JEREMIA 29
29
Onhumwafo yaJeremia e i shangela eenghwate domuBabilon
1Eendjovo odo edi donhumwafo oyo omuxunganeki Jeremia ei i tuma, ya dja muJerusalem, e i tumina ovakulunhu veenghwate ovo va hangika ve nomwenyo natango novapristeli novaxunganeki novanhu aveshe, ava Nebukadnesar e va kufa muJerusalem nokwe va twala kuBabilon, 2konima yaasho ohamba Jekonia nomumbada nomalenga novakulunhu vomuJuda novomuJerusalem novahambwidi novahambuli voiidilifo, eshi va dja mo muJerusalem. 3Onhumwafo okwe i tumikida Eleasa yaSafan naGemarja yaHilkia, ovo Sedekia, ohamba yaJuda e va tuma kuNebukadnesar, ohamba yaBabilon, kuBabilon ndele tai ti ngaha: 4“Omwene wovakwaita, Kalunga kaIsrael, ota lombwele ngaha eenghwate adishe odo nde di kufa muJerusalem nonde di tembula muBabilon: 5Dikeni omaumbo, mu kale mo, twikeni oikunino, nye mu lye oiimati yayo. 6Homboleni ovakainhu, nye mu dale ounona ovamati noukadona, novana veni oukadona va hombolwe kovana veni ovalumenhu vo va dale ovamati noukadona. Hapupaleni ko, inamu ninipala. 7Ndele oshilando osho nde mu twala eenghwate, shi haleleni ouwa nye mu shi ilikanene kOmwene, osheshi ombili yasho oyo ombili yeni yo. 8Osheshi Omwene womatanga ovakwaita, Kalunga kaIsrael, ota ti: ‘Taleni, muha kotokelwe kovaxunganeki ava hava kala mokati keni nokeemhule deni, nye inamu lineekela eendjodi davo. 9Osheshi vo otave mu xunganekele oipupulu medina lange; Ame inandi va tuma, Omwene osho ta ti.’
10“Osheshi Omwene ota ti ngaha: ‘Omido 70 domuBabilon nge da xula, Ame ohandi ke mu dimbulukwa noku mu wanifila eudaneko lange liwa, ndi mu alulile ponhele ei. 11Osheshi omadiladilo ange nde e mu diladilila ondi a shii, Omwene osho ta ti, omadiladilo ombili, hao omupya. Ame ohandi mu pe efimbo lokomesho pamwe neteelelo liwa. 12Opo nee nye otamu ka ifana nge ndele tamu ke uya ko ndele tamu ilikana nge, ndele Ame handi ke mu uda. 13Ndele onye otamu ka konga nge, ndele tamu mono nge, ngeenge tamu kongo nge nomutima weni aushe. 14Ndele Ame handi itavele, mu mone nge, Omwene osho ta ti, nonda hala oku mu alula moupika weni nohandi mu kongolola mo moiwana aishe nomeenhele adishe, oko nde mu undulila ko, Omwene osho ta ti. Ndele handi ke mu shunifila konhele oyo nde mu tele ko, eshi nde mu twala moukwatwa.’
15“Onye ngeenge tamu ti: ‘Omwene okwe tu papudulila ovaxunganeki muBabilon,’ 16opo nee Omwene ta ti ngaha mokupopya ohamba i li omutumba kolukalwapangelo laDavid novanhu aveshe ve li moshilongo eshi, ovamwaxo ovo inava ya pamwe nanye moukwatwa; 17Omwene womatanga ovakwaita ota ti: ‘Tala, Ame ohandi va tumine eongamukonda nondjala noudu wolutapo, nohandi va ningi ngaashi eenghwiyu da nyonauka, itadi liwa. 18Ndele Ame ohandi ke va shikulifa eongamukonda nondjala noudu wolutapo, nohandi ke va ninga etilifohaluko momauhamba aeshe kombada yedu, notava ningi efingo noixuna nesheko noiyolifa mokati koiwana aishe oko handi va tumine ko, 19osheshi inava pwilikina eendjovo dange, Omwene osho ta ti, eshi Ame inandi fya ounye efiku nefiku moku va tumina ovapiya vange ovaxunganeki. Ndelenee nye inamu pwilikina, Omwene ta ti.’ 20Ndelenee onye ovapika amushe, pwilikineni eendjovo dOmwene, onye amushe ovo nde mu kufa muJerusalem nonde mu twala kuBabilon. 21‘Omwene womatanga ovakwaita, Kalunga kaIsrael, mokupopya Ahab yaKolaja naSedekia yaMaasea, ava have mu xunganekele oipupulu medina lange, Ye ota ti: Tala, Ame ohandi va yandje momake aNebukadnesar, ohamba yaBabilon, ye ote ke va dipaifa moipafi yeni. 22Ndele vo otava ka ninga ondjovo yefingo keenghwate adishe domuJuda, di li muBabilon, tapa tiwa: “Omwene ne ku ninge ngaashi Sedekia naAhab, ovo va yofwa momundilo kohamba yaBabilon,” 23osheshi ova longa oshilonga shoixuna muIsrael nova haela novakainhu vookaume kavo, nova popya eendjovo medina lange inandi di va lombwela. Ndele Ame ou ondi shi shii, Aame ondobwedi, Omwene osho ta ti.’ ”
24Ndele Shemaia, Omunehelami mu lombwela u tye: 25“Omwene womatanga ovakwaita, Kalunga kaIsrael, ota ti: Ove eshi wa tuma onhumwafo ei medina loye kovanhu aveshe ve li muJerusalem nokomupristeli Sefania yaMaasea nokovapristeli aveshe notai ti: 26‘Omwene okwe ku lenga u ninge omupristeli ponhele yomupristeli Jehoiada motembeli yOmwene, opo mu kale ovataleli vokupashukila omalai aeshe novaxunganeki, u va tule meti, ove u va mangife omalyenge mofingo. 27Omolwashike ino hanyena omuxunganeki Jeremia, Omuanatot, ou te mu xunganekele? 28Onghee hano okwe tu tumina ondaka ei kuBabilon, tai ti: “Natango oku na omafiku mahapu. Dikeni omaumbo mu kale mo, twikeni oikunino mu lye oiimati yayo.” ’ ” 29Ndele onhumwafo ei oya leshelwa momatwi omuxunganeki Jeremia komupristeli Sefania. 30Opo nee ondjovo ei yOmwene oya hanga omuxunganeki Jeremia ndele tai ti: 31“Shangela eenghwate adishe ondjovo ei ove u tye: ‘Omwene ota popi Shemaia, Omunehelami ngaha: Shaashi Shemaia e mu xunganekela, Ame nande inandi mu tuma, nokwa hongaula mu lineekele oipupulu, 32onghee Omwene ta ti. Tala, Ame onda hala okuhandukila Shemaia, Omunehelami noludalo laye. Ye ota ka kala ehe namukwao, ou ta kala mokati kovanhu ava. Omesho aye itaa ka tala ouwa ou handi ke u ningila oshiwana shange, Omwene osho ta ti, osheshi ye okwa udifa eliteeko okuliteeka Omwene.’ ”
Currently Selected:
JEREMIA 29: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
