ᓂᔓ ᒑᓐ 1
1
1ᓂᓚ ᑳ ᓂᑳᓀᓕᑖᑯᓯᔮᓐ ᐁ ᒪᓯᓇᐊᒪᐗᒃ ᐊᓇ ᑳ ᐙᐌᓛᐸᒫᑲᓂᐎᑦ ᐅᑭᒫᔅᑴᐤ ᓀᔥᑕ ᐅᑦ ᐊᐙᔑᒥᔕ, ᑳ ᓵᑭᐊᑭᒃ ᑖᐺᐎᓂᒃ; ᓇᒪᐎᓚ ᓂᓚ ᐱᑯ, ᐊᓯᒋ ᒫᑲ ᒥᓯᐌ ᐊᓂᑭ ᑳ ᑮ ᑭᔅᑫᓕᑕᑭᒃ ᑖᐺᐎᓂᓕᐤ; 2ᑖᐺᐎᓐ ᐅᒋ ᑳ ᐱᒋᔅᑳᑯᔭᒃ, ᓀᔥᑕ ᑳᑭᑫ ᑫ ᐎᒉᐎᑯᔭᒃ᙮
3ᔕᐌᓕᒋᑫᐎᓐ ᑭ ᑳ ᐎᒉᐎᑯᓇᐗᐤ, ᑭᑎᒫᑫᓕᒋᑫᐎᓐ, ᓀᔥᑕ ᑳᔮᒣᓕᑕᒧᐎᓐ, ᑭᒋᒪᓂᑐ ᐌᐅᑖᐎᒪᐎᑦ ᐅᒋ, ᓀᔥᑕ ᐅᑎᐯᓕᒋᑫᐤ ᒋᓴᔅ ᙭ ᐅᒋ, ᐅᑯᓯᓴ ᐌᐅᑖᐎᒪᐎᑦ, ᑖᐺᐎᓂᒃ ᓀᔥᑕ ᓵᑭᐃᐌᐎᓂᒃ᙮
ᑖᐺᐎᓐ ᓀᔥᑕ ᓵᑭᐃᐌᐎᓐ
4ᓈᔅᐱᒡ ᓂ ᑮ ᒥᓚᐙᑌᓐ ᐁ ᑮ ᒥᔅᑲᐗᑭᒃ ᑭᑦ ᐊᐙᔑᒥᔕᒃ ᐁ ᐱᒧᑌᒋᒃ ᑖᐺᐎᓂᒃ, ᑳ ᑮ ᐃᑕᔓᐙᑎᑕᒃ ᐅᑖᐎᒪᐤ᙮ 5ᐊᓄᒡ ᒫᑲ ᑭ ᐸᑯᓭᓕᒥᑎᓐ, ᐅᑭᒫᔅᑴᐤ, ᓇᒪᐎᓚ ᒫᑲ ᐱᑯ ᐅᔥᑭ ᑲᑫᔅᑴᐎᓐ ᐁ ᒪᓯᓇᐊᒫᑖᓐ, ᒫᑲ ᐊᓂᒪ ᓃᔥᑕᒻ ᐅᒋ ᑳ ᑮ ᐋᔮᔭᒃ, ᑭᒋ ᓵᑭᐃᑐᔭᒃ᙮ 6ᐅᒪ ᒫᑲ ᐁᐗᑯ ᓵᑭᐃᐌᐎᓐ, ᑭᒋ ᓄᔅᐱᓈᑕᒶᒃ ᐅ ᑲᑫᔅᑴᐎᓇ᙮ ᐅᒪ ᐁᐗᑯ ᑲᑫᔅᑴᐎᓐ, ᑖᐱᔅᑯᒡ ᑳ ᑮ ᐃᔑ ᐯᑕᒣᒃ ᓃᔥᑕᒻ ᐅᒋ, ᐁᑯᑕ ᑭᒋ ᐱᒧᑌᔦᒃ᙮
7ᐌᓴ ᒥᒉᑦ ᐅᑲᑳᔦᓕᓰᔅᑲᒃ ᑮ ᐯᒋ ᐃᑐᑌᐗᒃ ᐊᔅᑮᒃ, ᐁᑳ ᑳ ᐎᑕᑭᒃ ᒋᓴᔅ ᙭ᑕ ᐁ ᐯᒋ ᑕᑯᔑᓂᓕᒋ ᐎᔮᓯᒃ᙮ ᐊᐗ ᐁᐗᑯ ᐅᑲᑳᔦᓕᓯᐃᐌᔉ ᓀᔥᑕ ᓇᔅᐹᒡ ᙭᙮ 8ᑲᓇᐗᐸᒥᑎᓱᒃ, ᐁᑳ ᑭᒋ ᐗᓂᑖᔭᒃ ᐊᓂᐃ ᑫᒀᓇ ᑳ ᑮ ᑲᔥᑭᑖᔭᒃ, ᒫᑲ ᑭᒋ ᐅᑎᓇᒪᒃ ᒥᑐᓂ ᑎᐸᐊᒫᑯᓯᐎᓐ᙮
9ᐊᐌᓇ ᐌᓂᑐᑕᒧᑴ, ᓀᔥᑕ ᐁᑳ ᑌᔑᑫᐙᑴ ᐅ ᑭᔅᑭᓄᐊᒫᑫᐎᓂᒃ ᙭, ᓇᒪᐎᓚ ᐋᔭᐌᐤ ᑭᒋᒪᓂᑐᐗ᙮ ᐊᓇ ᑳ ᑕᔑᑫᐙᑦ ᐅ ᑭᔅᑭᓄᐊᒫᑫᐎᓂᒃ ᙭, ᐋᔭᐌᐤ ᐊᓯᒋ ᐅᑖᐎᒪᐗ ᓀᔥᑕ ᐅᑯᓯᓯᒪᐗ᙮ 10ᑮᔥᐱᓐ ᐯᒋ ᓈᑎᑖᑴ ᐊᐌᓇ ᐁᑳ ᐁ ᐯᑖᑦ ᐅᒣᓕᐤ ᑭᔅᑭᓄᐊᒫᑫᐎᓂᓕᐤ, ᐁᑳᐎᓚ ᐱᑐᑲᐃᒃ ᑭᑭᐙᒃ, ᐁᑳᐎᓚ ᓀᔥᑕ ᐎᑕᒫᒃ ᑭᒋ ᒥᓨᐸᒣᐎᓯᑦ᙮ 11ᐌᓴ ᐊᓇ ᑳ ᐎᑕᒪᐙᑦ ᑭᒋ ᒥᓨᐸᒣᐎᓯᓕᒋ ᐎᒋᐁᐤ ᐅ ᒪᒋ ᐃᔑᒋᑫᐎᓂᓕᒃ᙮
ᒫᒋᒡ ᐊᔭᒥᐎᓇ
12ᐁ ᐋᔮᔮᓐ ᒥᒉᑦ ᑫᒀᓇ ᑭᒋ ᒪᓯᓇᐊᒫᑕᑾᒃ, ᓇᒪᐎᓚ ᓂ ᑳ ᐎᑌᓐ ᐁ ᐋᐸᒋᑖᔮᓐ ᒪᓯᓇᐃᑲᓍᓐ ᓀᔥᑕ ᒪᓯᓇᐃᑲᓇᐳ: ᒫᑲ ᓂ ᐸᑯᓭᓕᑌᓐ ᑭᒋ ᓈᑎᑖᑾᒃ, ᐁᑯ ᑭᑐᓂᓈᒃ ᑭᒋ ᐋᔭᒥᐃᑐᔭᒃ, ᑭ ᒥᓚᐙᑕᒧᐎᓂᐗᐤ ᑭᒋ ᓵᑲᔅᑭᓀᒃ᙮
13ᐅᑦ ᐊᐙᔑᒥᔕ ᑳ ᐙᐌᓛᐸᒫᑲᓂᐎᑦ ᑭᒋᔖᓂᔅᑴᒻ ᑭᑦ ᐊᑕᒥᔅᑳᑯᓕᐗ᙮ ᐁᒣᓐ᙮
Currently Selected:
ᓂᔓ ᒑᓐ 1: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
