OMAPSALOME 18
18
Eimbilohambelelo kOmwene
Epsalme laDavid, la pewa enyakwa lolwiimbo. David, omupiya wOmwene, ou e li mu imbila kefiku olo, Omwene e mu xupifa kovatondi vaye aveshe nomeke laSaul. Ye okwa tya:
1Omwene, ondi ku hole nohole yokomutima,
Oove eenghono dange.
2Omwene Oye emanya lange la pama,
nohotengulu yange, nomuxupifi wange.
Kalunga kange
Oye omhunda yange yehondamo
oko handi tondokele,
Oye oshikelelifo shange,
noluvinga lexupifo lange,
nohote ya kolelela.
3Ohandi ifana Omwene,
nokovatondi vange ota xupifa nge;
Omwene na hambelelwe!
4Eengodi defyo oda dingilila nge,
neemwiyo dehanauno oda halukifa nge.
5Omapando omoshilongo shovafi a manga nge,
nomalulo efyo a wila nge.
6Moudjuu wange nda ifana Omwene,
nda kuwila Kalunga kange onghuwo.
Ye okwa uda ondaka yange motembeli yaye,
nonghuwo yange ya fika momatwi aye.
7Opo edu la hovela okukakama nokukakamenena,
nomafina eemhunda a nyenganyengifwa,
ndele tadi tengaukile keembinga neembinga;
osheshi Ye okwa li a uda onya.
8Omwifi wa lundumuka meyulu laye,
nomundilo mokanya kaye,
nomutemo womakala wa ndwafuka muye.
9Okwa endamekele eulu nokwa kolokela poshi,
nomulaulu woilemo wa li koshi yeemhadi daye.
10Okwa enda kombada yomukerubi,
nokwa tukifwa nomavava omhepo;
11Omulaulu okwe u ninga oshuuviko shaye,
omeva oilemo ilaula, e e lidingililifa.
12Moshinge shokomesho yaye,
omo mwa li mwa undulwa eemhawe nomakala a hanya.
13Opo Omwene okwa ndunduma meulu,
nondaka yaau wOkombadambada ya udika.
14Nokwa umbile oikuti yaye, e va hanaune po,
ndele ta shelifa omaluvadi mahapu,
ndele te va halukifa.
15Noukukutu woposhi womefuta wa monika,
omakanghameno ounyuni a holoka poluhaela
omolwomahanyeno Omwene,
16Ye okwa li a lovelela nge neke laye,
e li pombada, a kwata nge,
ndele ta shili nge mo meyelu linene,
17ndele okwa vakula nge
meke lomuyelani wange omunaenghono
nomovatondi vange,
ava va li ve dule nge eenghono unene.
18Vo ova homona nge mefiku lomupya wange,
ndelenee Omwene okwa ninga
omuyambididi wange.
19Okwa kufa nge pofina,
ndele ta twala nge poluhaela pa yela sheke,
okwa nakula nge mo,
molwaashi a hokwa nge.
20Omwene okwa pa nge pauyuki wange
ndele ta punike nge paukoshoki womutima wange.
21Osheshi eendjila dOmwene onde di diinina,
nokuKalunga kange inandi amuka po,
ndi ye mouhenakalunga.
22Osheshi ame nda konenena oipango yOmwene;
noinandi twa omhata nomalombwelo aye.
23Ndelenee mokukala naye
nda li ndihe na ombudi,
nonda li nde lilungamena koilonga ii;
24onghee nee Omwene
a alulila nge pauyuki wange,
nopaukoshoki womutima wange.
25Osheshi kwaau omunefilonghenda
oto limonifa oove mwene omunefilonghenda
nokomulumenhu omuyuki
oto kala yo omuyuki,
26kovakoshoki oumukoshoki,
ndelenee kovanaihelele,
to limonifa mwene ove wa lunduluka.
27Osheshi Oove ou to xupifa oshiwana she lininipika,
ndelenee kovalinenepeki oove omufifimani.
28Osheshi Ove to efele olamba yange okuminikila;
Omwene Kalunga kange
ota minikile momulaulu wange.
29Heeno, ngeenge ndi li pamwe naave,
ohandi totele ongudu yoimhulu;
pamwe naKalunga kange
ohandi nhuka engholo.
30Ondjila yaKalunga oya wanenena;
ondjovo yaKalunga oya yelifwa;
Oye oshikelelifo shaaveshe
ava have liameke kuye.
31Osheshi Kalunga kamwe
okelipipo mbela ponho yOmwene ou,
nemanya lexupifo olilipipo,
lihe fi Kalunga ketu aeke?
32Kalunga ou ta dike nge eenghono,
ndele ta wapeke nokuwanifa ondjila yange,
33nota pameke eemhadi dange
ngaashi oholongo,
ndele ta kaleke nge koikulundudu.
34Nomake ange ote a longo okulwa,
opo omaoko ange a shiive
okulukila outa woshikushu.
35Omwene owa amena nge nowa xupifa nge;
ekwafo loye ola nenepeka nge.
36Omanha ange owe a longela
onhele ya mbwalangadja,
opo eemhadi dange diha fenhuke.
37Ame nda taataa ovatondadi vange,
ndele nde va ta,
ndele inandi va aluka fiyo nde va mana po.
38Onde va nyanyaula po, itava fikama po vali,
vo ova wila koshi yeemhadi dange.
39Ove wa dika nge eenghono dolwoodi,
okufinda ovatondadi vange.
40Ovatondi vange owe va kukumifa po,
va ya onhapo,
naaveshe ava hava tondo nge,
onde va halakanifa.
41Ova kuwile onghuwo,
ndelenee kai tondokelwe komuxupifi;
ova ifana Omwene,
ndele ine va nyamukula.
42Onde va lyataula va fa ondwi tai i omhepo,
nongaashi oushosho
tau kombwa momaluvanda.
43Ndele Ove wa xupifa nge
meemhata dovanhu vange;
Ove wa ninga nge omupangeli woiwana.
Ovo inandi shiiva va ninga
ovapangelwa vange.
44Ovanailongo tava komonene nge omitwe.
Mokuuda ondaka yange,
ova dulika kwaame.
45Ova kanifa eenghono davo,
nomokukakama tava hondoloka
meehotengulu davo.
46Omwene Oye omunamwenyo!
Emanya lange nali fimanekwe.
Udifeni pombada ounene waKalunga
omuxupifi wange!
47Kalunga okwa pa nge okufinda
ovatondadi vange;
a tula oiwana koshi yange,
48noto kufa nge movatondi vange,
ndele to tula nge kombada
yovashindanhu vange,
ndele to mangulula nge
momulumenhu oshimhulu.
49Omwene, handi ku fimaneke mokati koiwana,
ohandi imbi etumbalo loye.
50Ove ou to yandje kohamba yoye omafindano manene,
nomuvaekwa woye to mu ningile onghenda,
oDavid nodikwa yaye aishe fiyo alushe.
Currently Selected:
OMAPSALOME 18: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
