SEFANIA 2
2
Lidilululeni, etokolo lounyuni fimbo inali fika
1Akutu, oshiwana, ove iho fi ohoni, lidilulula! 2Fimbo ino tokolwa, efiku tali tuka po ngaashi olungu, fimbo inamu hangika koupyuhandu wOmwene, fimbo inamu hangika kefiku lehandu lOmwene. 3Kongeni Omwene, nye amushe ovalininipiki vomoshilongo, onye ava hamu diinine omayukifo aye. Kongeni ouyuki! Kaleni nokukonga elininipiko. Kashiimba tamu ka amenwa mefiku lehandu lOmwene. 4Osheshi Gasa otashi ka efiwa naAskelon tashi tokekwa. Asdod tashi teywa po mokati komutenya. NaEkron tashi ka dikulwa mo.
5Woo, oonakukala pomunghulo wefuta, oshiwana shOvakereti! Ondjovo yOmwene i nondubo naave, Kaanan, edu lOvafilisti, Ame handi ku hanauna po, paha kale vali nande omunhu. 6Ndele omunghulo wefuta ote ke u ninga oulifilo u nomifima dovafita noyuunda yeedi. 7Ndele omunghulo tau ka ninga ombinga yoshixupe yomeumbo laJuda. Oko vo otava ka lifa, tava ka nangala onguloshi momaumbo omuAskelon. Osheshi Omwene, Kalunga kavo, ote ke va tala nokulundulula okukala kwavo.
8Ame nda uda okudina kwaMoab nomasheko ovana vaAmmoni, ve a shekififa oshiwana shange nokulinenepekela oshitukulwa shavo. 9Osho hano ngaashi ndi nomwenyo, Omwene womatanga ovakwaita Kalunga kaIsrael ta ti: Moab otashi ka ningwa ngaashi Sodom, novana vaAmmoni ngaashi Gomorra, nokutya onhele youlilifa nomakango omongwa nombuwa fiyo alushe. Oshixupe shovanhu vange tave ke shi luwa novaxupifwa voshiwana shange tave ke va fyuulula.
10Osho otave shi ningilwa omolwelinenepeko lavo, osheshi ova sheka nova kala tava shishimana ovanhu vOmwene womatanga ovakwaita. 11Omwene ota ka kala omutiliki kuvo, osheshi ota hanauna po oikalunga aishe yokombada yedu, opo keshe umwe monhele yaye keenhunhu adishe doiwana ve ke linyongamene kuye nokwiilikana.
12Nanye yo Ovaetiopia, otamu ka tuwa keongamukonda lange. 13Opo Ye ota ka aneka okwooko kwaye langhele koumbangalanhu, ndele ta ka hanauna po Asiria, ndele ta tokifa Ninive, shi kale ngaashi ombuwa. 14Ndele meni loshilando oufita woimuna tau nangala neengudu doifitukuti i lili noi lili. Onyundu newanye tai nangala kombada yomitwe deengudi dasho. Udeni, nhumbi tai imbi momakende! Ehanauno li li poivelo. Osheshi omapeta omusederi Ye e a holola. 15Hano eshi osho oshilando shehafo, eshi sha kala shihe noshisho, eshi she lipopila momutima washo: Aame ou! Kape na nande umwe! Osho sha ninga ngahelipi hano ofuka, onghalelo yoifitukuti! Aveshe ava hava ende po tava sheke noku shi nipila okwooko.
Currently Selected:
SEFANIA 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
