Ef 4
4
'Noota ta'le onolec da'me qadepe'e ladic
1Chane'eja jayem jo'ne jayem necoñetaejec nayi qa'a jouaĝat joñe'me Qadejaliaĝanec, male yataqata ami ñachoĝodenouelo, 'noota ta'le yataqata anechoĝodeñela't, qa'a naq'aeta da'me ami qoyiyaĝanalo ca'li, qaedi oviyaue jena'me jenjo' Dios lec'oqo'tepi. 2Ena'te ami 'yoĝodenaĝayaqa, dite da'me 'noota qom yataqata ami joĝodayaqa naa'me adai'lidi' nataq'aen da'me anapogaĝadeñi. 'Noota qom auodenataĝañetac nale, chiyaqayi da'me adoqopich'ii. 3Yataqata a'nañaĝachi qaedi nach'e eta't ami uetauelo jena'me jenjo' 'nemaĝac jo'ne onaĝaic, qaedi ja qo'naĝat da'me 'lonataĝanaĝac joñe'me Dios Lepaqal jo'ne ami yemata'a't. 4Qa'a jena'me Dios lec'oqo'tepi onolec da'me 'loyaĝac, nataq'aen onolec ñe'me Dios Lepaqal jo'ne qo'mi uetauelo, nataq'aen onolec da'me jepagaqatapega, nach'eda da'me nec'alaĝac jo'ne Dios qo'mi yiyaĝanalo qaedi jaĝaue. 5Onolec joñe'me Qadejaliaĝanec, nataq'aen onolec da'me qadepe'e ladic, chayovida'a da'me onolec da'me nachilaĝanataĝanaĝac. 6Onolec joñe'me Dios jo'ne nach'eñe Let'a yema ga'me aleua laje'pi, nach'eñe jo'ne nejaliaĝatelo'te yema, nataq'aen t'onataĝanouelo yema, nataq'aen uetauelo yema.
7Male onolqa'tape qo'mi da'me joote qo'mi qoyanema gaa'me qadayatenaĝanaĝaco jo'ne naloqotenegueta gaa'me jo'ne Cristo jetaque qo'mi yanema. 8Naa'me nedii's jo'ne Dios 'laqatac enaac:
“Joñe'me yec'adije'ma ca'li di'me yataqata p'ajeguem,
da'me yaue'j jogaa'me necoñetae's jo'ne jalcote,
qama'le yauo'oe daa'me nayatenaĝanaĝaco jo'ne yanema onolqa'tape jena'me jiyaĝadipi.”
9Chane'eja, ¿jach'e jogamaĝa yelo'teguet jo'me 'naqatac jo'ne enaac da'me yec'adije'ma di'me yataqata p'ajeguem? Qa'a nach'eda yelo'teguet joñe'me jo'ne 'uaeñe da'me nenochi'ña jena'me jenjo' aleua jo'ne p'añe. 10Qama'le ñe'me jo'ne 'uaeñe da'me nenochiñe, nach'eñe jo'ne yitaĝa 'niyelaĝajeguem, yec'adije'ma di'me p'ajeguem qaedi da'me 'loyaĝac en najaĝaye q'aen ga'me na'ña. 11Qama'le nach'eñe jo'ne yauo'oe daa'me nayatenaĝanaĝaco jo'ne yanema jena'me jiyaĝadipi. Chane'eja uo'oe gaa'me qoyanema da'me 'lonata'j jo'ne Dios lamaĝa's, nataq'aen gaa'me laqaya' jo'ne Dios 'laqataĝanaĝanaqa, nataq'aen gaa'me laqaya' jo'ne qoyanema da'me 'yaĝa'tape da'me Dios 'laqatac, nataq'aen gaa'me laqaya' jo'ne yelolo'te jena'me Dios lec'oqo'tepi nataq'aen yapaĝague'tape. 12Ya'uo ca'li da'me dojo' qaedi yema da'me qo'mi jo'ne jouaqaue jena'me Dios lec'oqo'tepi, jo'ne nach'e ena'am ta'le qo'mi Cristo lapat, yataqata chimaqachiñe da'me qat'onataĝanaĝac, qaedi jauoqo 'lañaĝac ga'me qadepi'iyaĝa'u laqaya'. 13Qom naq'aeta qama'le yema da'me qo'mi qadalo'ta't da'me qademalegue jena'me onaĝaic qadepe'e ladic, qaedi yataqata jatetonaq joñe'me Dios Lec'oĝot, nataq'aen male yemta jovitaĝa da'me qo'mi p'etaqadayaqa jo'ne chimadichidiñe, chayovida'a da'me qadalaje'ma da'me 'loyaĝac joñe'me Cristo jo'ne yataqata ja 'nalegue. 14Male ja jenaqa'ama gaa'me ñoqolqa jo'ne nejouoĝodiñe nale daa'me lelnataĝaco qama'le ena'am ta'le ga'me layat yayoĝo'n. Da'me qo'mi qamqa'me male ja jaconaĝagueta gaa'me lapaĝaguenataĝanaĝaco gaa'me qovinaĝanaĝayaqa jo'ne ch'e yoqovi'n jena'me layi qaedi yejomaĝana'ape. 15Chane'eja 'noota ta'le da'me qadoqopich'i nach'ena qo'mi yaloĝo'talo qaedi nach'e eta't ja'aĝataĝatac da'me eja, chayovida'a da'me nach'e eta't ñaqaloĝodaqataje'ma joñe'me Cristo, jo'ne nach'eñe qo'mi nejaliaĝatelo'te yemeda naa'me noloqo'ote. 16Nach'eñe ñe'me Cristo jo'ne qo'mi yapotena't, qama'le qo'mi yodapecache male ena'am ta'le joqotaĝaguet joñe'me, nataq'aen yema ñecochaĝapega't. Chane'eja, qom naq'aeta qama'le ena'am ta'le yataqata ñaqaloĝodaqatajeguem, qama'le 'uo da'me qat'añaĝac jo'ne chiyaqayi da'me qadoqopich'i.
Da'me dalaĝaic qat'oyaĝac
17Da'me jayem lamaĝajec ñe'me Qadejaliaĝanec, qama'le nayi jenjo' ami ja'aĝatema: ami jachitatatapegalo ta'le ja auadenaĝachi gaa'me jo'ne ja p'iida'a joñe'me Dios, jo'ne que'teguelo gaa'me ch'e lelnataĝaco jo'ne ja 'noe'n. 18Naa'me naajo' jiyaĝa'u yataqata qaya'te yayaten, nataq'aen chiyoĝo's, nataq'aen yataqata qaya'te naquiaĝata, qama'le yataqata ja yateto'n da'me 'noyaĝac jo'ne chiyaqayi joñe'me Dios. 19Male yataqata ja nepoco', yataqata manaĝanaĝayaqa, qama'le nemedoue jodaa'me 'letaĝaloĝoco jo'ne yodapecache.
20Qalaĝaja ja naq'aeta da'me anapaĝaguenataguequi jo'ne chiyaqayi joñe'me Cristo. 21Qa'a ca'li yataqata auomachiiya da'me napaĝaguenataĝanaĝac jo'ne chiyoqo'ot ñe'me Cristo qama'le yataqata oquitapegue' da'me eja ladic jo'ne nach'ena nayi a'vichetac. 22Chane'eja ena'te yitaĝa auacoñiyeguet ga'me at'oyaĝaqui toijec jo'ne te'me ami 'naĝa't ca'li, jouaĝat gaa'me namaico jo'ne ja ejoda. 23Qama'le 'noota ta'le yataqata qoyadalaĝa't jogaa'me adelnataĝacodi', 24nataq'aen yataqata auacoñiyeguet da'me at'oyaĝaqui dalaĝaic jo'ne 'lonatac joñe'me Dios, qaedi male di'yoq da'me ami yataqatelo'te nataq'aen ami ja 'nalo'te.
25Chane'eja 'noota qom ja yitaĝa ami pecayaqa, dite da'me ami yataqatelo'te nale, anenaĝachiyegue da'me eja nale auojeyapegue'to gaa'me adaqayadi', qa'a qadalo'ta't da'me jouaqataue na'me 'loyaĝac ñe'me Cristo.
26Qom aualemataitac, ja 'noota ga'me adalemataiqui ami yaueguedoue da'me auauoyi ga'me adoequi; ena'te auen taue ga'me nolo' da'me aualemata, 27qaedi ja anajeñe'teguet da'me ami tauelo joñe'me payac.
28Joga'me jo'ne cachaĝaic ca'li, 'noota qom yaĝañi da'me lecachaĝac. Nach'edata da'me t'onataĝan nayi qaedi 'uo ga'me chiyaqayi, qama'le yaqanatet da'me lecochiyalo gaa'me louenaĝanaĝaco.
29Ena'te ja no'en nale ga'me anenaĝachidegue dite joda'me at'aqataqadi' jo'ne chimadichidiñe, qaedi alecochiiyalo jogaa'me domachita nale, qama'le nichiquetaye da'me lepe'e'. 30Ena'te aueñi totelegue joñe'me Dios Lepaqal jo'ne ja 'nalegue, qa'a naqaeñe joote ami 'yaneque da'me qoyen di'yoq queda'me ami lec'oqo'tepi joñe'me Dios. Nach'eñe jo'ne ami uetauelo chayovida'a qom yovita ga'me nolo' p'ategue qom Dios ami e'n uojotedañi.
31Aĝañiñi da'me anaucheñiya ga'me adaqayai; ena'te aualemataitac; ena'te aueloiquiitapega't; ena'te auachinataĝañilegue ga'me adaqayai uotaĝa ta'le a'uotañi nale. 32Dite da'me ami yataqatelo'te nataq'aen aueñi damichiguilo naa'me adai'lidi'; auapalaĝachi nale ga'me laviyaĝajet ga'me adaqayai, qa'a nach'e ena'am ñe'me Dios joote yapalaĝa't gaa'me mach'e qadaviyaĝaje'te, ca'li qo'mi nemelo'te joñe'me Lec'oĝot Jesucristo qaedi male qadec'alegue.
Currently Selected:
Ef 4: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina