ᑭᔅᑫᓕᑖᑯᑖᑫᐎᓐ 6
6
ᐊᓂᐃ ᐸᓴᑯᐃᑲᓇ
1ᓂ ᑮ ᐙᐸᑌᓐ ᒫᑲ ᐃᔅᐱ ᒫᓂᔥᒑᓂᔑᔥ ᐃᐋᐸᐊᒃ ᐯᔭᒃ ᐊᑯᔅᑭᐗᓯᑲᓂᓕᐤ, ᓂ ᑮ ᐯᑌᓐ ᒫᑲ ᑖᐱᔅᑯᒡ ᐁ ᐅᓂᒥᔅᑭᑦ ᐁ ᓄᑖᑯᓯᑦ, ᐯᔭᒃ ᐁ ᐃᑕᓯᑭᒃ ᐅᐱᒫᑎᓴᒃ ᐁ ᐃᑗᑦ, ᐯᒋ ᐙᐸᑕ᙮ 2ᓂ ᑮ ᐙᐸᑌᓐ ᒫᑲ, ᒫᑎᑲ ᒫᑲ, ᐁ ᐙᐱᔅᑭᓯᑦ ᒦᔅᑕᑎᒻ: ᐊᓇ ᒫᑲ ᑳ ᑌᑕᐱᑐᑕᐙᑦ ᑮ ᐅᒑᐱᐤ; ᑮ ᒥᓚᐤ ᓀᔥᑕ ᐅᑭᒪᐗᔅᑐᑎᓂᓕᐤ: ᑮ ᑭᑐᑌᐤ ᒫᑲ ᐁ ᔖᑯᒋᐃᐌᑦ ᓀᔥᑕ ᑭᒋ ᔖᑯᒋᐃᐌᑦ᙮
3ᐃᔅᐱ ᒫᑲ ᑳ ᑮ ᐋᐸᐊᒃ ᓂᔓ ᐊᑯᔅᑭᐗᓯᑲᓂᓕᐤ, ᓂ ᑮ ᐯᑕᐗᐤ ᐊᓇ ᓂᔓ ᐅᐱᒫᑎᔅ ᐁ ᐃᑗᑦ, ᐯᒋ ᐙᐸᑕ᙮ 4ᑮ ᐯᒋ ᐃᑐᑌᐤ ᒫᑲ ᑯᑕᒃ ᒥᔅᑕᑎᒻ ᐁ ᒥᑯᓯᑦ: ᑲᔥᑭᐅᐎᓂᓕᐤ ᒫᑲ ᑮ ᒥᓚᐤ ᐊᓇ ᑳ ᑌᑕᐱᑐᑕᐙᑦ, ᐊᔅᑮᒃ ᑭᒋ ᐅᒋ ᐅᑎᓇᒃ ᑳᔭᒣᓕᑕᒧᐎᓂᓕᐤ, ᓀᔥᑕ ᑭᒋ ᓂᐹᐃᑐᓈᓂᐗᒃ: ᑮ ᒥᓚᐤ ᒫᑲ ᑭᒋ ᔑᒫᑲᓂᓕᐤ᙮
5ᐃᔅᐱ ᒫᑲ ᑳ ᑭ ᐋᐸᐊᒃ ᓂᔅᑐ ᐊᑯᔅᑭᐗᓯᑲᓂᓕᐤ, ᓂ ᑮ ᐯᑕᐗᐤ ᐊᓇ ᓂᔅᑐ ᐅᐱᒫᑎᔅ ᐁ ᐃᑗᑦ, ᐯᒋ ᐙᐸᑕ᙮ ᓂ ᑮ ᑲᓇᐙᐸᑌᓐ ᒫᑲ, ᒫᑎᑲ ᒫᑲ ᐁ ᒪᑲᑌᐎᓯᑦ ᒥᔅᑕᑎᒻ; ᐊᓇ ᒫᑲ ᑳ ᑌᑕᐱᑐᑕᐙᑦ ᑮ ᑕᑯᓇᒻ ᐅᒋᒋᒃ ᓂᔓ ᑎᐹᐯᔅᑯᒋᑲᓇ᙮ 6ᓂ ᑮ ᐯᑌᓐ ᒫᑲ ᐯᑖᑯᓯᐎᓐ ᒣᑴᔭᔥ ᐊᓂᑭ ᓀᐤ ᐅᐱᒫᑎᓴᒃ ᐁ ᐃᑗᒪᑲᒃ, ᐯᔭᒃ ᒀᐸᐃᑲᓐ ᐸᑴᔑᑲᓂᒥᓇ ᒦᔅᑯᒡ ᐯᔭᒃ ᔔᓕᐊᐙᐱᔅᑯᔥ, ᓀᔥᑕ ᓂᔅᑐ ᑾᐸᐃᑲᓇ ᐙᐸᓘᒥᓇ ᒥᔅᑯᒡ ᐯᔭᒃ ᔔᓕᐊᐙᐱᔅᑯᔥ; ᐁᑳᐎᓚ ᓀᔥᑕ ᐋᑯᑕ ᒥᔅᑎᑯᐱᒥ ᓀᔥᑕ ᔓᒥᓈᐳ᙮
