1 Co 5

'Noota qom qoyamaĝaye ga'me ja no'en da'me 'lonáĝac

1Ami yaqaya'olqa, ena'uac qo'yaĝatetac da'me ami uetauelo joda'me 'nonáĝac 'me ja no'en, queda'me 'uo ga'me ami uetauelo jo'ne 'uoneguet jaga'me mach'e lajoĝoua. Jenjo' 'nonáĝac ja no'en yataqachiñe lama'aja, chayovida'alo gaa'me Roma laje'pi ja yajete'n ta'le qoya'uo da'me dojo'. 2¡Ami qama'te ami 'yoĝodenaĝayaqa! Taqamachaĝa ami najaqachiguilo da'me adepocoĝoqui, chayovida'a auamaqayegue ga'me jo'ne ya'uo da'me dojo' 'me ami uetauelo nale ademiya'a't. 3Jayem mate mane'e qaya'a, ja ami 'te qoyoqo'talo, qalaĝaja nach'e eta't ami jenate'talo. Chane'eja joote jemaĝaguet ga'me jo'ne naq'aeta da'me 'yetetac, ena'am ta'le joote ami jouetauelo. 4Qom ademiya'a't, da'me ami jo'ne ademii'teguet ñe'me mach'e Qadejaliaĝanec Jesús, qama'le nataq'aen da'me yeuelyaĝac ami uetauelo, qama'le jaconaĝaguet da'me lañoqotaĝanaĝac ñe'me Qadejaliaĝanec Jesús 5qaedi qoyepataĝateguet ñe'me Satanás ga'me jiyaĝaua. Chane'eja qom qonolaĝachiñe ga'me lapat qama'le ga'me lepaqal qamqa'me nec'alegue qom 'niyelaq ñe'me Jaliaĝanec.

6Ja 'noota qom ami 'yoĝodenaĝayaqa. ¿Qo'li ja auayachiñe nale qoye'et jaga'me pan qama'le qoyen cat'olec ga'me nalequetenaĝanaĝat qalaĝaja yema yajediye q'aen ga'me nonañejec? 7Chane'eja nach'e naq'aeta qomle auajaqayiye ga'me toijec lale'gue jo'ne ja no'en 'me ami 'naĝa't, nach'egaua gaa'me toye's adoecodi', qaedi male ami yoqovite' jo'ne ademiya'a't nale, aueñiya'am jaga'me pan 'me nedochiñe qaya'te lale'gue jo'ne qoye'et nale qonetoneguet ga'me nolo' jo'ne Pascua. Qa'a nach'e ena'am joote qoyalat ñe'me 'naĝanaĝate c'oĝot, qaedi male qo'mi uojotedañi, nach'eñe Cristo. 8Chane'eja, da'me qat'oyaĝac ena'am nale qonetotapec ga'me nolo', qalaĝaja 'noota qom ja qolaqatelegue da'me ja no'en jo'ne ja yiyamaĝaden ñe'me Dios, da'me jo'ne ena'am jaga'me pan jo'ne uetaye ga'me nalequetenaĝanaĝat 'me toijec. Nach'edata da'me qolaqatelegue da'me yataqatelegue choqoda'me eja, da'me jo'ne ena'am jaga'me pan jo'ne nedochiñe qaya'te lale'gue.

9Ca'li ami jedenaqatenalo ga'me yediijec, ami ja'aĝatema queda'me 'noota qom ena'te ademiya'egueta jogaa'me jo'ne 'yetedac da'me nequejeguetaĝa. 10Qalaĝaja ja jetaque ja'aĝatema ena'uaque joga'me aleua laje'pi jo'ne 'yetedac da'me nequejeguetaĝa, uotaĝa ga'me pitaĝanaqataqaiquipi, uotaĝa ga'me cachaĝaiquipi, uotaĝa gaa'me p'iya'alo nale gaa'me nequi'ipi, qa'a jaldata qom oquiya'ae jena'me aleua qama'le eja auaqanachichi da'me ja adivichiyegueta ena'uaque naa'me naajo' jiyaĝadipi. 11Ja naq'aeta. Da'me jetaque ami ja'aĝatema ta'le ja ademii'teguet gamachaqaega qom mach'ega eetapela't adepi'iyaĝauai, qalaĝaja naqaega ga'me jo'ne 'yetetac da'me nequejeguetaĝa, uotaĝa pitaĝanaqataqaic, uotaĝa p'iya'alo ga'me ch'e 'nonataqa, uotaĝa aĝanataĝanaĝaic, uotaĝa lotaĝaic, uotaĝa cachaĝaic. Ena'te ademiya'egueta jogaa'me nataq'aen ena'te auajeñe'tema ta'le naqaegaua aneuanaĝa'udi' da'me aueque'eyi.

12Qa'a ja naqayem ta'le jemaĝagueta gaa'me jo'ne ja p'etaqadayaqa. Qalaĝaja, ¿qo'li ja 'noota ta'le auamaqayegueta gaa'me ja 'noe'n 'me ami uetauelo? 13Gaa'me jo'ne ja p'etaqadayaqa, ñe'me Dios nach'eñe yemaĝagueta jo' qomle jogaa'me. Qalaĝaja da'me ami, ena'am da'me 'yaĝatetac ga'me nediijec, eet'oi: “'Noota ta'le auamaqayeguet ga'me ja no'en 'me ami uetauelo.”

Currently Selected:

1 Co 5: TSN

Highlight

Copy