Hch 12

Leleuaĝa di'me Santiago nataq'aen necoñetaguec ñe'me Pedro

1Jaa'me jaajo' noloqo'ote, ñe'me jaliaĝanec Herodes ya'uo necanague'j gaa'me p'etaqadayaqa. 2Damaĝajoĝolegue da'me qoyalatec ga'me daĝanaĝat di'me Santiago, jodi'me lanoqolec ñe'me Juan; 3qama'le da'me yauana da'me dojo' queda'me 'yamaqate'n joga'me judiopi, nach'e ena'am damaĝajoĝolegue qaedi qoyecoñe' ñe'me Pedro. Dojo' 'uo ca'li gaa'me noloqo'ote nale qo'nonaĝachigui da'me qoyalic jaga'me pan jo'ne qaya'te lale'gue. 4Ca'li yem da'me qoyecoñe', Herodes yamaĝaue jaga'me coñetaĝanaĝaiqui ñe'me Pedro, jo'ne ua'a da'me dieciséis gaa'me coico laje' qoye'n cuatro da'me uaĝayapega't qaedi yiviteda'a. Lelnataĝac da'me yaloĝonouelo ga'me jiyaĝadipi da'me yem ga'me nolo' jo'ne Pascua. 5Chane'eja Pedro netaue jaga'me coñetaĝanaĝaiqui, yataqachiñe qoyeviteta, qalaĝaja joga'me p'etaqadaiquipi ja yaĝadiñi da'me netametedapecot ñe'me Dios, nachoĝodetedalegue ñe'me.

'Uo ñe'me piyem le'ec yachiyoĝotaue jaga'me coñetaĝanaĝaiqui ñe'me Pedro

6Nach'ejo jo'me pi'yaq ca'li ga'me nete' da'me Herodes jetaque yaloĝonouelo ga'me jiyaĝadipi, Pedro t'ochetac uetauelo jogaa'me vitaĝayaqa, nalochiguilo naa'me loua' gaa'me qoyetaĝanaqa'te 'me laicaual, qaale gaa'me coico laje' laqaya' ueteda'uet ga'me coñetaĝanaĝaiqui najom da'me yeviteteda'a. 7Qanach'e di'yoĝoma ñe'me lamaĝajec ñe'me Jaliaĝanec jo'ne piyem le'ec, qama'le jaga'me coñetaĝanaĝaiqui yema yoqochiñe. Ñe'me piyem le'ec yepotauo'o ga'me lae ñe'me Pedro, noqotoĝon ca'li ñe'me, qama'le enaac: “¡Paja'a oñijeguem!” Paja'a ga'me netayelo naa'me loua' ñe'me Pedro 'naqadañe, 8qama'le ñe'me piyem le'ec enaac: “Auaidiñe naa'me adeuo nataq'aen adapela'te.” Pedro naq'aeta da'me ya'uo, qama'le ñe'me piyem le'ec yitaĝa enaac: “Auaiñe na'me adapoto qama'le jayem oquegue.”

9Pedro peta'uo ñe'me piyem le'ec, ja yayaten ta'le eja ga'me jo'ne piyem le'ec 'yetec, dite da'me eetapega yauana ga'me jo'ne qoyaloĝona. 10Qalaĝaja leuotalo'te gaa'me 'uaediñe vitaĝayaqa, yem gaa'me p'atedegue, qama'le ca'li yovideda'ya ga'me jom jo'ne laicaua 'me p'ateguet ga'me, qama'le ga'me jom mach'ega da'me 'nouategue, yenoĝodegue, ca'li napaquedalegue ga'me onolec noqoyaĝac, ñe'me piyem le'ec male yejamaĝat.

11Chane'eja Pedro yayaten, qama'le enaac: “Nayi male yataqachiñe jayaten ñe'me Jaliaĝanec queda'me namaĝaquena jo'me piyem le'ec qaedi jayem yejoye nataq'aen jayem lochaqatenalegue yema ga'me jo'ne Herodes nataq'aen yema ga'me judiopi jetaque jayem qo'yetec.” 12Mane'e da'me yetaden da'me dojo', Pedro yec'ata di'me María 'lachaqa', nach'añe lat'e ñe'me Juan lenaĝat laqaya Marcos, qayoĝode' gaa'me jiyaĝa'u ueteda'a jo'ne yema'a't da'me netame'tape. 13Yetouoqotape'uo ga'me jom 'me p'ayet ga'me noqoyaĝac, qama'le 'uo jaga'me namaĝaje jo'ne lenaĝat Rode yenoĝonegue qaedi dec'atenaĝane'ga ga'me. 14Ca'li yateto'n naa'me 'laqataqa ñe'me Pedro, qama'le queda'me yataqachiñe t'adaic da'me lamaic jaga'me qama'le ja 'youateguet ga'me jom, dite da'me naqalegaqauo da'me yechoĝot da'me Pedro dajo'taguet ga'me jom. 15Jogaa'me eedapega:

—¡Am jalaĝai!

