Ef 5
5
1Chane'eja queda'me yataqata ami lec'oqo'tepi joñe'me Dios nataq'aen yataqata ami noqopitalo, qama'le 'noota qom auadenaĝachi joñe'me. 2Yataqata adoqopichiyalo naa'me adaqayadi', ena'am ca'li joñe'me Cristo da'me yataqata qo'mi noqopitalo qama'le qo'mi nep'aĝanegueta ca'li, qaedi ena'am ta'le qoyen qadajaqajec, ena'am ga'me 'naĝanaĝate c'oĝot jo'ne qoyachalegue ga'me nec'atoĝonaĝala' nale, nach'eñe jo'ne ena'am joga'me neyoĝoque jo'ne jama nale ga'me laeta, yataqata yiyamaĝaden ñe'me Dios.
3Da'me ami, joote ami Dios lec'oqo'tepi, chane'eja 'noota ta'le ja ami 'te chimaqapegouelo ta'le 'uo ga'me nequejeguetaĝa, uotaĝa ta'le ami paĝachiguilo q'ae'n, uotaĝa ta'le yaguegue ga'me auepichítapega. 4Ena'te anenaĝachidegue gaa'me 'naqataqa jo'ne yataqata ja 'noe'n, uotaĝa gaa'me 'naqataqa jo'ne qaya'te yelo'teguet nale, uotaĝa ch'e nipi'ico, qa'a naajo' ja ami 'te lecochiyalo, dite da'me auañem da'me adamaiqui joñe'me Dios. 5Da'me ami yataqata auayachiñe queda'me uo'oe gaa'me jo'ne ja yaqanate't ta'le tadoue da'me lejaliaĝa joñe'me Cristo choqoñe'me Dios; nach'egaua jo'ne quejeguetaĝayaqa nataq'aen gaa'me yadenaĝa't ga'me paĝachigui nataq'aen gaa'me pitaĝanaqataqayaqa (jo'ne ena'am ta'le e'n nedios da'me jo'ne yepiteda'a.)
Male ovitaue jena'me yoqochiñe
6Ena'te anejeñeta ta'le ami qoyoqovi'n da'me qom ami qoyanema gaa'me 'naqataqa jo'ne ja ejoda, qa'a chiyaqayilo naa'me naajo' noqovinaĝaco, joñe'me Dios dalemata'yalo jo' qomle gaa'me ja yoqochideta. 7Chane'eja ena'te ta'le cat'olec da'me anaequiitapegue'to naajo' jiyaĝa'u, uotaĝa ta'le auec'achiyalo.
8Ga'me ja yateton joñe'me Dios, ena'am ta'le uetaue joga'me 'naltapiye, ja yayaten joga'me ya'uo. Ca'li da'me ami naq'aeta da'me at'oyaĝaqui, qa'a ja auatetoñi ca'li joñe'me Dios. Qalaĝaja nayi male yataqata auatetoñi joñe'me, qama'le ena'am ta'le male ovitaue da'me yoqochiñe. Chane'eja 'noota qom male auadenaĝachi' gaa'me uetedaue da'me yoqochiñe. 9Qa'a gaa'me jo'ne uetedaue da'me yoqochiñe, daa'me 'lonataĝanaĝaco 'noote' nataq'aen chimaqachidiñe nataq'aen yataqatelo'te. 10Qama'le 'noota qom anapaĝagueñiyalo gaa'me yataqata yiyamaĝade'n joñe'me Qadejaliaĝanec qama'le auauoyi nale. 11Ena'te auadenaĝachi' gaa'me 'yetedac ga'me jo'ne uetaue joga'me 'naltapiye, qa'a yataqata qaya'te chiyaqayi, dite da'me aueñi di'yoq ga'me ladi'j qaedi yataqata male yayate'n da'me eja. 12¡Yataqata jepocoĝolegue da'me ja'aĝatetac joga'me 'yetedac nale te'me yoĝotedapiñe, yataqata ja no'en ga'me yauotedac! 13Qom edañgui jañe'me coyadaĝanaqate, male yemta di'yoq joga'me uetaue da'me 'naltapiye, male yataqata qoyayaten joga'me 'loyaĝac. Qa'a yema da'me qoyayaten male qoyen yoqochiñe. 14Qama'le 'uo jo'me nolo' ca'li qoyediñe jena'me jenjo':
“¡Aneloye, am uochaĝaic!
¡A'niyelaĝajeguem, auachiyaqauelo na'me napa'lpi,
Qaedi joñe'me Cristo am yecoyadelegue!”
15Chane'eja 'noota qom yataqata auenache'ta nale joga'me jetaque auauoyi, qama'le ena'te auadenaĝachi' gaa'me chiyoĝo's dite gaa'me yatenaĝanaĝayaqa. 16Nale 'uo ga'me ladic da'me 'uo ga'me a'vichiye, 'noota qom yataqata a'vichiye jena'me 'noota, qa'a jouaqatauelo naa'me noloqo'ote jo'ne yataqata qalache.
