Mt 25

Qodaloqotenaĝanalo jogaa'me diez q'añolel

1“Chane'eja da'me lejaliaĝa joñe'me Dios jo'ne na'ague di'me piyem ena'ama gaa'me diez q'añolel jo'ne yaconalo gaa'me lecoyadaĝanaqatel qaedi yeviteteda'aguet ñe'me nojaĝaua. 2Cinco gaa'me 'uo da'me nichiyoĝojoĝo'j nataq'aen laqaya' cinco qamqa'me yatenaĝanaĝail. 3Ca'li yaconalo lecoyadaĝanaqatel gaa'me chiyoĝojol qama'te ja yauote livitaĝanaĝa't aceite; 4Qalaĝaja gaa'me yatenaĝanaĝail yauote livitaĝanaĝa't aceite da'me yaconalo gaa'me lecoyadaĝanaqatel. 5Qama'le queda'me uayaloqota't ñe'me nojaĝaua da'me maliaĝa ja novi', ena'uaque gaa'me vidiñe qama'le t'oche'y. 6Mane'e ca'li pi'yaĝa laeñi qanach'e qodomachiya ga'me niyaĝanaĝac: «¡Novi' ñe'me nojaĝaua! ¡Auenoĝoñiyegue qaedi aueloyeguet!» 7Ena'uaque gaa'me q'añolel ñidijeguem ca'li qama'le yaconalo naa'me lecoyadaĝanaqatel. 8Gaa'me chiyoĝojol enapegalo gaa'me yatenaĝanaĝail: «Qo'mi anecolaĝatalo ga'me aceite, qa'a jetaque o'm naa'me qadecoyadaĝanaqatel.» 9Qalaĝaja gaa'me yatenaĝanaĝail 'yategueta ca'li enapega't: «Aja'y, ja 'noota ta'le qadema yemeta ga'me aceite qa'a ja nalo'taguet ta'le ami qanecolaĝatalo. Dite da'me auec'achiyalo gaa'me menaĝayaqa qaedi oquiyot ga'me mach'e adoĝochi.» 10Mane'e ca'li eque' qaedi quetot ga'me mach'e loĝo't qanach'e novi' ñe'me nojaĝaua. Ca'li yenoĝoneuo nach'e ena'ama gaa'me yeviteta'ajalo da'me yec'adeta ga'me 'nonáĝac, qama'le napadiñgui ga'me jom. 11Ua'edi nach'e ena'am novi't gaa'me q'añolel laqaya', enapega't: «¡Jaliaĝanec, qo'mi a'uouategueta!» 12Qalaĝaja ñe'me 'yategueta, enaac: «Negue't, ja ami 'te jateto'n.»

13“Chane'eja 'noota qom a'vicheta't, qa'a ja auayachiñe ga'me nolo' uotaĝa ga'me laloqo' da'me yitaĝa 'ñiyelaq.

Qodaloqotenaĝana jaga'me naicaua ñe'me neuoyaq jo'ne yepotanouelo jogaa'me lamaĝa's

14“Qa'a joda'me lejaliaĝa ñe'me Dios jo'ne na'ague di'me piyem ena'am ca'li 'uo ñe'me jiyaĝaua jo'ne ca'li nadi'ta da'me dajoyi ga'me qaya'ague aleua laqaya, qama'le yiyaĝanalo jogaa'me lamaĝa's qaedi yepotanouelo da'me leuoyaĝac. 15Ga'me 'uaeñe yanem cinco nemena jo'ne talentos, ga'me laqaya dojole ga'me yanema nataq'aen laqaya yanem jaga'me onole, onolqa'tape qoyen naloqote'teguet ga'me mach'e nalo'taguet. Yem qama'le dajoyi ga'me qaya'ague. 16Ñe'me jo'ne qoyanema gaa'me cinco talentos, paja'a ec ca'li, t'onataĝanalo gaa'me, qama'le uoja'aegaua cinco talentos jo'ne lomataĝanaqate. 17Nach'e naq'aeta ga'me jo'ne qoyanema gaa'me dojole talentos yitaĝa uoja'ae lomataĝanaqate jo'ne dojole talentos. 18Qalaĝaja ñe'me jo'ne qoyanem jaga'me onole talento ya'uo lejede jena'me aleua qama'le yijeñi jaga'me naicaua ñe'me lejaliaĝanec.

19“Ca'li qayoĝode' gaa'me noloqo'ote yenoĝodegue, 'niyelaq ñe'me lejaliaĝane'j jogaa'me namaĝa's qama'le yiyaĝaneta qaedi 'yaĝadetem da'me loĝonaĝanaĝa'j jogaa'me. 20Ñe'me jo'ne yaconegueta gaa'me cinco talentos dajoya'aguet, nataq'aen queda'me nach'e ena'am li'yaco gaa'me cinco talentos laqaya', qama'le enaac: «Jaliaĝanec, jayem auanema ca'li gaa'me cinco talentos; naajo' naa'me yomataĝanaqatel cinco talentos laqaya'.» 21Ñe'me lejaliaĝanec enaac: «¡Yataqachiñe 'noota da'me at'onatac nataq'aen am yataqatelegue! Qama'le queda'me a'nañaĝatela't da'me aue'et ga'me jaleca, nayi jalcote ga'me am jepotaneguet. ¡Ayala, anec'ata ñe'me adejaliaĝanec qaedi am ñetonaĝaua!» 22Nataq'aen ca'li dajoya'aguet ñe'me jo'ne qoyanema ga'me dojole talentos enaac: «Jaliaĝanec, jayem auanema ca'li gaa'me dojole talentos; naajo' naa'me yomataĝanaqatel jo'ne dojole talentos laqaya'.» 23Ñe'me lejaliaĝanec enaac: «¡Yataqachiñe 'noota da'me at'onatac nataq'aen am yataqatelegue! Qama'le queda'me a'nañaĝatela't da'me aue'et ga'me jaleca, nayi jalcote ga'me am jepotaneguet. ¡Ayala, anec'ata ñe'me adejaliaĝanec qaedi am ñetonaĝaua!»

24“Qalaĝaja ca'li dajoya'aguet ñe'me jo'ne qoyanem jaga'me onole talento, enaac: «Jaliaĝanec, yataqachiñe am jateton queda'me am jiyaĝaua jo'ne ja am 'te damita, jo'ne anaqat ga'me jala ga'me ja adanec nataq'aen alapona't ga'me jo'ne ja auelagaĝatelegue jaga'me anepeta. 25Qama'le queda'me am jo'oyapega, joĝochiñe jaga'me talento, jijenoue jena'me aleua, nayi janjo' jana'me mach'e adoqote.» 26Ñe'me lejaliaĝanec 'yateguet qama'le enaac: «¡Am nalemaĝajet jo'ne ja no'en nataq'aen choĝolaĝaic! Qom auayaten da'me ñaqat ga'me jala ga'me jo'ne ja yanec nataq'aen yapona't ga'me jo'ne ja jelagaĝatelegue jaga'me ñepeta, 27qama'le ¿toqoch'e ja auachaue jana'me laicaua lae't jaga'me ñaicaua? Chane'eja ta'le ñovi' qama'le jaconeguet ga'me loĝonaĝanaĝac jo'ne mach'e yoqotel.»

28Chane'eja male dojapegue'to gaa'me lecochaĝa'u, enaac:

—Auacoñiyeguet jaga'me talento qaedi auañem ga'me jo'ne yauanalo diez talentos. 29Qa'a ena'uaque gaa'me jo'ne 'uo ga'me yauata, yitaĝa uoja'e ga'me qoyane'm, qaedi jalcote ga'me yauata. Qalaĝaja ga'me jo'ne qaya'te yauana, chayovida'a ga'me jaleca jo'ne yauana qodoĝotaĝanec. 30Qama'le jenjo' namaĝajec jo'ne qolanaqaic, auamaqayoue ga'me p'aye 'me 'lalaĝa. Ua'a da'me ya'uo da'me lachitataic choqoda'me noyenaĝac.”

Qom 'uo da'me nec'atenaĝanaĝac ga'me jiyaĝadipi

31“Da'me jayem jo'ne jayem Jiyaĝaua Lec'oĝot nataq'aen jayem Jaliaĝanec, qom 'ñiyelaq qama'le nachetac da'me yi'yoĝodic, nataq'aen ena'uaque jogaa'me yamaĝa's jo'ne piyem laje' jayem naequetedapegue', qama'le jonañgui jaga'me yejaliaĝaiqui jo'ne p'ajaye da'me li'yoĝodic. 32Ena'uaque ga'me jiyaĝadipi jo'ne aleua laje'pi yema'a't qaedi jayem dajoyeda'aguet. Qama'le ñatoyelo jogaa'me, ena'am ga'me 'naĝanaĝate neuatoqo't nale yiyota'alo gaa'me 'naĝanaĝatel en ca'ae gaa'me quetaĝapi. 33Qama'le jana'ague jena'me jayaten joga'me 'naĝanaĝatelpi nataq'aen jana'ague jena'me 'ñemaq joga'me quetaĝapi. 34Yem qama'le jenapegalo gaa'me jo'ne neteda'ague jena'me jayaten: «Auanaeyiquena, ami jo'ne yataqachiñe yichoĝode'n ñe'me Taĝadena'. Auacoñiyeguet ga'me joote ami qoyaditaĝat'ae'ta, joda'me nejaliaĝa jo'ne qoyaqataĝata't qaedi ami qoyanema chiyoqo'teguet ca'li yemta jena'me aleua. 35Qa'a ca'li joqouat qama'le jayem auañem ga'me jalic; ca'li jelinquip qama'le jayem aniyomaĝañi, ca'li jejomatac qama'le jayem aueloyeguet; 36ca'li qaya'te ñejomaĝaiqui qama'le auauoyi ga'me jayem lapaĝalegue; ca'li jeleuac qama'le jayem auejapichiya; ca'li jonetaue jaga'me coñetaĝanaĝaiqui qama'le jayem auec'achii'uo.» 37Chane'eja jogaa'me yataqatelo'te jiyaĝa'u enapega't da'me 'yadeteguet: «Jaliaĝanec, ¿jach'e ga'me ua'a ca'li am jauanaĝa da'me adoqouat qama'le am janemaĝam ga'me aualic, uotaĝa adelinquip qama'le am ñiyomaĝanaq? 38¿Jach'e ga'me ua'a ca'li ena'am ta'le adejomatac qama'le am jeloĝoguet, uotaĝa qaya'te auaiñe qama'le jauoqo ga'me am lapaĝalegue? 39¿Jach'e ga'me ua'a ta'le adeleuac da'me am jauanaĝa, uotaĝa onetaue jaga'me coñetaĝanaĝaiqui, qama'le am jec'otaĝa?» 40Qama'le ja'ategueta qomle, jenaac: «Eja ami ja'aĝatema queda'me yema gaa'me jo'ne a'vichiyeque naajo' yaqaya'olqa 'me 'najode' qama'le nach'ayem jo'ne jayem a'vichiyec da'me dojo'.»

41“Chane'eja nach'e ena'am jenapegalo qomle gaa'me jo'ne neteda'ague jena'me 'ñemaq: «¡Jayem oquiya'ae! Ami jo'ne ja ami 'te qoyichoĝode'n nayi, auec'achiya di'me dole' jo'ne ja 'naidena'a 'me ami qoyaqataĝat'agueta ñe'me payac nataq'aen jogaa'me lamaĝa's jo'ne piyem laje'. 42Qa'a ca'li joqouat, qama'te ja jayem 'te aviqui'yaĝañi; ca'li jelinquip, ja jayem 'te aniyomaĝañi. 43Ca'li jejomatapiye't qama'te ja jayem 'te aueloyeguet; ca'li qaya'te jaiñe qama'te ja auauoyi ga'me ñejomaĝaiqui; ca'li jeleuaq nataq'aen ca'li jonetaue jaga'me coñetaĝanaĝaiqui qama'te ja jayem 'te auejapichiya.» 44Chane'eja 'yadeteguet jogaa'me: «Jaliaĝanec, ¿jach'e ga'me joca'li am jauanaĝa da'me adoqouat uotaĝa adelinquip, uotaĝa ena'am ta'le adejomatapiye't, uotaĝa qaya'te auaiñe, uotaĝa adeleuac, uotaĝa onetaue jaga'me coñetaĝanaĝaiqui qama'te ja am 'te yecochaĝajaĝa?» 45Qama'le ja'ategueta qomle, jenaac: «Eja ami ja'aĝatema queda'me yema gaa'me jo'ne ja a'vichiyeque naa'me naajo' yaqaya'olqa 'me 'najode' qama'le nach'ayem jo'ne ja jayem 'te a'vichiyec da'me dojo'. 46Da'me ami, auec'achiya ga'me ane'uaĝanaguequi 'me ja 'naidena'a, qalaĝaja gaa'me joĝodayaqa lai'li qamqa'me yec'adeta da'me 'noyaĝac jo'ne ja 'naidena'a.»”

Currently Selected:

Mt 25: TSN

Highlight

Copy