ᐅᐸᓓᑭᔅ ᓘᒃ 15
15
ᑳ ᐗᓂᔑᒃ ᒫᓂᔥᒑᓂᔥ
(ᒫᑎᐤ 18:12–14)
1ᐁᑯ ᐱᐁᒋ ᓈᑎᑯᑦ ᒥᓯᐌ ᐸᑉᓕᑳᓇ ᓀᔥᑕ ᐅᒪᒋᑣᐗ ᑭᒋ ᐯᑖᑯᑦ᙮ 2ᐸᕋᓯᔭᒃ ᒫᑲ ᓀᔥᑕ ᐅᒪᓯᓇᐃᑫᐗᒃ ᑮ ᐗᔑᔥᑕᐌᓕᑕᒶᒃ, ᐁ ᐃᑗᒋᒃ, ᐊᐗ ᐃᓕᓕᐤ ᐅᑎᓀᐤ ᐅᒪᒋᑣᐗ, ᓀᔥᑕ ᐎᒋᒥᒋᓱᒣᐤ᙮ 3ᑮ ᐃᑌᐤ ᒫᑲ ᐅᒣᓕᐤ ᓇᔅᐱᑐᐌᐎ ᐋᑕᓗᑳᓂᓕᐤ, ᐁ ᐃᑗᑦ,
4ᑫᑯ ᐃᓕᓕᐤ ᐁ ᐃᑕᔑᔦᒃ, ᐁ ᐋᔭᐙᑦ ᒥᑖᑐᒥᑕᓇᐤ ᒫᓂᔥᒑᓂᔕ, ᑮᔥᐱᓐ ᒫᑲ ᐗᓂᐋᑦ ᐯᔭᒃ, ᓇᒪ ᓈ ᓇᑲᑌᐤ ᐊᓂᐃ ᔖᑭᑖᑐᒥᑕᓇᐤ ᔖᑭᑖᑐᔖᑉ ᓀᔥᑕ ᐸᑾᑕᔅᑲᒥᑳᒃ, ᑭᒋ ᓇᑕᐙᐸᒫᑦ ᐊᓂᐃ ᑳ ᐗᓂᔑᓂᓕᒋ ᐹᑎᒫ ᒥᔅᑲᐙᑌ? 5ᐃᔅᐱ ᒫᑲ ᑳ ᒥᔅᑲᐙᑦ, ᐊᓓᐤ ᐅᑎᑎᒪᓂᒃ ᐁ ᒥᓚᐙᑕᒃ᙮ 6ᐃᔅᐱ ᒫᑲ ᐱᐁᒋ ᑕᑯᔑᑭ ᐎᑭᒃ, ᒫᒪᐎ ᓇᑐᒣᐤ ᐅ ᑐᑌᒪ ᓀᔥᑕ ᐎᒋᐃᓕᓕᐗ, ᐁ ᐃᑗᑦ, ᐎᒋᒥᓚᐙᑕᒧᒥᒃ; ᐌᓴ ᓂ ᑮ ᒥᔅᑲᐗᐤ ᓂ ᒫᓂᔥᒑᓂᔒᒻ ᑳ ᑮ ᐗᓂᔑᒃ᙮ 7ᑭᑦ ᐃᑎᓇᐗᐤ, ᐁᑯ ᑖᐱᔅᑯᒡ ᓀᔥᑕ ᑫ ᐃᑕᑾᒃ ᒥᓚᐙᑕᒧᐎᓐ ᑭᒋᑭᔑᑯᒃ ᐯᔭᒃ ᐅᒪᒋᑣᐤ ᐅᒋ ᐁ ᑴᔅᑳᑎᓰᑦ, ᐊᐙᓯᑌ ᐃᔥᐱᔥ ᔖᑭᑖᑐᒥᑕᓇᐤ ᔖᑭᑖᑐᔖᑉ ᓀᔥᑕ ᑳ ᒀᔭᔅᑭᑎᒋᒃ ᐃᓕᓕᐗᒃ ᐅᒋ, ᐁᑳ ᑳ ᓇᑕᐌᓕᑕᑭᒃ ᑴᔅᑳᑎᓯᐎᓂᓕᐤ᙮
ᑳ ᐗᓂᐋᑲᓂᐎᑦ ᔓᓕᔭᓈᐱᔉ