17Chane'eja ena'te ami chiyoĝo's, dite da'me yataqata anachoĝodeñiyot joñe'me Dios, qaedi ami yaloĝonalo joga'me 'noota ta'le a'vichiye. 18Ena'te ami taĝayaqa, qa'a gaa'me jo'ne jalcote da'me niyo'm male ja yayate'n joga'me yauote, dite da'me nach'e eta't anajeñe'teguet joñe'me Dios Lepaqal qaedi ami najaqachiguilo chayovida'a da'me ami yaloĝonalo yema joga'me auauoyi nale. 19Chane'eja nale ademiya'a't, a'uoñi naa'me nalaco jo'ne yodapecache, uotaĝa namaico jo'ne onaĝayaqa 'me ja 'nalo'te. Nach'e ena'am a'uonaĝañi qama'le yataqata a'nonaĝachiyegui joñe'me Qadejaliaĝanec. 20Nataq'aen nach'e eta't auañem da'me adamaiqui joñe'me Dios jo'ne mach'e Qadet'a, jouaĝat da'me ademii'teguet joñe'me Qadejaliaĝanec Jesucristo. 21Nataq'aen anecochiyapega't nale onolqa'tape da'me ami, yajouaĝat da'me yataqata a'nonaĝachiyegui joñe'me Cristo.
Gaa'me noua'
22Gaa'me yauo', 'noota ta'le yataqata yoqocha'alo jogaa'me loua', nach'e ena'am ta'le yoqochideta joñe'me Qadejaliaĝanec. 23Qa'a ga'me le'em naqaega jo'ne lajoĝola' jaga'me loua jo'ne ue'tajop, qa'a nach'e ena'am joñe'me Cristo, nach'eñe mach'e qadajoĝola' jo'ne qo'mi nec'alaĝatedegue, da'me qo'mi jo'ne qo'mi Dios lec'oqo'tepi. 24Chane'eja, gaa'me yauo', 'noota ta'le nach'e eta't yoqocha'alo jogaa'me loua', nach'e ena'am ta'le da'me qo'mi jo'ne qo'mi Dios lec'oqo'tepi yataqata joqochaĝa joñe'me Cristo.
25Gaa'me le'mi, 'noota ta'le yataqata noqopitalo gaa'me loua', qa'a nach'e ena'am ñe'me Cristo da'me qo'mi noqopitalo, qama'le qo'mi nep'aĝanegueta ca'li qoyalat, 26qama'le qo'mi 'yaĝatema da'me 'laqataĝanaĝac qaedi male yataqata e'n qo'mi loqo'te nataq'aen da'me qo'mi e'n yoqovite' da'me qo'mi qonachilaĝa'n, 27qaedi jonaqa'tajop joñe'me da'me 'uo da'me qat'onaĝac, male qo'mi onaĝayaqa nataq'aen yoqovite' nataq'aen 'noote'; yataqata ja qo'mi 'te 'nalo'te, qaya'te qanaviyaqataguec. 28Chane'eja gaa'me le'mi, 'noota ta'le yataqata noqopitalo gaa'me loua', ena'am ta'le yataqata noqopitela'ajalo nale, qa'a joga'me jiyaĝaua jo'ne yataqata noqopita jaga'me loua, nach'ega yataqata noqopitela't. 29Qaya'te jiyaĝaua ta'le ja noqopita da'me mach'e 'loyaĝac, dite da'me deque'e nale nataq'aen netelela't, nach'e naq'aeta joñe'me Cristo, yataqata qo'mi netelalo, da'me qo'mi jo'ne qo'mi Dios lec'oqo'tepi, 30qa'a onolqa'tape qo'mi jo'ne lapa'che ñe'me Cristo. 31Qoyediñe joca'li da'me Dios 'laqatac jo'ne enaac:
“Chane'eja joñe'me jiyaĝaua 'uo ga'me nolo' male ca'ae gaa'me let'al,
da'me equegue jaga'me en loua,
qama'le da'me nejiyaĝauayaĝa'j naa'me naajo' dojolqa male qoyen onolec.”
32Jena'me jenjo' 'naqatac yataqata let'adaic da'me uetaue 'me ja di'yoq ca'li, jo'ne jen tachigui joñe'me Cristo nataq'aen ga'me Dios lec'oqo'tepi. 33Qalaĝaja da'me dojo' 'naqatac nach'e ena'am yelo'teguet da'me noqopitaĝanaĝana't jogaa'me noua'. Chane'eja joga'me le'em, 'noota qom yataqata noqopita jaga'me loua, ena'am nale noqopitela't, qama'le jaga'me yauo, 'noota qom 'nonaĝachigui joga'me loua, yataqata lecochiya.
Currently Selected:
Ef 5: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina