Mc 9

1Jesús dojapegue'to ga'me jiyaĝadipi:

—Eja da'me ami ja'aĝatema queda'me uo'oe gaa'me nayi ueteda'a jena'me jenjo', cha'li ja yele'u chayovida'a qom yauata da'me lovidaĝac da'me lejaliaĝa joñe'me Dios choqoda'me lañoqotaĝanaĝac.

Da'me neleguemaĝat ñe'me Jesús

(Mt 17.1-13; Lc 9.28-36)

2Yenoĝodegue gaa'me seis noloqo'ote, qama'le Jesús yiyaĝana ñe'me Pedro, ñe'me Santiago, nataq'aen ñe'me Juan, qama'le yejamache da'me quetegue da'me yec'adije'ma ga'me qajoĝonaĝa jo'ne qayaje'mec. Qama'le neleguemaĝata da'me edañgui joda'me 'loyaĝac da'me dajoya'agueta jogaa'me, 3nataq'aen jogaa'me louo neleguemaĝata da'me laqaselegaĝa'j, yataqachiñe yapaga't jo'ne ja ena'am ga'me mate mane'e jalcote da'me qoyiyo. 4Qama'le yauata jo'me Elías nataq'aen di'me Moisés, jo'ne dojetedapegue' joñe'me Jesús. 5Pedro yiyaĝatapega ñe'me Jesús, enaac:

—Jaliaĝanec, ¡yataqachiñe 'noota da'me jouaqa'ta jena'me jenjo'! Jauoqo'oe tres gaa'me nepele'te: onolec ga'me adoĝot, laqaya Moisés loĝot, nataq'aen joga'me laqaya loĝot da'me Elías.

6Qa'a jogaa'me lapaĝaguenataqa jalcote da'me t'oita, chane'eja Pedro ja yayaten ga'me nenaĝategue. 7Qama'le ua'a ca'li needañe ga'me piyem lo'oc jo'ne yapadelo'te jogaa'me. Nataq'aen queda'me chimaqapegoue joga'me lo'oc ga'me nejamaĝa jo'ne enaac: “Jenjo' mach'e yalec jo'ne jauotec: ¡anaquiaĝañiya!”

8Paja'a yelodapi'ñgui joca'li jogaa'me lapaĝaguenataqa qama'te ja yitaĝa 'uo ga'me yauata, dite ñe'me Jesús onolec. 9Mane'e ca'li nenochidiñe ga'me qajoĝonaĝa, ñe'me Jesús jalcote da'me uaqateque gaa'me lapaĝaguenataqa, enaac:

—Ena'te a'uaĝachetac da'me dojo' auañiya, chayovida'a qom jayem jo'ne yataqachiñe Jiyaĝaua Lec'oĝot male yovita da'me 'ñiyelaĝajeguem, jachiyaqauelo ga'me napa'lpi.

10Chane'eja yiyamaĝa't, 'nemaĝadela'ajalo jogaa'me, mate mane'e nenatetapiye da'me jach'e jogamaĝa eeta da'me 'niyelaĝajeguem joñe'me yataqachiñe Jiyaĝaua Lec'oĝot. 11Qama'le yena't joñe'me Jesús:

—¿Toqoch'e ga'me judiopi napaĝaguenoqo'tpi eetedapega da'me 'uaeñe novi' qomle jo'me Elías?

12Joñe'me 'yategueta jogaa'me:

—Eja da'me dojo' queda'me 'uaeñe novi' jo'me Elías, nataq'aen da'me yema yiyamaĝatetac. Qama'le ¿jach'e jogamaĝa eeta da'me qoyediñe joca'li 'me 'yaĝatetac ñe'me Jiyaĝaua Lec'oĝot? ¿Qo'li ja 'yaĝatetac queda'me ualegue qomle da'me jalcote 'me lachoĝodec, nataq'aen queda'me qo'yotan? 13Qalaĝaja ami ja'aĝatema queda'me Elías joote novi', nataq'aen queda'me 'yetedec ga'me jo'ne yepaquetedapega jogaa'me, nach'e naq'aeta da'me jo'ne qoyediñe jo'ne 'yaĝatetac joñe'me.

