SEFANIA 1
1
Efiku lehandu lOmwene
1Ondjovo yOmwene ya hanga Sefania yaKus yaGedalja yaAmarja yaHiskia pomafiku aJosia yaAmon, ohamba yaJuda:
2“Ame ohandi ka komba po oinima aishe kombada yedu, Omwene ta ti. 3Ame ohandi ka komba po ovanhu noifitukuti, ohandi ka komba po eedila dokeulu neeshi domefuta noipundukifo pamwe novadinikalunga. Heeno, Ame ohandi ka hanauna po ovanhu kombada yedu, Omwene osho ta ti.
4“Ndele handi ka anekela Juda noonakukalamo vomuJerusalem okwooko kwange. Ame ohandi ka dima mo yo monhele ei oixupe yaBaal, nomadina ovalongeli voikalunga pamwe novapristeli, 5naava have linyongamene kombada yeenduda nokwiilikana eengudu dokeulu, naavo have linyongamene nokwiilikana Omwene nokwaana kuye ndele hava ane yo kuMilkom, 6naava yo va efa Omwene, ndele itava kongo Omwene, ndele itave mu pula.”
7Limweneneneni koshipala shOmwene Kalunga! Osheshi efiku lOmwene li li popepi. Osheshi Omwene okwa longekida etomenoyambo ndele a yapula ovashivwa vaye. 8Mefiku tuu olo letomenoyambo lOmwene, Ame ohandi ka kongolola omalenga novana veehamba naaveshe ava hava djala oikutu yokoilongo. 9Mefiku linya handi ka kongolola yo aveshe ava hava nhuka nokutauluka oshikulo shoposhi, hava yadifa ongulu yomwene wavo etinho nekengelelo.
10Mefiku tuu olo, Omwene ota ti, ekuwaano tali udika pOshivelo sheedi, nelilaano kOshilando shipe, nehanauno linene koikulundudu! 11Lileni, nye oonakukalamo monhele ei hai ifanwa Oshini, osheshi ovalandifi aveshe tava ka hanaunwa po naaveshe ava va yeleka oimaliwa tava ka kombwa po.
12Ndele mefimbo tuu olo Ame ohandi ka hadahada Jerusalem neelamba, ndele handi ka kongolola ovalumenhu ava va pamekwa konhafi yavo, ava hava ti momitima davo: “Omwene ita ningi nande ouwa ile owii.” 13Noupuna wavo otave ke u nyekwa nomaumbo avo taa ka hanaunwa po. Nongeenge tava diki omaumbo, vo itava ka kala mo. Nongeenge tava twike oikokola yomiviinyu, vo itava ka nwa omaviinyu ayo. 14Efiku linene lOmwene oli li popepi! Heeno, opopepi li li, ndele tali endelele okufika! Pwilikineni! Efiku lOmwene! Omuladi ota kuu unene. 15Efiku olo efiku loupyuhandu, efiku loluhepo noloudjuu, efiku lehanauno nolenyonauko, efiku lomilaulu noloshiwiwili, efiku loilemo nolomidimbi, 16efiku leshiko lenghuma loita okukuwila oilando ya pama, neehoteshungo dile domashakeneno. 17Novanhu ohandi ke va twala moudjuu unene, ndele otava ka elaela ngaashi ovapofi, osheshi ova nyona kOmwene. Nohonde yavo otai ka tilwashi ngaashi ondwi, naashi shomeni ngaashi onyata. 18Oshingoldo noshisiliveli shavo itashi dulu oku va xupifa mefiku loupyuhandu wOmwene. Ndelenee omundilo wouladi waye otau ka lungwinifa po edu alishe. Osheshi ehanauno nexulilo lombadilila ote li undulile oonakukalako aveshe kombada yedu.
Currently Selected:
SEFANIA 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