8ᓀᔥᑕᐱᑯ ᑫᑯ ᐃᔅᑴᐤ ᐁ ᐋᔭᐙᑦ ᒥᑖᑦ ᐙᐱᓯ ᔔᓕᐊᓈᐱᔅᑾ, ᑮᔥᐱᓐ ᐗᓂᐋᑦ ᐯᔭᒃ, ᓇᒪ ᓈ ᓴᔅᑲᐊᒻ ᐙᔅᑌᓇᒫᑲᓂᓕᐤ, ᓀᔥᑕ ᐁ ᐌᐹᐃᑫᑦ ᐙᔅᑳᔨᑲᓂᒃ, ᓱᑲ ᓈᓇᑕᐙᐸᒣᐤ ᐹᑎᒫ ᒥᔅᑲᐙᑌ? 9ᐃᔅᐱ ᒫᑲ ᑳ ᒥᔅᑲᐙᑦ, ᒫᒪᐎ ᓇᑐᒣᐤ ᐅ ᑐᑌᒪ ᓀᔥᑕ ᐎᒋᐃᓕᓕᐗ, ᐁ ᐃᑗᑦ, ᐎᒋᒥᓚᐙᑕᒧᒥᒃ; ᐌᓴ ᓂ ᑮ ᒥᔅᑲᐗᐤ ᐊᓇ ᑳ ᑮ ᐗᓂᐊᒃ᙮ 10ᐁᑯ ᑖᐱᔅᑯᒡ, ᑭᑦ ᐃᑎᓇᐗᐤ, ᐃᑕᑾᓐ ᒥᓚᐙᑕᒧᐎᓐ ᐃᑕ ᐁ ᐃᑖᓕᒋ ᑭᒋᒪᓂᑐ ᐁᓐᒐᓕᒪ ᐯᔭᒃ ᐅᒪᒋᑣᐤ ᐅᒋ ᐁ ᑴᔅᑳᑎᓯᑦ᙮
ᑳ ᐗᓂᔑᒃ ᐅᑯᓯᓯᒫᐤ
11ᑮ ᐃᑗᐤ ᒫᑲ, ᐯᔭᒃ ᐃᓕᓕᐤ ᑮ ᓂᔑᓕᐗ ᐅᑯᓯᓴ: 12ᐊᓇ ᒫᑲ ᐌᔑᒥᒫᐎᑦ ᑮ ᐃᑌᐤ ᐅᑖᐎᔭ, ᓄᑖ, ᒥᓕᓐ ᐊᓂᐃ ᑫᒀᓇ ᑫ ᐋᓂᔅᑫ ᑎᐱᓚᐌᐎᓯᔮᓐ᙮ ᑮ ᓂᔓᑐᐌᐤ ᒫᑲ ᐅ ᑎᐱᓚᐌᐎᓯᐎᓐ᙮ 13ᓇᒪᐎᓚ ᒫᑲ ᒥᒉᑐ ᑭᔑᑳᐗ ᐃᓕᑯᒃ, ᐊᓇ ᐌᔑᒥᒫᐎᑦ ᑮ ᒫᒪᐎ ᒪᐗᒋᑕᐤ ᒥᓯᐌ, ᓀᔥᑕ ᑮ ᑭᑐᑌᐤ ᐊᔅᑭᒃ ᐗᓚᐤ ᐁ ᐃᑐᑌᑦ, ᐁᑯᑕ ᒫᑲ ᒥᐁᔅᑎᓇᒃ ᐅ ᑎᐱᓚᐌᐎᓯᐎᓐ ᐁ ᑮᔥᑴᐎ ᐱᒪᑎᓰᑦ᙮ 14ᐃᔅᐱ ᒫᑲ ᑳ ᒣᔅᑎᓇᒃ ᒥᓯᐌ, ᑮ ᐊᑎ ᑭᒋ ᑲᐗᑲᑖᓂᐗᓐ ᐊᓂᒪ ᐊᔅᑮᒃ; ᑮ ᐊᑎ ᐙᐙᓂᓯᐤ ᒫᑲ᙮ 15ᑮ ᓇᑕᐎ ᐎᒋᑕᔑᑫᒣᐤ ᒫᑲ ᐯᔭᒃ ᐊᓂᐃ ᑳ ᐃᑖᓕᒋ ᐊᓂᒪ ᐊᔅᑮᒃ; ᑮ ᐃᔑᑎᔕᐅᑯ ᒫᑲ ᐅ ᓂᑖᐎᑭᒋᑲᓂᓕᒃ ᑭᒋ ᐊᔕᒫᑦ ᑯᑯᔕ᙮ 16ᑮ ᐎ ᑮᔥᐳᐃᑎᓱ ᒫᑲ ᐸᑾᓐᑕᐤ ᒥᓂᔕ ᐅᒋ ᑳ ᒥᒋᓕᒋ ᑯᑯᔕ: ᓇᒪᐎᓚ ᐊᐌᓕᐗ ᒫᑲ ᐅᒋ ᒥᓕᑯ ᑫᒀᓕᐤ᙮ 17ᐃᔅᐱ ᒫᑲ ᑳᐌᔦᓕᑕᒃ, ᑮ ᐃᑗᐤ, ᐙ ᒥᒉᑎᒋᒃ ᐊᑑᔅᑫᓛᑲᓇᒃ ᑳ ᐋᐸᒋᐃᑯᒋᒃ ᓄᑖᐎᔭ ᐁ ᑌᐱ ᐋᔭᐙᒋᒃ ᐊᓚᑲᓇᐗ, ᓀᔥᑕ ᐊᐙᓯᑌ, ᓂᓚ ᒫᑲ ᓂ ᓂᔑᐗᓈᑎᓰᓐ ᐁ ᑲᐗᑲᑌᔮᓐ! 