Qalaĝaja jaga'me yachimaĝadejañe da'me yataqachiñe eja. Jogaa'me enapega't:

—Ja naqaeñe, dite ñe'me lepaqal.

16Qalaĝaja Pedro ja yaĝañi da'me yetouoqotape'uo ga'me jom. Chane'eja ca'li 'youatedegue qama'le yauata nataq'aen yoqochetem ca'li. 17Qalaĝaja ñe'me Pedro nodegue ga'me louaq qaedi 'yemadete', qama'le 'yaĝatema ga'me 'yetec ñe'me Jaliaĝanec da'me yachiyoĝotaue jaga'me coñetaĝanaĝaiqui, nataq'aen enaac:

—A'uaĝachiyem da'me dojo' ga'me Santiago, nataq'aen gaa'me qadaqaya'olqa laqaya'.

Yem qama'le yenoĝonegue nataq'aen dajoyi ga'me aleua laqaya.

18Ca'li joote nete', qama'le mach'egaua gaa'me coico laje' da'me ja niyamaĝatapega't, qa'a ja yayate'n ga'me eeta ca'li ñe'me Pedro. 19Herodes damaĝajoĝolegue da'me nemitaguec, qalaĝaja queda'me ja yaqanatet da'me yauana, qama'le yepoleguelo'te gaa'me vitaĝayaqa nataq'aen damaĝajoĝolo'te da'me qaedi qoyala't. Yenoĝonegue da'me dojo', Herodes ca'e di'me Judea qama'le dajoyi qaedi na'ña di'me Cesarea.

Da'me leleuaĝa ñe'me Herodes

20Herodes dalematatapegalo ca'li gaa'me 'lachaqa't di'me Tiro nataq'aen Sidón, qama'le jogaa'me nejoĝona't qaedi yec'adeta joñe'me. Qama'le queda'me nañoĝodeta da'me niyamaĝadenegueta ñe'me Blasto, jo'ne p'ajaye lecochaĝaua ñe'me jaliaĝanec Herodes, qama'le nach'eñe qochiyoĝotayi da'me qoyiyaĝanaque da'me 'lemaĝac, qa'a di'me Tiro nataq'aen Sidón chiyaqapi'ña da'me leuoyaĝac di'me 'naleua ñe'me jaliaĝanec. 21Qama'le 'uo jo'me nolo' qoyeque'ta, Herodes yaidiñe gaa'me leuo jo'ne lajaliaĝaqui', qama'le nañgui jaga'me neje'onaĝaiqui jo'ne lejaliaĝaiqui da'me ya'uo ga'me lojaĝac. 22Chane'eja ga'me jiyaĝadipi paja'a niyaĝajeguem:

—¡Jenjo' jo'ne doje ja ch'e jiyaĝaua, dite da'me nach'eñe dios!

23Qanach'ega ua'a da'me 'uo ga'me piyem le'ec jo'ne Jaliaĝanec lamaĝajec 'yetec ñe'me Herodes da'me 'uo ga'me lapite'nayaĝac, qa'a jouaĝat da'me ja 'nonaĝachigui joñe'me Dios, qama'le qoche'l yalic ca'li yeleu.

24Qalaĝaja da'me 'laqataĝanaĝac ñe'me Dios nichiquetaye nataq'aen qot'aqataĝatapema gaa'me ale'u lael.

25Ca'li Bernabé nataq'aen Saulo yoma't ga'me 'lonata'j di'me Jerusalén, qama'le 'viyelaĝategue di'me Antioquía. Nataq'aen yauegueta ñe'me Juan jo'ne nach'e ena'am qoyateto'n da'me Marcos.

Currently Selected:

Hch 12: TSN

Highlight

Copy