ᐅᐸᓓᑭᔅ ᓘᒃ 16
16
ᑳ ᓇᑲᒋᑖᑦ ᐅᑭᒪᐤ
1ᑮ ᐃᑌᐤ ᒫᑲ ᐅ ᑭᔅᑭᓄᐊᒪᐗᑲᓇ, ᑮ ᐃᑖᐤ ᐯᔭᒃ ᐁ ᒥᔕᑭᓰᑦ ᐃᓕᓕᐤ, ᑳ ᐋᔭᐙᑦ ᑲᓇᐌᓕᑎᓛᑲᓇ; ᑮ ᐎᑕᒪᐗᐤ ᒫᑲ ᐊᓂᐃ ᐁ ᒫᒥᔑᒫᑲᓂᐎᓕᒋ ᐁ ᑮ ᓂᔑᐗᓈᒋᑖᓕᒋ ᐅᑦ ᐋᔮᓇ᙮ 2ᑮ ᓇᑐᒣᐤ ᒫᑲ, ᓀᔥᑕ ᑮ ᐃᑌᐤ, ᑖᓀᑭ ᐌᒋ ᐯᑕᒫᓐ ᐅᒪ ᐁ ᐃᑖᒋᒥᑲᐎᔭᓐ? ᒧᔐ ᐎᑕᒫᐎᓐ ᑳ ᐃᔑ ᑲᓇᐌᓕᑕᒥᔭᓐ ᓂᑦ ᐋᔮᓇ; ᐌᓴ ᓇᒪᐎᓚ ᑫᔮᐸᒡ ᑭ ᑳ ᑲᓇᐌᓕᑎᓛᑲᓂᐎᓐ᙮ 3ᐁᑯ ᑲᓇᐌᓕᑎᓛᑲᓐ ᐁᑗᑦ ᐅᑌᐃᒃ, ᑖᓂ ᑫ ᑐᑕᒫᓐ? ᐌᓴ ᓂᑦ ᐅᑫᒫᒻ ᓂ ᒪᔅᑲᒥᒃ ᑲᓇᐌᓕᑎᓛᑲᓂᐌᐎᓂᓕᐤ: ᓇᒪᐎᓚ ᓂ ᑮ ᒧᓇᐃᑳᓐ; ᑭᒋ ᐸᑯᔑᐃᐌᔮᓐ ᓂ ᓇᓀᐯᐎᓰᓐ᙮ 4ᒥᑐᓂ ᓂ ᑭᔅᑫᓕᑌᓐ ᑫ ᑐᑕᒫᓐ, ᑭᒋ ᐱᑐᑲᐃᒋᒃ ᐅ ᐙᔅᑳᔨᑲᓂᒥᐙᒃ ᐃᔅᐱ ᐊᔐᔮᔅᑯᓂᑳᐎᔮᓀ ᑲᓇᐌᓕᑎᓛᑲᓂᐌᐎᓕᒃ ᐅᒋ᙮
5ᐁᑯ ᓀᑐᒫᑦ ᒥᓯᐌ ᐊᓂᐃ ᑳ ᒪᓯᓇᐃᑫᔅᑕᐙᓕᒋ ᐅᑦ ᐅᑭᒫᒪ, ᑮ ᐃᑌᐤ ᒫᑲ ᐊᓂᐃ ᓃᔥᑕᒻ, ᑖᓐ ᐃᔥᐱᔥ ᑳ ᒪᓯᓇᐃᑫᔅᑕᐗᑦ ᓂᑦ ᐅᑭᒫᒻ? 6ᑮ ᐃᑗᐤ ᒫᑲ, ᒥᑖᑐᒥᑐᓇᐤ ᑎᐹᔨᑲᓇ ᒥᔅᑎᑯᐱᒥ᙮ ᑮ ᐃᑌᐤ ᒫᑲ, ᐅᑎᓇ ᑭ ᒪᓯᓇᐃᑲᓐ, ᑭᓕᐱ ᓇᐊᐱ ᒫᑲ, ᓀᔥᑕ ᓂᔮᓚᓗᒥᑕᓇᐤ ᒪᓯᓇᐊ᙮ 7ᐁᑯ ᐁᑖᑦ ᑯᑕᑭᔭ, ᑖᓐ ᐃᔥᐱᔥ ᒫᑲ ᑳ ᒪᓯᓇᐃᑫᔭᓐ ᑭᓚ? ᑮ ᐃᑗᐤ ᒫᑲ, ᒥᑖᑐᒥᑕᓇᐤ ᑎᐸᔨᑲᓇ ᐸᑴᔑᑲᓇᒥᓇ᙮ ᑮ ᐃᑌᐤ ᒫᑲ, ᐅᑎᓇ ᑭ ᒪᓯᓇᐃᑲᓐ, ᔮᓇᓀᒥᑕᓇᐤ ᒫᑲ ᒪᓯᓇᐊ᙮
8ᐅᑭᒪᐤ ᒫᑲ ᑮ ᑲᑫᑕᔦᓕᒣᐤ ᐊᓂᐃ ᐁᑳ ᑳ ᒀᔭᔅᑭᑎᓕᒋ ᑲᓇᐌᓕᑎᓛᑲᓇ, ᐁ ᑭ ᑲᑫᑕᐎ ᑐᑕᒥᓕᒋ: ᐌᓴ ᐊᓂᑭ ᑳ ᐅᑕᐙᔑᒥᔑᒥᑯᒋᒃ ᐅᒣᓕᐤ ᐊᔅᑭᓕᐤ ᐊᐙᓯᑌ ᑲᑫᑕᐌᓕᑕᒶᒃ ᐁ ᐋᔮᓂᔅᑫ ᐱᒫᑎᓯᒋᒃ ᐃᔥᐱᔥ ᐊᓂᑭ ᑳ ᐅᑕᐙᔑᒥᔑᒥᑯᒋᒃ ᐙᓭᔮᓯᐎᓂᓕᐤ᙮
9ᑭᑦ ᐃᑎᓇᐗᐤ ᒫᑲ, ᐅᔑᑕᒪᓱᒃ ᐊᐌᓂᑭ ᑭᒋ ᐅᑐᑌᒥᒥᑖᑾᒃ ᒥᔭᓛᑕᒃ ᒥᔕᑭᓯᐎᓐ ᐅᒋ; ᓄᑌᐸᓕᔦᑴ ᑭᒋ ᐱᑐᑲᐃᑖᑾᒃ ᑳᑭᑫ ᑫ ᐃᔑ ᐎᑭᔦᒃ᙮ 10ᐊᓇ ᑳ ᒀᔭᔅᑭᑎᑦ ᐊᓂᐁᓕᐤ ᑳ ᒫᐗᒋ ᐋᐱᔖᔑᓂᓕᒃ ᐅᒋ, ᑲᑕ ᒀᔭᔅᑭᑎᐤ ᓀᔥᑕ ᒥᔅᑕᐃ ᐅᒋ: ᐊᓇ ᒫᑲ ᐁᑳ ᑳ ᒀᔭᔅᑭᑎᑦ ᐊᓂᐁᓕᐤ ᑳ ᒫᐗᒋ ᐋᐱᔖᔑᓂᓕᒃ ᐅᒋ, ᓇᒪᐎᓚ ᒀᔭᔅᑭᑎᐤ ᒥᔅᑕᐃ ᐅᒋ᙮ 11ᑮᔥᐱᓐ ᒫᑲ ᐁᑳ ᑳ ᒀᔭᔅᑭᑎᐌᑴ ᒥᔭᓛᑕᑭ ᒥᔕᑭᓯᐎᓇ ᐅᒋ, ᐊᐌᓇ ᑫ ᑲᓇᐌᓕᑎᓕᑖᒃ ᑖᐺ ᒥᔕᑭᓯᐎᓇ? 12ᑮᔥᐱᓐ ᒫᑲ ᐁᑳ ᑳ ᒀᔭᔅᑭᑎᐌᑴ ᐊᓂᒪ ᑳ ᐅᑦ ᐋᔮᓂᑦ ᑯᑕᒃ ᐃᓕᓕᐤ, ᐊᐌᓇ ᑫ ᒥᓕᑖᒃ ᐊᓂᒪ ᑳ ᑎᐱᓚᐌᐎᓯᔦᒃ?
13ᓇᒪᐎᓚ ᐊᐌᓇ ᐁ ᐊᑑᔅᑫᓛᑲᓂᐎᑦ ᑲᑕ ᑮ ᐊᑐᔅᑲᐌᐤ ᓂᔓ ᐅᑭᒫᐗ: ᐌᓴ ᐯᔭᒃ ᑲᑕ ᐸᒀᑌᐤ, ᓀᔥᑕ ᑯᑕᑭᔭ ᑲᑕ ᓵᑭᐁᐤ; ᓀᔥᑕᐱᑯ ᐯᔭᒃ ᑲᑕ ᑭᔅᑌᓕᒣᐤ, ᑯᑕᑭᔭ ᒫᑲ ᑲᑕ ᐋᑕᐌᓕᒣᐤ, ᓇᒪᐎᓚ ᑭ ᑳ ᑮ ᐊᑐᔅᑫᔅᑕᐙᐗᐤ ᑭᒋᒪᓂᑐ ᓀᔥᑕ ᒥᔕᑭᓯᐎᓐ᙮
ᐋᑎᑦ ᐅᑎᑗᐎᓇ ᒋᓴᔅ
(ᒫᑎᐤ 11:12–13; 5:31–32; ᒫᕐᒃ 10:11–12)
14ᐹᕋᓯᔭᒃ ᒫᑲ, ᑳ ᒧᔅᑌᓇᒫᑫᒋᒃ, ᑭ ᐯᑕᒶᒃ ᒥᓯᐌ ᐅᐅ ᑫᒀᓇ; ᑮ ᐅᔑᓇᐌᐗᒃ ᒫᑲ᙮ 15ᑮ ᐃᑌᐤ ᒫᑲ, ᑭᓚᐗᐤ ᐁᐗᒀᓂᑭ ᑳ ᒥᓗᑡᐌᓕᑖᑯᐃᑎᓱᔦᒃ ᐅᑎᔥᑳᐤ ᐃᓕᓕᐗᒃ, ᒫᑲ ᑭᒋᒪᓂᑐ ᑭᔅᑫᓕᑕᒻ ᑭᑌᐃᐙᐗ: ᐌᓴ ᐊᓂᐁᓕᐤ ᓈᔅᐱᒡ ᑳ ᑭᔅᑌᓕᑕᑭᒃ ᐃᓕᓕᐗᒃ ᒪᒑᐸᑕᒻ ᑭᒋᒪᓂᑐ᙮
16ᐅᓚᔓᐌᐎᓐ ᓀᔥᑕ ᐅᑭᔅᑭᐙᐃᑫᐗᒃ ᑮ ᐃᑖᐗᒃ ᐱᓕᔥ ᒑᓐ: ᐊᔅᐱᓐ ᐁᑯᔅᐱ ᒫᑲ ᑭᒋᒪᓂᑐ ᐅᑦ ᐅᑭᒫᐎᐎᓐ ᐙᐎᒋᑳᑌᓕᐤ, ᒥᓯᐌ ᑕᑐ ᐊᐌᓇ ᒫᑲ ᐎᑳ ᑲᑴ ᐱᑐᑫᐤ᙮ 17ᐊᐙᓯᑌ ᐌᑕᓐ ᑭᔑᒃ ᓀᔥᑕ ᐊᔥᑭ ᑭᒋ ᐳᓂᐸᓕᑭ, ᐃᔥᐱᔥ ᐯᔭᒃ ᒐᑲᐯᐃᑲᓐ ᐅᓚᔓᐌᐎᓂᒃ ᐁᑳ ᑭᒋ ᑎᐱᐸᓕᒃ᙮
18ᐊᐌᓇ ᑫ ᐌᐱᓈᑴ ᐎᐗ, ᓀᔥᑕ ᑯᑕᑭᔭ ᑫ ᐎᑭᒫᑴ, ᑐᑕᒻ ᐱᔑᒀᑎᓯᐎᓂᓕᐤ: ᐊᐌᓇ ᒫᑲ ᑫ ᐎᑭᒫᑴ ᐊᓂᐃ ᑳ ᐌᐱᓂᑯᓕᒋ ᐅ ᓈᐯᒥᓕᐗ, ᑐᑕᒻ ᐱᔑᒀᑎᓯᐎᓂᓕᐤ᙮
