JEREMIA 30
30
Exupifo laJuda nolaIsrael tali xunganekwa
1Jeremia okwa hangika kondjovo ya dja kOmwene ndele tai ti: 2Omwene Kalunga kaIsrael osho ta ti: “Eendjovo adishe odo nde di ku lombwela di shangela membo. 3Osheshi tala, omafiku otae uya, Omwene ta ti, ohandi ka lundulula osho sha hanga oshiwana shange Israel naJuda, ndele ohandi ke va alulila kedu olo, nde li pa ooxekulu va kale mo, ndele otave ke li nangala, Omwene osho ta ti.”
4Eendjovo odo tuu odo Omwene e di tonga tadi popi Israel naJuda. 5Omwene ota ti ngaha:
“Ame onda uda ondaka yonghuwo, ope netilo, kape nombili. 6Puleni nye mu tale, omulumenhu ngeenge oha dala? Ovalumenhu aveshe oshike ndi va wete ve likwete peembuda ngaashi ovadali, nomolwashike oipala aishe oya pemba? 7Woo! Efiku olo olinene shili, itali yelekwa nalikwao. Olo efimbo lokuhepekwa kwaJakob, ndelenee ye ota ka xupifwa mulo.”
8Ndele mefiku tuu olo Omwene womatanga ovakwaita ota ti: “Ondjoko yokofingo yoye ohandi i teya po, neestropa ohandi di tokola. Novanailongo itave mu longifa vali. 9Ndelenee otava ka kala nokulongela Omwene Kalunga kavo naDavid, ohamba yavo, ou Ame handi ke mu va nyumunina.
10“Ndelenee oove omupiya wange Jakob, ino tila, Omwene osho ta ti, naIsrael, ino kakama, osheshi tala, Ame ohandi ke ku xupifa medu lokokule, noludalo loye omedu olo wa li wa pongela mo. Ndele Jakob ota ka aluka nokukala nombili netulumuko, ehe na ou te mu tilifa. 11Osheshi Ame ondi li pwoove, Omwene osho ta ti, nohandi ku xupifa. Osheshi oiwana aishe ei nde ku halakanifila mokati kayo, ohandi ke i mana po sheke. Ndelenee itandi ku mane po, ndelenee ohandi ku handukile nondjele, ndelenee itandi ku efa inandi ku handukila.”
12Osheshi Omwene ota ti: “Okuteka kwoye okwii, oshipute shoye tashi luluma. 13Kape nomunhu te ku yukifile eendjovo doye. Nokape na nande omuti wokuhakulifa oshidinda shoye. Kape neveluko kwoove. 14Ovaholike voye aveshe ove ku dimbwa. Vo itave ku pula vali. Osheshi Ame onde ku denga ngaashi omutondadi ta dengwa nehandukilo lidjuu, osheshi okunyona kwoye okunene nomatimba oye omahapu. 15Oto kemene shike oshiponga shoye, noudu woye itau dulu okuveluka, eshi nde ku ninga ngaha, onde ku ningila omolwounene wokunyona kwoye nomolwouhapu womatimba oye.
16“Onghee hano aveshe ava tave ku li, otava ka liwa po, naaveshe ava tave ku hepeke, otava ka ya moukwatwa, naava ve ku nyeka, navo yo otava ka nyekwa, naaveshe ve ku hakana ohandi ke va yandja oshihakanwa. 17Osheshi Ame ohandi ke ku hakula. Ndele handi velula oipute yoye, Omwene osho ta ti, osheshi ove ku ifana ‘omuhengwa’, Sion, kape na ou te ku pula.”
18Omwene osho ta ti: “Tala, ohandi lundulula okukala kwomatwali aJakob nohandi ka fila omaumbo avo onghenda, oshilando opo shi tungululilwe konduba yomakulukuma asho nongulu youhamba i nangalwe ngaashi nale. 19Ndele mo omu nokuudika omaimbilo omahambelelo nondaka yoonakunyakukwa. Ndele Ame ohandi ke va hapupalifa vaha ninipale, nohandi va fimanekifa vaha kale vali oonakudinwa. 20Ndele ovana vaye ovamati otava ka kala ngaashi shito nale, eongalo laye otali ka kala la pama koshipala shange. Ndele Ame ohandi ka handukila ovahepeki vaye aveshe. 21Muye mwene otamu di omupangelinghono nomuvo vene otamu holoka ovapangeli. Ndele Ame ohandi ke mu itavelela okuuya mwaame, opo ye a shiive okweehena kwaame. Osheshi olyelye ngeno e shii okweehena kwaame, ye a yandje omwenyo waye, Omwene osho ta ti? 22Ndele onye otamu ka ninga ovanhu vange mwene, Ame ohandi ningi Kalunga keni.” 23Tala, oshikungulu shOmwene otashi tukuluka, oupyuhandu wa handuka, okafudaela taka pepe neenghono komitwe dovadinikalunga. 24Ehanyo lehandu laKalunga itali ka pola fiyo ota longo, ndele ta wanifa eemhangela dokomutima waye. Ndele nye otamu ke shi shiiva pomaxulilo omafiku.
Currently Selected:
JEREMIA 30: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
