᑾᓂᒪᑲᒃ, ᐁ ᐊᑯᔅᑭᐗᓯᑳᑌᒃ ᓂᔂᔅ ᐊᑯᔅᑭᐗᓯᑲᓇᒃ ᐅᒋ᙮ 2ᓂ ᑮ ᐙᐸᒪᐤ ᒫᑲ ᐁ ᒪᔥᑲᐎᓰᑦ ᐁᓐᒐᓪ ᐁ ᐃᑗᑦ ᐁ ᑭᔗᐌᑦ, ᐊᐌᓇ ᑎᐁᐸᑌᓕᑖᑯᓯᑦ ᑭᒋ ᐋᐸᐊᒃ ᒪᓯᓇᐃᑲᓂᓕᐤ, ᓀᔥᑕ ᑭᒋ ᐋᐸᐙᑦ ᐊᑯᔅᑭᐗᓯᑲᓇ? 3ᓇᒪᐎᓚ ᐊᐌᓇ ᐃᓕᓕᐤ ᒫᑲ ᑭᒋᑭᔑᑯᒃ, ᓇᒪ ᓀᔥᑕ ᐊᔅᑮᒃ, ᓇᒪ ᓀᔥᑕ ᐊᑖᒪᔅᑲᒥᒃ ᑮ ᑲᔥᑭᑕᐤ ᑭᒋ ᐋᐸᐊᒃ ᒪᓯᓇᐃᑲᓂᓕᐤ, ᓇᒪ ᓀᔥᑕ ᑭᒋ ᑲᓇᐙᐸᑕᒃ᙮ 4ᒥᔅᑕᐃ ᒫᑲ ᓂ ᑮ ᒫᑐᓐ, ᐁᑳ ᐊᐌᓇ ᐃᓕᓕᐤ ᐁ ᑮ ᒥᔅᑲᐙᑲᓂᐎᑦ ᑭᒋ ᐋᐸᐊᒃ ᓀᔥᑕ ᑭᒋ ᐋᔭᒥᑖᑦ ᒪᓯᓇᐃᑲᓂᓕᐤ, ᐁᑳ ᓀᔥᑕ ᑭᒋ ᑲᓇᐙᐸᑕᒃ᙮ 5ᐯᔭᒃ ᒫᑲ ᐁ ᐃᑕᓯᒋᒃ ᑳ ᓂᑳᓀᓕᑖᑯᓯᒋᒃ ᓂ ᑮ ᐃᑎᒃ, ᐁᑳᐎᓚ ᒫᑐ: ᒫᑎᑲ, ᐊᓇ ᒥᔑᐱᔑᐤ ᐅ ᐯᔭᑯᑌᒥᒃ ᒎᑕ ᑳ ᐅᒌᑦ, ᐁ ᐅᒉᐱᑭᐎ ᑌᐱᑦ, ᑮ ᐸᔅᑭᓛᑫᐤ ᑭᒋ ᐋᐸᐊᒃ ᒪᓯᓇᐃᑲᓂᓕᐤ, ᓀᔥᑕ ᑭᒋ ᐋᐸᐙᑦ ᐊᓂᐃ ᓂᔂᔅ ᐊᑯᔅᑭᐗᓯᑲᓇ᙮
6ᓂ ᑮ ᐃᑖᐱᓐ ᒫᑲ, ᒫᑎᑲ, ᒫᑲ, ᒣᑴᔭᔥ ᐅᑭᒪᐗᐱᐎᓐ, ᓀᔥᑕ ᐊᓂᑭ ᓀᐤ ᐅᐱᒫᑎᓴᒃ, ᒣᑴᔭᔥ ᒫᑲ ᐊᓂᑭ ᑳ ᓂᑳᓀᓕᑖᑯᓯᒋᒃ, ᑮ ᓂᐸᐎᐤ ᒫᓂᔥᒑᓂᔥ ᑖᐱᔅᑯᒡ ᐁ ᑮ ᓂᐸᐋᑲᓂᐎ ᓂᔂᔅ ᐁ ᐅᑦ ᐁᔥᑲᓄᑦ, ᓀᔥᑕ ᓂᔂᔅ ᐁ ᐅᔅᑭᔑᑯᑦ, ᐁᐗᒀᓂᐃ ᓃᔂᔅ ᐅᑦ ᐊᒑᑾ ᑭᒋᒪᓂᑐ ᐁ ᐃᔑᑎᔕᐙᑲᓂᐎᓕᒋ ᒥᓯᐌ ᐊᔅᑮᒃ᙮ 7ᑮ ᐯᒋ ᐃᑐᑌᐤ ᒫᑲ, ᓀᔥᑕ ᑮ ᐅᑎᓇᒻ ᒪᓯᓇᐃᑲᓂᓕᐤ ᐅ ᑭᒋᓂᔅᑭᓕᒃ ᐅᒋ ᐊᓂᐃ ᐅᑭᒪᐗᐱᐎᓂᒃ ᑳ ᐊᐱᓕᒋ᙮ 8ᐃᔅᐱ ᒫᑲ ᐌᑎᓇᒃ ᒪᓯᓇᐃᑲᓂᓕᐤ, ᐊᓂᑭ ᓀᐤ ᐅᐱᒫᑎᓴᒃ ᓀᔥᑕ ᐊᓂᑭ ᓂᔑᑕᓇ ᓀᔥᑕ ᓀᐅᔖᑉ ᑳ ᓂᑲᓀᓕᑖᑯᓯᒋᒃ ᑮ ᐸᑭᔑᓂᔅᑕᐌᐗᒃ ᒫᓂᔥᒑᓂᔑᔕ, ᑕᑐ ᐁ ᐃᑕᓯᒋᒃ ᐁ ᐋᔭᐙᒋᒃ ᔖᑲᓈᐱᑭᑐᒋᑲᓇ, ᓀᔥᑕ ᐅᓴᐎᔔᓕᐋᓈᐱᔉ ᐊᓱᐗᒋᑲᓇ ᐁ ᓵᑲᔅᑭᓀᑭ ᐎᑭᒫᓯᑲᓐ, ᐁᐗᒀᓂᒪ ᐅᑦ ᐋᔭᒥᐋᐎᓂᐗᐗ ᐅᐸᓓᑭᓴᒃ᙮ 9ᑮ ᓂᑲᒧᐗᒃ ᒫᑲ ᐅᔥᑭ ᓂᑲᒧᐎᓂᓕᐤ, ᐁ ᐃᑗᒋᒃ, ᑮ ᑌᐸᑫᓕᑖᑯᓯᓐ ᑭᒋ ᐅᑎᓇᒪᐤ ᒪᓯᓇᐃᑲᓐ, ᓀᔥᑕ ᑭᒋ ᐋᐸᐗᒋᒃ ᐊᑯᔅᑭᐗᓯᑲᓇᒃ: ᐌᓴ ᑭ ᑮ ᓂᐹᐃᑲᐎᓐ, ᓀᔥᑕ ᑭ ᑮ ᐱᒫᒋᐃᓈᓐ ᑭᒋᒪᓂᑐ ᐅᒋ ᑭᒥᑯᒻ ᐅᒋ, ᓇᓈᑲᐤ ᐁ ᐅᑕᔅᑳᓀᓯᔮᒃ, ᓀᔥᑕ ᓇᓇᑲᐤ ᐁ ᐃᔑ ᑭᔗᔮᒃ, ᓀᔥᑕ ᐁ ᐃᓕᓕᐎᔮᒃ, ᓀᔥᑕ ᐁ ᐃᑕᔅᑳᓀᓯᔮᒃ; 10ᓀᔥᑕ ᑭ ᑮ ᐃᔑᐃᓈᓐ ᑭᒋ ᑭᒋᐅᑭᒪᐎᔮᒃ ᓀᔥᑕ ᓵᓵᑭᐎᓕᐌᐎᓕᓕᐎᔮᒃ ᐅᑎᔥᑲᐤ ᓂ ᑭᒋᒪᓂᑐᒥᓈᓐ: ᓂ ᑳ ᑎᐯᓕᒋᑳᓈᓐ ᒫᑲ ᐊᔅᑮᒃ᙮
