1 Co 4
4
Da'me 'lonataĝanaĝa'j jogaa'me Jesús lamaĝa's
1Jalcote 'noota da'me qo'mi auenache'talo, qo'mi jo'ne lecochaĝa'u ñe'me Cristo, nataq'aen qo'mi qo'yelopeque da'me qaedi jaloĝonaq da'me 'laqataĝanaĝac ñe'me Dios. 2Qa'a ga'me jo'ne yaconeguet da'me 'nelopaguec, 'noota ta'le yaloĝon queda'me eja nalo'taguet da'me yataqachiñe ye'et joga'me. 3Qalaĝaja jayem, ¿qo'li joote jayem yataqatelegue nalemaĝajet? Yataqachiñe eja queda'me ja jen 'te p'ajaye ga'me jo'ne jayem auec'achiñiyec, uotaĝa gamachaqaega jayem yec'atenec. Chayovida'a ja ja'amaqaten da'me mach'e ñec'atela't, 4qa'a da'me yelnataĝac queda'me qaya'te ja no'en ta'le ja'uo. Qalaĝaja ja naqaeda ta'le male chiyaqayi da'me jayem qoyen yataqatelegue, dite ñe'me Jaliaĝanec nach'eñe 'me jayem naloqoten. 5Chane'eja da'me ami, ena'te aueñi gamachaqaega adec'atenaĝanaĝaqui qom maliaĝa ja novitequena ga'me nolo' qom 'niyelaq ñe'me Jaliaĝanec; cha'li auajoyiya'a ñe'me Jaliaĝanec qom novi' qama'le nach'eñe yachiyoĝotaue ga'me 'lalaĝa ga'me jo'ne qoyoĝotetapiñe qaedi 'yoqotelegue q'aen. Qama'le qoyaloĝon ga'me jo'ne jalchi'ena yepaquetapegalo joga'me. Qom yem da'me dojo' qama'le nach'eñe ñe'me Dios yanema da'me qaedi qo'nonaĝachiguilo jogaa'me.
Ena'te ami 'yoĝodenaĝayaqa
6Ami yaqaya'olqa, ami ja'aĝatema da'me dojo' jo'ne jayem 'yaĝatetac choqoñe'me Apolo, qaedi ami yecochiyalo queda'me qo'mi adaloqotenaĝanaĝaqui, da'me ami japaĝaguenaĝaque da'me ena'te anapaquiyalegue ga'me jo'ne joote qoyediñe joca'li, qaedi ja avi'yoĝodiñetac nataq'aen qaedi qaya'te a'uotañetac. 7Jega, am yaqaya, ¿qo'li qoyen anapacalo'te jogaa'me adaqaya'olqa? Qalaĝaja ¡yema da'me dojo' jo'ne am ua'ajop nach'eñe Dios am yanem! Ta'le naq'aeta qom Dios am yanema naa'me naajo' uo'oe, qama'le qaya'te ladic ga'me at'aqatac ta'le auenapela't am 'noota jo'ne anapacalo'te ga'me adaqaya'.