Jesús en yemegue ñe'me notolec jo'ne uetaye ga'me payac lepaqal

(Mt 17.14-21; Lc 9.37-43)

14Mane'e ca'li 'viyelaĝadeta ga'me ueteda'a gaa'me lapaĝaguenataqa laqaya', qama'le yauanalo queda'me qodijopa ga'me jiyaĝadipi, nataq'aen uo'oe ga'me judiopi napaĝaguenoqo'tpi jo'ne necotetapegue'to jogaa'me. 15Ga'me jiyaĝadipi yoqochetem ca'li yeloda'aguet joñe'me Jesús, qama'le naqalegoqotaye da'me qodique'taguet qaedi qoyep'iyen joñe'me. 16Joñe'me yena't jogaa'me:

—¿Toqoch'e anec'onaĝañiitapega't da'me ami?

17Qama'le 'uo ñe'me jiyaĝaua jo'ne chiyaqauelo ga'me jiyaĝadipi jo'ne enaac:

—Paĝaguenataĝanaĝaic, jenjo' yalec am ñeda'a, qa'a 'uo ñe'me payac lepaqal jo'ne uetaye jo'ne en chiyoĝojec q'aen. 18Gamachaqaega ua'a nale yaqapiyaqatenaye qama'le ñe'me uetaye yajaĝañi nale, qama'le najotapeguet jena'me aleua, nataq'aen en na'ya na'me nedegaĝat jaga'me 'lali, yaqavina't naa'me lodaitel, nataq'aen jetaque en t'añiyeguet. Joote ñachoĝodenoto naa'me adapaĝaguenataqa qaedi yamaĝadegue ñe'me payac, qalaĝaja ja yaqanate't.

19Jesús 'yategueta jogaa'me:

—¡Yataqachiñe ami jiyaĝadipi jo'ne qoleguetaĝanaĝaiquipi! ¿Jach'e jogamaĝa ua'a da'me cha'li ami jouetauelo? ¿Jach'e jogamaĝa ua'a da'me cha'li ami ñeualaĝae'to? ¡Yaĝa, anedoyiquena ga'me notolec!

20Chane'eja qoyedouo'o ñe'me Jesús ga'me notolec. Qalaĝaja mane'e ca'li yelo'ot ñe'me Jesús ñe'me nepaqal jo'ne uetaye, qama'le en qopete ñe'me notolec, nataq'aen najoneguet jena'me aleua qama'le nojouoqotapela't, nataq'aen na'ya na'me nedegaĝat jaga'me 'lali. 21Ca'li Jesús yenat ñe'me let'a ga'me notolec:

—¿Jach'e ga'me chiyoqotelegue da'me ua'ajop da'me dojo'?

Joñe'me let'a 'yateguet:

—Chiyoqotelegue ca'li maliaĝa ja 'yaĝaic. 22Nataq'aen ñe'me nepaqal jo'ne uetaye, nach'e eta't jetaque yajaĝañgui ga'me dole', nataq'aen ga'me noĝop, qaedi yalat. Chane'eja qom auaqanatet ta'le 'uo ga'me aua'uo, qama'le qo'mi avichoĝode'n nataq'aen qo'mi alecochiyalo.

23Jesús 'yateguet:

—¿Toqoch'e auenaac: “qom auaqanatet”? ¡Yema qaya'te laqalaic ga'me jo'ne jayem p'iya'a!

24Chane'eja ñe'me let'a ga'me notolec netenec ga'me 'laqatac:

—Am jep'iya'a, qalaĝaja ¡'noota qom jayem alecochiya da'me qaedi yataqachiñe am jep'iya'a!

25Jesús yauana queda'me jalcote ga'me jiyaĝadipi jo'ne qonemetapega qama'le nelaĝa ñe'me nepaqal jo'ne ja no'en 'me uetaye, enaac:

—Am nepaqal jo'ne ja auen 'te doje na'me notolec nataq'aen ja auen 'te domachiyac, am jamaĝalegue da'me auenoĝonegue, oca'e jena'me jenjo' notolec, nataq'aen queda'me ja yitaĝa auenoĝonoue.

26Ñe'me nepaqal jalcote da'me 'yalaqatet ñe'me notolec, nach'eda da'me yitaĝa yecopichaqatet joga'me. Yem qama'le yemta yenoĝonegue qama'le ca'e, yachetai'ndi ena'am da'me yataqachiñe joote yeleu, chane'eja ga'me jiyaĝadipi yepetedapega da'me yataqachiñe yeleu. 27Qalaĝaja Jesús yacona ga'me louaq, yañijeguem. Qama'le ñe'me notolec male nechachiñe.

28Yem da'me dojo' qama'le Jesús taue ga'me 'lachaqa', qama'le jogaa'me lapaĝaguenataqa yena't ca'li yejamaĝa'te' joñe'me:

—¿Toqoch'e da'me qo'mi ja jaqanatetaq da'me jamaĝajoĝoye jo'me nepaqal?

29Qama'le Jesús 'yategueta jogaa'me:

—Jenjo', qom naq'aeta da'me mach'e 'loyaĝac ga'me payac, qama'le nach'edata da'me tamenaĝac qoyedolegue, qama'le qoyaqanatet da'me qo'yodegue joga'me.

Jesús yitaĝa 'yaĝatetac queda'me qoyalat qom'te

(Mt 17.22-23; Lc 9.43-45)

30Ca'li queda'e ga'me ueteda'a, qama'le yitaĝa eque', tadelegue di'me Galilea. Qalaĝaja Jesús jetaque da'me ja qonoma'a, 31qa'a uetauelo gaa'me lapaĝaguenataqa qaedi cha'li yapaĝague'n. Nale enaac:

—Jayem jo'ne yataqachiñe Jiyaĝaua Lec'oĝot male ja'ta da'me jayem qoyanouelo joga'me jiyaĝadipi qaedi jayem qoyalat. Qalaĝaja yenoĝodegue tres gaa'me noloqo'ote qama'le 'ñiyelaĝajeguem.

32Qalaĝaja gaa'me lapaĝaguenataqa ja yayate'n ga'me jo'ne 'yaĝatetapema, nataq'aen t'oidapega da'me yena't.

¿Jach'e ñe'me jo'ne napacalo'te gaa'me laqaya'?

(Mt 18.1-5; Lc 9.46-48)

33Yovideta di'me Capernaúm. Mane'e ca'li joote netedaue ga'me emec, Jesús yena't jogaa'me:

—¿Jach'e ga'me anec'onaĝañiitapiye jena'me adadiqui?

34Qalaĝaja jogaa'me ma'te 'nemaĝadela'ajalo, qa'a ga'me ladi'j nec'onaĝatedapiye queda'me jach'e ñe'me jo'ne napacalo'te gaa'me laqaya'. 35Chane'eja Jesús ñiyiñe, yiyaĝanalo jogaa'me doce lapaĝaguenataqa qama'le enaac:

—Qom 'uo ga'me jo'ne jetaque najoĝola' jo'ne 'uaechiñe, 'noota qom najetoue da'me p'ategue dajoya'yelo gaa'me laqaya', nataq'aen neualaĝaetapegue'to jogaa'me laqaya'.

36Yem qama'le Jesús yiyaĝana ga'me notolec qama'le yachañgui laeñi jogaa'me; qama'le najaqauo queda'me dojapegue'to jogaa'me lapaĝaguenataqa, enaac:

37—Joñe'me jo'ne jayem naquiaĝana qama'le yaconeguet ga'me notolec ena'am jenjo', mach'e jayem yaconeguet; nataq'aen joñe'me jo'ne jayem yaconeguet, ja nach'edata da'me jayem yaconeguet dite da'me nach'e ena'am yaconeguet ñe'me jo'ne jayem namaĝaquena.

Ñe'me jo'ne ja qo'mi 'te nautenalo, nach'eñe jo'ne qo'mi yotaua'n

(Mt 10.42; Lc 9.49-50)

38Juan 'yateguet joñe'me, enaac:

—Paĝaguenataĝanaĝaic, 'uo jo'me jauanaĝa quelqaya jo'ne nenaĝategue da'me adenaĝat queda'me yamaĝadegue gaa'me payagodipi, qalaĝaja jetaque ja jajenaĝam qa'a ja qo'mi 'te chiyaqauelo.

39Qalaĝaja Jesús 'yategueta:

—Ena'te a'uelaĝachitapeguem, qa'a gamachaqaegaua jo'ne uo'oe gaa'me lañoqotaĝanaĝaco jo'ne p'ajodaye qom nenaĝategue da'me yenaĝat, qama'le ja yaqanatet ta'le paja'a jayem nautena. 40Qa'a ñe'me jo'ne ja qo'mi 'te nautenalo, nach'eñe jo'ne qo'mi yotaua'n. 41Ami ja'aĝatema queda'me gamachaqaega jo'ne ami yanema ga'me adaiquipi, qa'a yajouaĝat da'me ami mach'e yapaĝaguenataqa, qama'le yataqachiñe 'uo qomle ga'me nejetenaguec joga'me.

Joda'me lichic ta'le auelo jodaa'me adoeco

(Mt 18.6-9; Lc 17.1-2)

42Nataq'aen enaac joñe'me Jesús:

—Gamachaqaega ga'me jo'ne en tauelo daa'me loeco nat'olqa jo'ne maliaĝa 'najodolqa da'me jayem p'iida'a, qama'le 'noota da'me qoyecoñeteguet ga'me qa' t'adaic jo'ne dejali ga'me loqojot, qama'le qoyajaĝañgui ga'me noĝop let'adaic.

43-44“Qom na'me adouaq auachiyoĝotaye da'me aua'uo ga'me adoec, qama'le ¡'noota qom avichaĝayi! 'Noota da'me am jopo da'me aue joda'me at'oyaĝac jo'ne ja 'naidena'a, qalaĝaja ja 'noota ta'le nalo'ta'ajalo naa'me adoua' da'me auec'ata ga'me ne'uaĝanaqa' gaa'me loeco lo'olpi jo'ne payac 'lachaqa', ua'a ga'me dole' jo'ne qaya'te yaqanatet ta'le 'yomaĝat. 45-46Nach'e ena'am qom na'me adapia' auachiyoĝotaye da'me aua'uo ga'me adoec, ¡'noota qom avichaĝayi! Qa'a 'noota da'me am jopo qom aue da'me at'oyaĝac jo'ne ja 'naidena'a, qalaĝaja ja 'noota ta'le nalo'ta'ajalo naa'me adapia'te da'me am qoyajaĝaue di'me ne'uaĝanaqa' gaa'me loeco lo'olpi jo'ne ja niyamaĝa. 47Nach'e ena'am qom na'me at'aete auachiyoĝotaye da'me aua'uo ga'me adoec, ¡'noota qom anaqat! Qa'a 'noota da'me am qanam qom aue da'me Dios lejaliaĝa, qalaĝaja ja 'noota ta'le nalo'ta'ajalo gaa'me at'ae'te da'me am qoyajaĝaue di'me ne'uaĝanaqa' gaa'me loeco lo'olpi, 48ueda'a gaa'me qoche'la'tel jo'ne ja yele'u nataq'aen ga'me dole' jo'ne qaya'te yaqanatet ta'le 'yomaĝat.

49“Qa'a ena'uaque ga'me jiyaĝadipi qoyen tadoue ga'me dole' da'me qo'youaĝanaqatet. 50Jalcote onaĝaic ga'me qa'noua; qalaĝaja qom qaya da'me 'louaĝa, ¿jach'e ga'me eeta ta'le auaqanachichi da'me yitaĝa a'uonataĝañiya? 'Noota qom ena'am ta'le ami uetauelo ga'me qa'noua, nataq'aen 'noota qom 'uo da'me at'emaĝaqui da'me aniyamaĝadeñiyapega't.”

Currently Selected:

Mc 9: TSN

Highlight

Copy