7ᐃᔅᐱ ᒫᑲ ᑳ ᑮ ᐋᐸᐊᒃ ᓀᐤ ᐊᔅᑯᔅᑭᐗᓯᑲᓂᓕᐤ, ᓂ ᑮ ᐯᑕᒶᓐ ᐅ ᐯᑖᑯᓯᐎᓐ ᐊᓇ ᓀᐤ ᐅᐱᒫᑎᔅ ᐁ ᐃᑗᑦ, ᐯᒋ ᐙᐸᑕ᙮ 8ᓂ ᑮ ᐃᑖᐱᓐ ᒫᑲ, ᒫᑎᑲ ᒫᑲ, ᐁ ᐙᐱᓀᐎᓯᑦ ᒥᔅᑕᑎᒻ: ᐊᓇ ᒫᑲ ᑳ ᑌᑕᐱᑐᑕᐙᑦ ᓂᐱᐎᓐ ᑮ ᐃᔑᓂᑳᑕᐤ, ᑮ ᐱᒥᐎᒉᐅᑯ ᒫᑲ ᒋᐸᐃᐊᔅᑭᓕᐤ᙮ ᑲᔥᑭᐅᐎᓂᓕᐤ ᒫᑲ ᑮ ᒥᓛᐗᒃ ᑭᒋ ᑎᐯᓕᑕᑭᒃ ᓀᐗᔭᒃ ᐃᓕᑯᒃ ᐊᔅᑭᓕᐤ, ᔑᒫᑲᓐ ᑭᒋ ᐅᒋ ᓂᐹᔨᐌᒋᒃ, ᓀᔥᑕ ᑲᐗᑲᑌᐎᓐ ᐅᒋ, ᓀᔥᑕ ᓂᐱᐎᓐ ᐅᒋ, ᓀᔥᑕ ᐊᐌᓯᓴ ᐅᒋ ᐊᔅᑮᒃ ᑳ ᐃᑖᓕᒋ᙮
9ᐃᔅᐱ ᒫᑲ ᑳ ᑭ ᐋᐸᐊᒃ ᓂᔮᓕᓐ ᐊᔅᑯᔅᑭᐗᓯᑲᓂᓕᐤ, ᓂ ᑮ ᐙᐸᒥᒪᐗ ᔑᐹ ᐸᑭᒋᑲᓈᐱᔅᑯᒃ ᐅᑦ ᐊᒑᑯᐙᐗ ᐊᓂᑭ ᑭᒋᒪᓂᑐ ᐅᑦ ᐋᔭᒥᐎᓐ ᑳ ᑭ ᐅᒋ ᓂᐸᐋᑲᓂᐎᒋᒃ, ᓀᔥᑕ ᐊᓂᒪ ᑎᐹᒋᒧᐎᓐ ᐅᒋ ᑳ ᑮ ᒥᒋᒥᓇᑭᒃ: 10ᑮ ᑌᐺᐗᒃ ᒫᑲ ᐁ ᑭᔗᐌᒋᒃ, ᐁ ᐃᑗᒋᒃ, ᑖᓀᓕᑯᒃ, ᐅ ᑌᐯᓕᒋᑫᔭᓐ, ᑳ ᐸᓓᑭᓯᔭᓐ ᓀᔥᑕ ᑳ ᑖᐺᐎᔭᓐ, ᓇᒪ ᓈ ᑮ ᑎᐹᔅᑯᓇᐗᒃ ᓀᔥᑕ ᑭᑦ ᐋᔅᑯᒋᐋᐗᒃ ᓂ ᒥᑯᒥᓈᓐ ᐅᒋ ᐊᓂᑭ ᑳ ᑕᔑᑫᒋᒃ ᐊᔅᑮᒃ? 11ᐙᐱᔅᑭ ᐊᑯᐅᓇ ᒫᑲ ᑮ ᒥᓛᐗᒃ ᒥᓯᐌ ᐁ ᐃᑕᓯᒋᒃ; ᑮ ᐃᑖᑲᓂᐎᐗᒃ ᒫᑲ ᐱᑕᒪ ᑭᒋ ᐋᓜᓯᒋᒃ, ᐃᓕᑯᒃ ᐊᓂᐃ ᐎᒋᐊᑑᔅᑫᓛᑲᓂᐗᐗ ᐊᓯᒋ, ᓀᔥᑕ ᐎᒋᔖᓂᐗᐗ ᑭᒋ ᓂᐹᐃᒥᒋ ᑖᐱᔅᑯᒡ ᐎᓚᐗᐤ ᑫᒋᐙᒃ, ᑭᒋ ᑎᐱᐸᓕᓕᒃ᙮