11ᓂ ᑮ ᐃᑖᐱᓐ ᒫᑲ, ᓂ ᑮ ᐯᑕᒸᓐ ᒫᑲ ᐅ ᐯᑖᑯᓯᐎᓂᐗᐤ ᒥᒉᑦ ᐁᓐᒐᓚᒃ ᐙᔅᑲ ᐅᑭᒪᐗᐱᐎᓂᒃ, ᓀᔥᑕ ᐊᓂᑭ ᐅᐱᒫᑎᓴᒃ, ᓀᔥᑕ ᐊᓂᑭ ᑳ ᓂᑳᓀᓕᑖᑯᓯᒋᒃ: ᑮ ᐃᑕᔑᐗᒃ ᒫᑲ ᒥᑖᑦ ᑭᒋᒥᑕᑐᒥᑕᓇᐗᐤ ᒥᑖᑦ ᑭᒋᒥᑖᑐᒥᑕᓇᐤ, ᓀᔥᑕ ᑭᒋᒥᑖᑐᒥᑕᓇᐗᐤ ᑭᒋᒥᑖᑐᒥᑕᓇᐤ; 12ᐁ ᐃᑗᒋᒃ ᐁ ᑭᔗᐌᒋᒃ, ᑌᐸᑫᓕᑖᑯᓯᐤ ᒫᓂᔥᒑᓂᔑᔥ ᑳ ᑭ ᓂᐸᐋᑲᓂᐎᑦ ᑭᒋ ᒥᓛᑲᓂᐎᑦ ᑲᔥᑭᐅᐎᓂᓕᐤ, ᓀᔥᑕ ᒥᔕᑭᓯᐎᓇ, ᓀᔥᑕ ᑲᑫᑕᐌᓕᑕᒧᐎᓂᓕᐤ, ᓀᔥᑕ ᒪᔥᑲᐎᓯᐎᓂᓕᐤ, ᓀᔥᑕ ᑭᔅᑎᓯᐎᓂᓕᐤ, ᓀᔥᑕ ᑭᔅᑌᓕᑖᑯᓯᐎᓂᓕᐤ, ᓀᔥᑕ ᒥᓦᑭᒥᐌᐎᓂᓕᐤ᙮ 13ᒥᓯᐌ ᑕᑐ ᐊᐌᓇ ᑳ ᐃᑖᑦ ᑭᒋᑭᔑᑯᒃ, ᓀᔥᑕ ᐊᔅᑮᒃ, ᓀᔥᑕ ᐊᑖᒪᔅᑲᒥᒃ, ᓀᔥᑕ ᐊᓂᑭ ᑭᒋᑲᒦᒃ ᑳ ᐃᑖᒋᒃ, ᓀᔥᑕ ᒥᓯᐌ ᐁᑯᑕ ᑳ ᐃᑖᒋᒃ, ᓂ ᑮ ᐯᑕᐙᐗᒃ ᐁ ᐃᑗᒋᒃ, ᒥᓦᑭᒥᐌᐎᓐ, ᓀᔥᑕ ᑭᔅᑎᓯᐎᓐ, ᓀᔥᑕ ᑭᔅᑌᓕᑖᑯᓯᐎᓐ, ᓀᔥᑕ ᑲᔥᑭᐅᐎᓐ, ᑲᑕ ᐎ ᐋᔭᐤ ᐊᓇ ᑳ ᐊᐱᑦ ᐅᑭᒪᐗᐱᐎᓂᒃ, ᓀᔥᑕ ᒫᓂᔥᒑᓂᔑᔥ ᑳᑭᑫ ᓀᔥᑕ ᑳᑭᑫ᙮ 14ᐊᓂᑭ ᓀᐤ ᐅᐱᒫᑎᓴᒃ ᒫᑲ ᑮ ᐃᑗᐗᒃ, ᐁᒣᓐ᙮ ᐊᓂᑭ ᓂᔑᑕᓇᐤ ᓀᔥᑕ ᓀᐅᔖᑉ ᑳ ᓂᑳᓀᓕᑖᑯᓯᒋᒃ ᒫᑲ ᑮ ᐸᑭᔑᓋᒃ ᓀᔥᑕ ᑮ ᓇᐗᑭᔅᑕᐌᐗᒃ ᐊᓂᐃ ᑳ ᐱᒫᑎᓯᓕᒋ ᑳᑭᑫ ᓀᔥᑕ ᑳᑭᑫ᙮
Currently Selected:
ᑭᔅᑫᓕᑖᑯᑖᑫᐎᓐ 5: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
