SAKARIA 4
4
Emoniko loshikwatelwashela noleemono mbali
1Ndele omweengeli wOmwene ou kwa li a popifa nge, e uya vali ndele a pendula nge ngaashi omunhu ta pendulwa meemhofi. 2Ndele ye okwa tya kwaame: “Ou wete shike?” Ame nda nyamukula: “Ndi wete oshikwatelwashela shoshingoldoelela, nokombada yasho oshiyuma shasho shomaadi neelamba dasho heyali kombada yasho nominino heyali da tondokifila mo omaadi meelamba da kala kombada yasho. 3Kombinga nombinga yasho kwa li ku nomiti mbali deemono, umwe kolulyo loshiyuma shomaadi naumwe kolumosho lasho.” 4Opo nee ame onda hovela okupopifa omweengeli ou a popya naame, ndele handi ti: “Omwene wange, eshi otashi ti ngahelipi?” 5Ndele omweengeli ou a popya naame okwa nyamukula nge, ndele ta ti: “Ku i shii, nokutya oishike?” Ndele ame nda tya: “Aaye, Omwene wange.”
6Opo nee ye okwa nyamukula ndele ta ti kwaame: “Ondjovo yOmwene kuSerubbabel oyei, nokutya: Hakeenghono ile kefininiko, ndelenee okOmhepo yange, Omwene womatanga ovakwaita ota ti. 7Omhunda ove inene, oove lyelye? Koshipala shaSerubbabel ove u nokuninga olufilu! Ndele emanya leshakenifo ye ote ke li tula ponhele yalo fimbo tapa kuwililwa pombada: ‘Iyaloo! Iyaloo! Onghenda kulo!’ ” 8Ndele ondjovo yOmwene ye uya kwaame ndele tai ti: 9“Omake aSerubbabel okwa tungila ongulu ei ekanghameno layo nomake aye otae i mane oku i tunga. Opo nee ove to ke shi shiiva, kutya Omwene womatanga ovakwaita okwa tuma nge kunye. 10Osheshi olyelye ta dini efiku lomahovelo manini, omesho enya aheyali Omwene oo haa kevauka edu alishe, eshi taa tale nehafo oholongodi meke laSerubbabel?” 11Opo ame nda hovela okupopya, ndele handi ti kuye: “Omiti edi mbali di li kolulyo nokolumosho loshikwatelwashela, otadi ti ngahelipi?” 12Ndele ame nda popya vali naye, ndele handi ti kuye: “Omashila avali eemono, e li kominghulo dominino mbali doshingoldo tadi tondokifa omaadi oshingoldo, otaa ti ngahelipi?” 13Opo nee Ye okwa nyamukula nge ndele ta ti: “Ku i shii nokutya oishike?” Ndele ame nda tya: “Aaye, Omwene wange.” 14Ndele Ye ta ti: “Ovo ovavaekwa vavali hava kala ofika koshipala shOmupangeli wedu alishe.”
Currently Selected:
SAKARIA 4: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