ᑳ ᒥᔕᑭᓯᑦ ᓈᐯᐤ ᓀᔥᑕ ᓛᓴᕋᔅ
19ᑮ ᐃᑖᐤ ᐯᔭᒃ ᐁ ᒥᔕᑭᓰᑦ ᐃᓕᓕᐤ, ᑳ ᑭᑭᔥᑲᒃ ᒥᑴᑭᓂᓕᐤ ᓀᔥᑕ ᑳ ᒥᓨᔑᓂᓕᒃ ᐸᐸᑭᐙᔮᓀᑭᓂᓕᐤ, ᓀᔥᑕ ᑮ ᒥᓗᐳ ᑕᑡᐤ ᑳᔑᑳᓕᑭ᙮ 20ᑮ ᐃᑖᐤ ᓀᔥᑕ ᐯᔭᒃ ᐅᐸᑯᔑᐃᐌᐤ ᓛᓴᕋᔅ ᐁ ᐃᔑᓂᑳᓱᑦ, ᑳ ᐱᒥᔑᒫᑲᓂᐎᑦ ᐅᑦ ᐃᔥᒀᑌᒥᓕᒃ ᒥᓯᐌ ᐁᔅᐱᔑᓚᐌᑦ ᐁ ᐅᒥᑭᑦ, 21ᐁ ᓇᑕᐌᓕᑕᒃ ᒫᑲ ᑭᒋ ᐊᔕᒫᑲᓂᐎᑦ ᐱᐗᒋᑲᓇ ᑳ ᐸᑭᑎᓂᓕᑭ ᐁ ᒥᔕᑭᓯᓕᒋ ᐃᓕᓕᐗ ᐅ ᒥᒋᓱᓈᑎᑯᓕᒃ ᐅᒋ; ᐊᑎᒶᒃ ᓀᔥᑕ ᑮ ᐯᒋ ᓄᒀᑕᒬᐗᒃ ᐁ ᐅᒥᑭᓕᒋ᙮
22ᑮ ᐃᑭᓐ ᒫᑲ, ᐁ ᑮ ᓂᐱᑦ ᐅᐸᑯᔑᐃᐌᐤ, ᐁᓐᒐᓚ ᒫᑲ ᑮ ᐃᔑᐎᓕᑯ ᐁᑉᕃᐊᒪ ᐅ ᐱᓗᒧᐎᓂᓕᒃ: ᑳ ᒥᔕᑭᓯᑦ ᐃᓕᓕᐤ ᓀᔥᑕ ᑮ ᓂᐱᐤ, ᓀᔥᑕ ᑮ ᓇᐃᑲᐗᐤ; 23ᒪᒋ ᐃᔥᑯᑌᒃ ᒫᑲ, ᑮ ᐅᐹᐱᐤ ᓈᔅᐱᒡ ᐁ ᐎᓴᑳᑭᓱᑦ, ᐙᐸᒣᐤ ᒫᑲ ᐁᑉᕃᐊᒪ ᐁ ᓚᐎᓈᑯᓯᓕᒋ, ᓀᔥᑕ ᓛᓴᕋᓴ ᐅ ᐱᓗᒧᐎᓂᓕᒃ᙮ 24ᑮ ᑌᐺᐤ ᒫᑲ, ᐁ ᐃᑗᑦ, ᓄᑖ ᐁᑉᕃᐋᒻ, ᔕᐌᓕᒥᓐ: ᐯᒋᑎᔕᐤ ᒫᑲ ᓛᓴᕋᔅ, ᑭᒋ ᑭᑖᓇᒃ ᐅ ᓕᓕᑭᒋᒑᓐ ᐁ ᐗᓇᔅᒀᓕᒃ ᓂᐱᒃ, ᓀᔥᑕ ᑭᒋ ᑕᑲᐹᐗᑖᑦ ᓂᑌᓚᓕᓕᐤ; ᐌᓴ ᓂ ᐎᓴᑫᓕᑕᒥᐃᑳᐎᓐ ᐅᑕ ᐁ ᐗᓚᑌᒃ᙮
25ᒫᑲ ᐁᑉᕃᐋᒻ ᑮ ᐃᑗᐤ, ᓂᑯᓯᔅ, ᑭᔅᑭᓯ, ᑭᓚ ᒣᒀᒡ ᑳ ᐱᒫᑎᓯᔭᓐ ᑭ ᑮ ᒥᓕᑳᐎᓐ ᒥᓗ ᑫᒀᓇ, ᓀᔥᑕ ᓛᓴᕋᔅ ᒪᒋ ᑫᒀᓇ: ᐊᓄᒡ ᒫᑲ ᐎᓚ ᒥᓜᓕᒧᐋᑲᓂᐎᐤ, ᑭᓚ ᒫᑲ ᑭ ᐎᓴᑫᓕᑕᒥᐃᑲᐎᓐ᙮ 26ᑫᔮᐸᒡ ᒫᑲ ᐊᐙᓯᑌ ᒥᓯᐌ ᐅᒪ ᑕᔅᑕᐎᒡ ᓂᓚᓈᓐ ᓀᔥᑕ ᑭᓚ ᐃᑕᑾᓐ ᐁ ᒥᔖᒃ ᐋᑕᑳᒣᔑᓄᐎᓐ: ᐁᐗᑯ ᐅᒋ ᐊᓂᑭ ᐅᑕ ᑳ ᐎ ᐅᑐᑌᒋᒃ ᑭᒋ ᓈᑎᑖᑾᒃ ᓇᒪᐎᓚ ᑮ ᑐᑕᒶᒃ; ᓇᒪ ᓀᔥᑕ ᓂ ᑮ ᓈᑎᑯᓈᓇᒃ ᐊᓂᑭ ᐊᓐᑕ ᑳ ᐎ ᐯᒋ ᐅᑐᑌᒋᒃ᙮ 27ᐁᑯ ᐁᑗᑦ, ᑭ ᓇᑐᑕᒫᑎᓐ ᒫᑲ, ᓄᑖ, ᑭᒋ ᐃᔑᑎᔕᐗᑦ ᓄᑖᐎᔭ ᐅ ᐙᔅᑲᔨᑲᓂᒥᓕᒃ: 28ᐌᓴ ᓂᔮᓚᓕᐗᒃ ᓂᒋᔖᓇᒃ; ᑭᒋ ᐃᑖᒋᒧᔅᑕᐙᑦ, ᐁᑳ ᐎᓚᐗᐤ ᐊᓯᒋ ᐅᑕ ᑭᒋ ᐯᒋ ᐃᑐᑌᒋᒃ ᐃᑕ ᐁ ᐙᐎᓴᑫᓕᒋᑳᑌᒃ᙮
29ᐁᑉᕃᐋᒻ ᐃᑌᐤ, ᐋᔭᐌᐗᒃ ᒧᓯᓴ ᓀᔥᑕ ᐅᑭᔅᑭᐙᐃᑴᐊ: ᑳᔮᒻ ᐊᓂᐃ ᑲᑕ ᓇᑐᑕᐌᐗᒃ᙮ 30ᑮ ᐃᑗᐤ ᒫᑲ, ᓇᒪᐎᓚ, ᓄᑖ ᐁᑉᕃᐋᒻ: ᑮᔥᐱᓐ ᒫᑲ ᓇᑕᐙᐸᒥᑯᑣᐌ ᐊᐌᓕᐗ ᑳ ᓂᐱᓕᒋ ᐅᒋ, ᑲᑕ ᑴᔅᑳᑎᓯᐗᒃ᙮ 31ᑮ ᐃᑌᐤ ᒫᑲ, ᑮᔥᐱᓐ ᐁᑳ ᓇᑐᑕᐙᑡᐌ ᒧᓯᓴ ᓀᔥᑕ ᐅᑭᔅᑭᐙᐃᑫᐗ, ᓇᒪᐎᓚ ᓀᔥᑕ ᑲᑕ ᔖᑯᒋᒫᐗᒃ ᐋᑕ ᐁ ᑮ ᐗᓂᔥᑳᓕᒋ ᐊᐌᓕᐗ ᐅᓂᐱᐗ ᐅᒋ᙮
Currently Selected:
ᐅᐸᓓᑭᔅ ᓘᒃ 16: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