8Qama'le ¿qo'li ami machidiñe q'ae'n queda'me joote anaviquila't ena'uac? ¿Qo'li male aueñiya'ama gaa'me jaliaĝanaqa jo'ne net'al, mate mane'e qo'mi ja naq'aeta? ¡Chiliajaĝa yataqachiñe eja da'me ami jaliaĝanaqa jo'ne net'al nayi qaedi ami yapajoĝogueta qama'le ena'uac qo'mi 'uo da'me qadejaliaĝa! 9Qa'a ñe'me Dios qo'mi yeloĝonaĝateda'a ga'me p'ategue, qo'mi jo'ne lamaĝa's ñe'me Cristo, qalaĝaja ena'am ta'le qo'mi qoyepolegueta da'me neleuaĝa, qaedi ena'uaque qo'mi qoyec'ate'n, jogaa'me piyem laje' nataq'aen joga'me jiyaĝadipi 'me aleua laje'pi. 10Qo'mi, queda'me qolaĝague ñe'me Jesús, ena'am ta'le qo'mi chiyoĝo's, ami qamqa'me ami yatenaĝanaĝayaqa queda'me oquiyegue ñe'me Jesús; qaya'te qat'añaĝac qalaĝaja ami qamqa'me ami 'uañaĝayaqa; ami qo'nonaĝachiguilo nale, qalaĝaja qo'mi qamqa'me qo'mi qo'yota'tape nale. 11Chayovida'a nayi 'uo da'me qadachoĝodec da'me qaya'te jaliguinaq, 'uo ga'me ua'a qadeliñiquip nataq'aen qaya'te qadoĝot 'me janaĝaiñe nataq'aen qo'mi qoyalate'tape nale, choqoda'me qaya ga'me mach'e yataqachiñe qat'achaqa'. 12Mate mane'e qadeliñi qalaĝaja qolaqatalegue da'me qat'onataĝanaĝac; mate mane'e ja 'noe'n gaa'me 'naqataqa 'me qo'mi qoyachalo'te, qo'mi qamqa'me jenaĝa 'noote' gaa'me qat'aqataqa nale ja'ataĝagueta jogaa'me; mate mane'e qo'mi qoyecaa'tape qalaĝaja qo'mi jejetaĝaguet. 13Mate mane'e qo'mi qoyejoue'tape qalaĝaja jenaĝa onaĝayaqa naa'me qat'aqataqa nale ja'ataĝagueta jogaa'me. Chayovida'a nayi jenaqa'am ga'me qoyeguem nale 'me paĝachigui, ga'me jo'ne aleua laje'pi yajaĝade'ga nale ga'me p'aye.
'Noota qom oqui'tegue da'me naloĝonataĝanaĝac
14Ami jedenaqatenalo jenjo' yediijec jo'ne ami ja'aĝatema gaa'me uo'oe yataqachiñe qalache, qalaĝaja ja naq'aeta ta'le ami je'etema qaedi ma'te adepocoĝoqui, dite da'me jetaque ami jaqatalo qa'a ena'am ta'le mach'e ami yalaqa. 15Qa'a nayi queda'me oquiyegue ñe'me Cristo male qayoĝode' gaa'me adajoĝola'chidi', qalaĝaja jaldata da'me 'uo ñe'me onolec jo'ne ena'am ta'le adet'ai. Ena'am ta'le naqayem da'me jayem adet'ai, qa'a nach'ayem ca'li ami ja'aĝatema da'me onaĝaic 'naqataĝanaĝac, chane'eja ami auep'iiya'a joñe'me Jesucristo. 16Qama'le ami ñachoĝodenoto queda'me oquiyegue ga'me jayem auec'achiñiyec. 17Qo'che' joote ami jamaĝalo ñe'me Timoteo, jo'ne joqopita, ena'am ga'me yalec 'me equegue ñe'me Jaliaĝanec, nataq'aen jep'etec ñe'me. Nach'eñe ami netouenaĝaneque qomle da'me yadic queda'me jequegue ñe'me Jesucristo, da'me jo'ne nach'e eta't japaĝaguenataĝanec ena'uaque gaa'me nemaĝaiqui' gaa'me jec'atapegalo.
18Uo'oe gaa'me joote 'yoĝodenaĝayaqa da'me ami, qa'a joga'me lelnataĝa'j da'me ja yitaĝa ami jovitalo. 19Qalaĝaja ja cop'a da'me ami jec'atalo, qom ñe'me Jaliaĝanec jayem yaje'tem, qama'le ja ñaquiaĝanalo gaa'me 'laqataqa jogaa'me 'yoĝodenaĝayaqa dite da'me jauana qom eja 'uo da'me 'lañaĝa'j jogaa'me. 20Qa'a ja naqaedaua daa'me ch'e 'laqataqa ga'me jiyaĝaua yaloĝon ta'le eja uetaue da'me Dios lejaliaĝa joga'me, dite da'me 'lonataqa. 21Jega: ¿jach'e ga'me a'uamaqachiñe ta'le ja'uo? Qom ami jejapichiyalo, ¿qo'li ja jodinataĝanac, uotaĝa jaloĝonalo da'me yoqopich'i da'me joĝodaic na'me yeuel?
Currently Selected:
1 Co 4: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina
