2 Timoteus 1
1
1Omukanda hembu mau dhi kwaame Paulus, omuyapostoli waKristus Jesus kehalo lyaKalunga, ontumwa okuhipulula omwenyo mbutwa udhikilwa moukumo naKristus Jesus.
2Me sonekele Timoteus ondele yandje omuhivilikwa.
Et̯ilonkenda nolweembya nouwa waKalunga Tate nowaKristus Jesus, Muhona wetu ngau kale naove.#Ovil. 16:1
Okuyandja ompandu nokuvandhipaleka
3Ame me pandula Kalunga, ngundji undapela, ngootateombwale hive mu undapela, andji na elityoo ndyaa kohoka. Ndji ku thipaluka momaalikano andje omutenya nout̯iku. 4Me thipaluka hiwa li awa etetha onkenda, mbe ku dhimbaluka ndji hala oku ku mona, opo ndji hulukwe. 5Me thipaluka okutya ove wa itavela tjatjili, u na eitavelo ngandyaa li nanyokomukulukadhi Loide nanyoko Eunike. Ndji tji i okutya olyo u na lyo.#Ovil. 16:1 6Iya me ku thipalukitha u kambule nawa otjali hiwa pewa kuKalunga, himbe ku tendeka omawoko. 7Iya Kalunga ke tu pele Ombepo yowoma, iya Ombepo yodhonkono, yohole, noyokuliyunga.
8Hó t̯a ohon̯i okuhipulula Muhona wetu, naame ngumba kambulwa mena lye, hó nt̯a ohon̯i. Hepa pamo naame mena lyokuteetha ondaka ombwa, Kalunga ngahi me ku pa odhonkono oku tji ninga. 9Kalunga we tu hupitha, ye we tu ithana, tu kale ovadhilikwa, hamena lyovilinga vyetu, iya omena lyontanto ye omwene nolyet̯ilonkenda lye ndyee tu pa otjali muKristus Jesus, tainkolo ouye háuya utwa. 10Et̯ilonkenda hendi napano lya holololwa kOmuhupithi wetu Kristus Jesus hiee ya, ngwaa han̯auna po et̯o, ha eta poluhandja omwenyo waapehe okupitila mondaka ombwa.
11Iya mba holowolwa, ndji kale omuyapostoli nomulongethi nomuteethi.#1 Tim. 2:7 12Ovipuka hembi vya ndjetela okutya ndji mone omaudheu, iya ame híme t̯a ohon̯i, mena lyokutya ngumba itavela ndji mu i. Ame ndji tji i okutya ye ma ulu okwaamena otjilinga himba un̯ikilwa katee ketango ndyoka lyathiinina. 13Kambulitha odhondaka odhombwa ndhiwa tyaa mwaame, dhi kale otjiholelwa, meitavelo nomohole ndjii li muKristus Jesus. 14Kambulitha ovipuka oviwa mbiwa pewa kOmbepo Ondhilikwa ndjii li munt̯e.
15Ove hehi u tji i okutya ovantu avehe moAsia, ngahi tji li Figelus naHermogenes, va nt̯iaa po. 16Muhona nga t̯ile onkenda onganda yaOnesiforus, mena lyokutya movikando ovingi wa ntendeleka, ye ka nt̯ile ohon̯i himba li momalyenge. 17Iya hiee ya moRoma, wa ntaendha unene, ha mbono. 18Muhona nge mu popile, a ka t̯ilwe onkenda kotjipala tjaMuhona katango me ke ya. Ove u tji i nawanawa atjihe soka Onesiforus hiaa ndingila, himba li moEfeso.
Currently Selected:
2 Timoteus 1: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.
