ᓂᔥᑕᒻ ᒑᓐ 5
5
ᐁ ᐃᔑ ᔕᑯᒋᑖᔭᒃ ᐊᔅᑭ
1ᐊᐌᓇ ᑎᐋᐺᑕᒧᑴ ᒋᓴᓴ ᐁ ᙭ᑎᐎᓕᒋ, ᑭᒋᒪᓂᑐᒃ ᑮ ᐅᒋ ᓂᑕᐎᑭᐤ: ᒥᓯᐌ ᑕᑐ ᐊᐌᓇ ᒫᑲ ᑳ ᓵᑭᐋᑦ ᐊᓂᐃ ᑳ ᑮ ᓂᑕᐎᑭᐃᐌᓕᑭ, ᓵᑭᐁᐤ ᓀᔥᑕ ᐊᓂᐃ ᑳ ᑮ ᓂᑕᐎᑭᐃᑯᓕᒋ᙮ 2ᐅᒪ ᑭ ᐅᒋ ᑭᔅᑫᓕᑌᓈᓇᐤ ᐁ ᓵᑭᐃᒪᑭᒃ ᑭᒋᒪᓂᑐ ᐅᑦ ᐊᐙᔑᒥᔕ, ᐃᔅᐱ ᐁ ᓵᑭᐊᒃ ᑭᒋᒪᓂᑐ, ᓀᔥᑕ ᐁ ᑲᓇᐌᓕᑕᒶᒃ ᐅ ᑲᑫᔅᑴᐎᓇ᙮ 3ᐌᓴ ᐁᐗᑯ ᐅᒪ ᑭᒋᒪᓂᑐ ᐅ ᓵᑭᐃᑯᓯᐎᓐ, ᑭᒋ ᑲᓇᐌᓕᑕᒶᒃ ᐅ ᑲᑫᔅᑴᐎᓇ: ᐅ ᑲᑫᔅᑴᐎᓇ ᒫᑲ ᓇᒪᐎᓚ ᐋᓕᒪᓂᓕᐗ᙮ 4ᐌᓴ ᒥᓯᐌ ᑫᒀᓕᐤ ᑳ ᓂᑕᐎᑭᑖᑦ ᑭᒋᒪᓂᑐ ᔖᑯᒋᐃᐌᒪᑲᓐ ᐊᔅᑭ: ᓀᔥᑕ ᐁᐗᑯ ᐅᒪ ᔖᑯᒋᐃᐌᐎᓐ ᑳ ᔖᑯᒋᑖᒪᑲᒃ ᐊᔅᑭ, ᑭ ᑖᐺᔦᓕᑕᒧᐎᓂᓇᐤ ᐅᑎ᙮ 5ᐊᐌᓇ ᐊᓇ ᑳ ᔖᑯᒋᑖᑦ ᐊᔅᑭᓕᐤ, ᐊᓇ ᐱᑯ ᑳ ᑖᐺᑕᒃ ᒋᓴᓴ ᐁ ᐋᐎᓕᒋ ᑭᒋᒪᓂᑐ ᐅᑯᓯᓴ?
ᐁ ᑎᐹᒋᒫᑲᓂᐎᑦ ᒋᓴᔅ ᙭
6ᐊᐗ ᐁᐗᒀᓇ ᑳ ᑮ ᐯᒋ ᐃᑐᑌᑦ ᓂᐱᓕᐤ ᓀᔥᑕ ᒥᑯᓕᐤ ᐅᒋ, ᒋᓴᔅ ᙭ ᐅᑎ; ᓇᒪᐎᓚ ᓂᐱᓕᐤ ᐅᒋ ᐱᑯ, ᒫᑲ ᓂᐱᓕᐤ ᓀᔥᑕ ᒥᑯᓕᐤ ᐅᒋ᙮ ᓀᔥᑕ ᐊᒑᒃ ᐁᐗᒀᓇ ᑳ ᑎᐹᑐᑕᒃ, ᐊᒑᒃ ᐁ ᑖᐺᐎᓂᐎᑦ᙮ 7ᐌᓴ ᐃᑖᐗᒃ ᓂᔅᑐ ᑳ ᑎᐹᑐᑕᑭᒃ ᑭᒋᑭᔑᑯᒃ, ᐌᐅᑖᐎᒪᐎᑦ, ᐋᔭᒥᐎᓐ, ᓀᔥᑕ, ᐯᓓᑭᓯᑦ ᐊᒑᒃ: ᐅᑯ ᒫᑲ ᑳ ᓂᔅᑎᒋᒃ ᐯᔭᑯᐗᒃ᙮ 8ᐃᑕᑾᓋ ᓀᔥᑕ ᓂᔅᑐ ᑳ ᑎᐹᑐᑕᒧᒪᑲᑭ ᐊᔅᑮᒃ, ᐊᒑᒃ, ᓀᔥᑕ ᓂᐱ, ᓀᔥᑕ ᒥᑯ: ᐅᐅ ᒫᑲ ᑳ ᓂᔅᑎᑭ ᐯᔭᒃ ᐃᔑ ᑎᐹᑐᑕᒧᒪᑲᓋ᙮ 9ᑮᔥᐱᓐ ᐌᑎᓇᒧᐙᐙᑴ ᐃᓕᓕᐗᒃ ᐅ ᑎᐹᒋᒧᐎᓂᐗᐤ, ᐊᐗᓯᑌ ᑭᔅᑌᓕᑖᑾᓂᓕᐤ ᑭᒋᒪᓂᑐ ᐅ ᑎᐹᒋᒧᐎᓐ: ᐌᓴ ᐁᐗᑯ ᐅ ᑎᐹᒋᒧᐎᓈ ᑭᒋᒪᓂᑐ ᑳ ᑮ ᑎᐹᒋᒫᑦ ᐅᑯᓯᓴ᙮ 10ᐊᓇ ᑳ ᑖᐺᔦᓕᒥᒫᑦ ᑭᒋᒪᓂᑐ ᐅᑯᓯᓴ, ᐋᔭᐤ ᐅᒣᓕᐤ ᑎᐹᒋᒧᐎᓂᓕᐤ ᐁ ᐱᒋᔅᑳᑯᑦ: ᐊᓇ ᐁᑳ ᑳ ᑖᐺᑕᐙᑦ ᑭᒋᒪᓂᑐᐗ, ᑭᓛᔅᑭᔉ ᑮ ᐃᔑᐁᐤ: ᐁᑳ ᐁ ᑖᐺᑕᒸᑦ ᐅ ᑎᐹᒋᒧᐎᓂᓕᐤ ᑭᒋᒪᓂᑐᐗ ᑳ ᑮ ᐃᑖᒋᒫᓕᒋ ᐅᑯᓯᓴ᙮ 11ᐁᐗᑯ ᐅᒪ ᒫᑲ ᑎᐹᒋᒧᐎᓐ, ᐁ ᑮ ᒥᓕᑕᒃ ᑭᒋᒪᓂᑐ ᑳᑭᑫ ᐱᒫᑎᓯᐎᓂᓕᐤ; ᐅᒣᓕᐤ ᐱᒫᑎᓯᐎᓂᓕᐤ ᒫᑲ ᐱᒋᔅᑳᑯᓕᐗ ᐅᑯᓯᓴ᙮ 12ᐊᓇ ᑳ ᐋᔭᐙᑦ ᐅᑯᓯᓯᒪᐗ ᐋᔭᐤ ᐱᒫᑎᓯᐎᓂᓕᐤ; ᐊᓇ ᒫᑲ ᐁᑳ ᑳ ᐋᔮᐎᒫᑦ ᐅᑯᓯᓴ ᑭᒋᒪᓂᑐ ᓇᒪᐎᓚ ᐋᔭᐤ ᐱᒫᑎᓯᐎᓂᓕᐤ᙮
ᑳᑭᑫ ᐱᒫᑎᓯᐎᓐ
13ᐅᐅ ᑫᒀᓇ ᑭ ᑮ ᒪᓯᓇᐊᒫᑎᓇᐗᐤ ᑭᓚᐗᐤ ᑳ ᑖᐺᔦᓕᑕᒬᒃ ᐅᑦ ᐃᔑᓂᑳᓱᐎᓐ ᑭᒋᒪᓂᑐ ᐅᑯᓯᓴ; ᑭᒋ ᑭᔅᑫᓕᑕᒣᒃ ᐁ ᐋᔭᔦᒃ ᑳᑭᑫ ᐱᒫᑎᓯᐎᓐ, ᓀᔥᑕ ᑭᒋ ᑖᐺᔦᓕᑕᒬᒃ ᐅᑦ ᐃᔑᓂᑳᓯᐎᓈ ᑭᒋᒪᓂᑐ ᐅᑯᓯᓴ᙮ 14ᐁᐗᑯ ᒫᑲ ᐅᒪ ᐁ ᐃᔑ ᑫᒋᓇᐅᐎᐊᔅᐯᓕᒧᑐᑕᐗᒃ, ᑮᔥᐱᓐ ᓇᑐᑕᒫᔭᒃ ᑫᒀᓐ ᑳ ᐃᑕᔅᑌᓕᒃ ᐅᑦ ᐃᑌᓕᑕᒧᐎᓐ, ᑭ ᓇᑐᑖᑯᓇᐤ: 15ᑮᔥᐱᓐ ᒫᑲ ᑭᔅᑫᓕᑕᒪᒃ ᐁ ᓇᑐᑖᑕᒃ, ᑫᒀᓐ ᐁ ᐃᔑ ᓇᑐᑕᒫᔭᒃ, ᑭ ᑭᔅᑫᓕᑌᓈᓇᐤ ᐁ ᐋᔮᔭᒃ ᐊᓂᐃ ᑳ ᑮ ᐸᑯᓭᓕᑕᒪᐗᒃ᙮
16ᑮᔥᐱᓐ ᐊᐌᓇ ᐙᐸᒫᑌ ᐎᒋᔖᓇ ᐁ ᑐᑕᒥᓕᒋ ᒪᒋᑐᑕᒧᐎᓂᓕᐤ, ᐁᑳ ᓂᐱᐎᓂᒃ ᑳ ᐃᑕᒧᓕᒃ, ᑲᑕ ᓇᑐᑕᒫᑫᐤ, ᑲᑕ ᒥᓓᐤ ᒫᑲ ᐱᒫᑎᓯᐎᓂᓕᐤ ᐊᓂᐃ ᐅᒋ ᐁᑳ ᑳ ᒪᒋᑐᑕᒥᓕᒋ ᓂᐱᐎᓂᒃ ᑳ ᐃᑕᒧᓕᒃ᙮ ᐃᑕᑾᓐ ᒪᒋᑐᑕᒧᐎᓐ ᓂᐱᐎᓂᒃ ᑳ ᐃᑕᒧᒃ: ᓇᒪᐎᓚ ᓂᑦ ᐃᑣᓐ ᑭᒋ ᐋᔭᒥᐁᔅᑕᒣᒃ ᐊᓂᒪ᙮ 17ᒥᓯᐌ ᐁ ᐃᔑ ᒪᒑᑎᓯᐎᓐ ᒪᒋᑣᐎᓂᐗᓐ: ᐃᑕᑾᓐ ᒫᑲ ᒪᒋᑐᑕᒧᐎᓐ ᐁᑳ ᓂᐱᐎᓂᒃ ᑳ ᐃᑕᒧᒃ᙮
18ᑭ ᑭᔅᑫᓕᑌᓈᓇᐤ ᐊᐌᓇ ᑳ ᓂᑖᐎᑭᐃᑯᑦ ᑭᒋᒪᓂᑐᐗ ᓇᒪᐎᓚ ᒪᒋᑐᑕᒻ; ᒫᑲ ᐊᓇ ᑳ ᓂᑕᐎᑭᐃᑯᑦ ᑭᒋᒪᓂᑐᐗ ᑲᓇᐌᓕᒥᑎᓱ, ᓇᒪ ᓀᔥᑕ ᓵᒥᓂᑯ ᐊᓂᐃ ᒣᒋᑣᓕᒋ᙮
19ᑭ ᑭᔅᑫᓕᑌᓈᓇᐤ ᒫᑲ ᐁ ᑎᐯᓕᒥᑕᒃ ᑭᒋᒪᓂᑐ, ᓀᔥᑕ ᒥᓯᐌ ᐊᔅᑭ ᐁ ᐱᒥᑎᒃ ᒪᒑᑎᓯᐎᓂᒃ᙮
20ᑭ ᑭᔅᑫᓕᑌᓈᓇᐤ ᓀᔥᑕ ᑭᒋᒪᓂᑐ ᐅᑯᓯᓴ ᐁ ᑕᑯᔑᓂᓕᒋ, ᓀᔥᑕ ᐁ ᑮ ᒥᓕᑕᒃ ᓂᓯᑐᑕᒧᐎᓂᓕᐤ, ᑭᒋ ᑭᔅᑫᓕᒪᒃ ᐊᓇ ᑳ ᑖᐺᐎᓂᐎᑦ; ᑭ ᐱᒋᔅᑲᐙᓈᓇᐤ ᒫᑲ ᐊᓇ ᑳ ᑖᐺᐎᓂᐎᑦ, ᐊᓇ ᐅᑎ ᐅᑯᓯᓴ ᒋᓴᔅ ᙭᙮ ᐁᐗᑯ ᐊᐗ ᑖᐺ ᑭᒋᒪᓂᑐ, ᓀᔥᑕ ᑳᑭᑫ ᐱᒫᑎᓯᐎᓐ᙮
21ᐊᐱᔅᑕᐙᔑᔑᑐᒃ, ᑲᓇᐌᓕᒥᑎᓱᒃ ᒪᓂᑐᑳᓇᒃ ᐅᒋ᙮ ᐁᒣᓐ᙮
Currently Selected:
ᓂᔥᑕᒻ ᒑᓐ 5: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