18ᓂ ᑳ ᐸᓯᑯᓐ, ᓀᔥᑕ ᓂ ᑳ ᓇᑕᐙᐸᒪᐤ ᓄᑖᐎ, ᓂ ᑳ ᐃᑕᐤ ᒫᑲ, ᓄᑖ, ᓂ ᑮ ᒪᒋᑐᑕᐗᐤ ᐊᓇ ᑭᒋᑭᔑᑯᒃ ᑳ ᐃᑖᑦ, ᓀᔥᑕ ᑭᓚ ᐁ ᐃᔑ ᐙᐸᒥᔭᓐ, 19ᓇᒪᐎᓚ ᒫᑲ ᑫᔮᐸᒡ ᓂ ᑌᐸᑫᓕᑖᑯᓯᓐ ᑭᑯᓯᔅ ᑭᒋ ᐃᑎᑳᐃᔮᓐ: ᐃᔑᐃᓐ ᑖᐱᔅᑯᒡ ᐯᔭᒃ ᑭᑦ ᐊᑑᔅᑫᓛᑲᓇᒃ ᑳ ᐋᐸᒋᐊᒋᒃ᙮ 20ᑮ ᐸᓯᑯ ᒫᑲ, ᓀᔥᑕ ᑮ ᐯᒋ ᓈᑌᐤ ᐅᑖᐎᔭ᙮
ᒫᑲ ᒣᒀᒡ ᐃᔥᑾ ᐁ ᓛᐎᓈᑯᓯᑦ, ᑮ ᐙᐸᒥᑯ ᐅᑖᐎᔭ, ᑮ ᑭᑎᒫᑫᓕᒥᑯ ᒫᑲ, ᓀᔥᑕ ᑮ ᐸᑭᔑᓂᓕᐗ ᐅᒀᔮᒃ ᓀᔥᑕᑮ ᐅᒉᒥᑯ᙮ 21ᐅᑯᓯᓯᒫᐤ ᒫᑲ ᑮ ᐃᑌᐤ, ᓄᑖ, ᓂ ᑮ ᒪᒋᑐᑕᐗᐤ ᐊᓇ ᑭᒋᑭᔑᑯᒃ ᑳ ᐃᑖᑦ ᓀᔥᑕ ᑭᓚ ᐁ ᐃᔑ ᐙᐸᒥᔭᓐ, ᓇᒪ ᓀᔥᑕ ᑫᔮᐸᒡ ᓂ ᑌᐸᑫᓕᑖᑯᓯᓐ ᑭᑯᓯᔅ ᑭᒋ ᐃᑎᑳᐎᔮᓐ᙮ 22ᒫᑲ ᐅᑖᐎᒪᐤ ᑮ ᐃᑌᐤ ᐅᑦ ᐊᑐᔅᑫᓛᑲᓇ, ᐅᑕ ᐯᑖᒃ ᒥᔭᐗᒋ ᒥᓨᔑᒃ ᐊᑯᐅᓐ, ᐳᔅᑎᔥᑲᒧᑎᓕᒃ ᒫᑲ; ᑭᑲᒧᐃᒃ ᒫᑲ ᐅᒋᒌᒃ ᑖᐱᒋᒉᐱᓱᓐ, ᓀᔥᑕ ᐳᔅᑕᔅᑭᓯᓇᐃᒃ ᐅᓯᑎᒃ: 23ᐅᑕ ᓀᔥᑕ ᐯᔑᒃ ᒥᔅᑐᔑᔥ ᑳ ᑖᒋᐳᐋᑲᓂᐎᑦ, ᓂᐸᐃᒃ ᒫᑲ; ᐁᑯᔑ ᒫᑲ ᒥᒋᓱᑕᐤ, ᓀᔥᑕ ᒧᒋᑫᓕᑖᑕᐤ᙮ 24ᐌᓴ ᐊᐗ ᓂᑲᓯᔅ ᑮ ᓂᐱᐤ, ᒥᓇ ᒫᑲ ᐱᒫᑎᓯᐤ; ᑮ ᐗᓂᐊᐤ, ᒥᔅᑲᐗᐤ ᒫᑲ᙮ ᐁᑯ ᒥᐋᒋ ᒧᒋᑫᓕᑕᑭᒃ᙮
25ᐅᑯᓯᓴ ᒫᑲ ᑳ ᐅᔅᑌᓯᒪᐎᓕᒋ ᑮ ᐃᑖᓕᐗ ᓂᑖᐎᑭᒋᑲᓂᒃ: ᐁ ᐯᒋ ᐯᔣᐸᑕᒃ ᒫᑲ ᐙᔅᑳᔨᑲᓂᓕᐤ, ᑮ ᐯᑕᒻ ᐁ ᑭᑐᒋᑳᓂᐗᓂᓕᒃ ᓀᔥᑕ ᐁ ᓂᒥᓈᓂᐗᓂᓕᒃ᙮ 26ᑮ ᓇᑐᒣᐤ ᒫᑲ ᐯᔭᒃ ᐊᑑᔅᑫᓛᑲᓇ, ᑮ ᑲᑴᒋᑫᒧ ᒫᑲ ᑫᒀᓐ ᐌᒋ ᐅᒪ ᐃᔑ ᐋᔨᑎᓈᓂᐗᒃ᙮ 27ᑮ ᐃᑎᑯ ᒫᑲ, ᑭᔒᒻ ᑕᑯᔑᓐ: ᑯᑖᐎ ᒫᑲ, ᐁ ᑮ ᐅᑎᓈᑦ ᐁ ᐱᒫᒋᐅᓕᒋ ᓀᔥᑕ ᐁ ᒥᓗᒪᒋᐅᓕᒋ, ᑮ ᓂᐸᐁᐤ ᒥᔅᑐᔑᔕ ᑳ ᑖᒋᐳᐋᑲᓂᐎᓕᒋ᙮
28ᑮ ᑭᓯᐙᓯᐤ ᒫᑲ, ᓇᒪᐎᓚ ᓀᔥᑕ ᐎ ᐱᑐᑫᐤ: ᐁᐗᑯ ᐌᒋ ᐯᒋ ᐗᓚᐎᓕᒋ ᐅᑖᐎᔭ, ᓀᔥᑕ ᑮ ᐋᔨᑲᒥᒥᑯ᙮ 29ᐁ ᓇᔥᑴᐗᔑᐋᑦ ᒫᑲ ᐅᑖᐎᔭ ᑮ ᐃᑌᐤ, ᒫᑎᑲ, ᐅᐅ ᒥᒉᑦ ᐱᐴᓋ ᑭᑦ ᐊᑑᔅᑳᑎᓐ, ᓇᒪᐎᔅᑳᑦ ᓀᔥᑕ ᓂ ᑮ ᐗᓂᑐᑌᓐ ᑳ ᐃᑕᔓᐌᔭᓐ: ᐁᓕᐌᒃ ᒫᑲ ᓇᒪᐎᔅᑳᑦ ᑭ ᐅᒋ ᒥᓕᓐ ᐃᔥᐱᔥ ᐯᔭᒃ ᑯᑎᔑᔥ ᑭᒋ ᐎᒋᒧᒋᑫᓕᑕᒥᒪᑭᒃ ᓂ ᑐᑌᒪᒃ; 30ᒫᑲ ᐎᐸᒡ ᑳ ᐯᒋ ᑕᑯᔑᒃ ᐊᐗ ᑭᑯᓯᔅ ᑳ ᑭ ᒣᔅᑎᓇᒃ ᑭ ᑎᐱᓚᐌᐎᓯᐎᓂᓕᐤ ᐁ ᐎᒉᐙᑦ ᐱᔑᒀᑎᔅᑴᐗ, ᑭ ᑮ ᓂᐸᑕᒪᐗᐤ ᒥᔅᑐᔑᔕ ᑮ ᑖᒋᐳᐋᑲᓂᐎᓕᒋ᙮ 31ᑮ ᐃᑎᑯ ᒫᑲ, ᓂᑯᓯᔅ, ᒧᔕᒃ ᑭ ᐎᒋᑕᔑᑫᒥᓐ, ᓀᔥᑕ ᒥᓯᐌ ᑳ ᐋᔮᔮᓐ ᑭᓚ ᑭ ᑎᐱᓚᐌᐎᓰᓐ᙮ 32ᑮ ᑌᐱᐃᔑᓈᑾᓐ ᒫᑲ ᑭᒋ ᒧᒋᑫᓕᑕᒫᒃ, ᓀᔥᑕ ᑭᒋ ᓯᑭᓓᓯᔮᒃ: ᐌᓴ ᐊᐗ ᑭᔑᒻ ᑮ ᓂᐱᐤ, ᒥᓇ ᒫᑲ ᐱᒫᑎᓯᐤ; ᓀᔥᑕ ᑮ ᐗᓂᐊᐤ ᒥᔅᑲᐗᐤ ᒫᑲ᙮
Currently Selected:
ᐅᐸᓓᑭᔅ ᓘᒃ 15: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