12ᓂ ᑮ ᐙᐸᑌᓐ ᒫᑲ ᐃᔅᐱ ᑳ ᑭ ᐋᐸᐊᒃ ᓂᑯᑣᔅ ᐊᔅᑯᔅᑭᐗᓯᑲᓂᓕᐤ, ᒫᑎᑲ, ᒫᑲ ᑮ ᑭᒋ ᑶᑾᓐ; ᐱᓯᒻ ᒫᑲ ᑖᐱᔅᑯᒡ ᒫᑲᑌᐎᐱᐌ ᓱᑫᑭᓐ ᑮ ᐊᑎ ᐃᔑᓈᑯᓯᐤ, ᓀᔥᑕ ᑖᐱᔅᑯᒡ ᒥᑯ ᑮ ᐊᑎ ᐃᔑᓈᑯᓯᐤ ᑎᐱᔅᑭᐱᓯᒻ; 13ᐊᒐᑯᔕᒃ ᒫᑲ ᑭᔑᑯᒃ ᑮ ᐸᑭᔑᓋᒃ ᒧᔅᑕᔅᑲᒥᒃ, ᑖᐱᔅᑯᒡ ᔓᒥᓈᑎᒃ ᑳ ᐃᔑ ᐸᑭᑎᑖᑦ ᐅ ᒥᓂᔕ ᐁᑳ ᑳ ᐊᑎᑌᓕᑭ, ᐃᔅᐱ ᐌᐌᐹᔑᑦ ᐁ ᓱᑭᓚᐌᓕᒃ; 14ᑭᔑᒃ ᒫᑲ ᑮ ᑭᑐᑌᐸᓕᐤ ᑖᐱᔅᑯᒡ ᑎᑎᐯᑭᓂᑲᓐ ᐃᔅᐱ ᒥᐋᒪᐎᑎᑎᐃᓂᑳᑌᑭ; ᓀᔥᑕ ᒥᓯᐌ ᑕᑐ ᐗᒋ ᓀᔥᑕ ᒥᓂᔅᑎᒃ ᑮ ᐋᔮᒋᐸᓕᑖᓂᐗᓐ ᐃᑕ ᑳ ᑮ ᐃᑕᔅᑌᑭ ᐅᒋ᙮ 15ᑭᒋᐅᑭᒪᐗᒃ ᒫᑲ ᐊᓐᑕ ᐊᔅᑮᒃ, ᓀᔥᑕ ᑭᒋ ᐃᓕᓕᐗᒃ, ᓀᔥᑕ ᒥᔕᑭᓯᐎᓕᓕᐗᒃ, ᓀᔥᑕ ᑭᒋ ᓇᑐᐸᓕᐎᑭᒪᐗᒃ, ᓀᔥᑕ ᓯᑳᔪᑎᓯᒋᒃ ᐃᓕᓕᐗᒃ, ᓀᔥᑕ ᒥᓯᐌ ᑕᑐ ᐊᐙᑲᓂᐎᓕᓕᐤ, ᓀᔥᑕ ᒥᓯᐌ ᑕᑐ ᑎᐯᓕᒥᑎᓱᐎᓕᓕᐤ, ᑮ ᑳᓱᐗᒃ ᐙᑎᒃ, ᓀᔥᑕ ᐁ ᑲᑭᔅᑖᐱᔅᑳᓕᒃ ᐗᒌᒃ; 16ᑮ ᐃᑕᒶᒃ ᓀᔥᑕ ᐙᒋᔭ ᓀᔥᑕ ᑭᔅᑖᐱᔅᑾ ᐸᑕᑯᔅᑲᐎᓈᓐ ᓀᔥᑕ ᓀᔑᓈᓐ ᐁᑳ ᑭᒋ ᐙᐸᒥᑕᒃ ᐊᓇ ᑳ ᐊᐱᑦ ᐅᑭᒪᐗᐱᐎᓂᒃ, ᓀᔥᑕ ᐅᑦ ᐊᑯᓚᐌᓯᐎᓂᒃ ᐅᒋ ᒫᓂᔥᒑᓂᔑᔥ: 17ᐌᓴ ᐅ ᑭᒋ ᐋᑯᓚᐌᓯᐎᓂ ᑯᔑᑳᒻ ᐋᔕᔾ ᐅᑎᒋᐸᓕᓕᐤ; ᐊᐌᓇ ᒫᑲ ᑫ ᑲᔥᑭᑖᑦ ᑭᒋ ᓂᐸᐎᑦ?
Currently Selected:
ᑭᔅᑫᓕᑖᑯᑖᑫᐎᓐ 6: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
