JEREMIA 20
20
Jeremia ta tulwa meti ndele ta kemene oshilonga shaye
1Ndelenee omupristeli Pashur yaImmer, ou a li omukeleli omukulunhu wotembeli, a uda Jeremia ta xunganeke eendjovo edi, 2opo nee Pashur okwa denga omuxunganeki Jeremia ndele te mu tula meti la li mOshivelo shokombada shaBenjamin opongulu yOmwene. 3Ndelenee mefiku la shikula Pashur okwa kufa mo Jeremia meti. Opo nee Jeremia okwe mu lombwela ta ti: Omwene ite ku ifana edina loye Pashur, ndelenee Etilohaluko-keembinga-adishe! 4Osheshi Omwene osho ta ti: Tala, ohandi ku ningi oshihalukifo kwoove mwene nokookaume koye aveshe. Ndele otava ka fya moipafi yoye keongamukonda lovatondadi vavo, ndele Juda alishe ohandi li yandje meke lohamba yaBabilon ndele te va twala kuBabilon, ndele te va dipaa neongamukonda. 5Noupuna aushe womoshilando eshi noulinawa washo aushe noinima yomusho aishe i nondilo, heeno, omamona aeshe eehamba daJuda ohandi ke a yandja meke lovatondadi vavo, ndele vo otave a ongele kumwe ndele tave a twala kuBabilon. 6Ndele oove, Pashur, noonakukalamo aveshe vomeumbo loye, otamu ka twalwa moupika, ndele ove oto ka ya kuBabilon, oko to ka fila noko to ka pakwa, ove nookaume koye aveshe ava we va xunganekela oipupulu.
7Omwene, Ove wa heka nge, naame onda dimina, Ove owa kwata nge, ndele wa dula nge eenghono. Ame onda ninga oshiyolifa omutenya aushe, aveshe tava sheke nge. 8Osheshi keshe efiku ame ondi nokupopya, ame ndi nokukwena nokwiingida enyeko nehanauno, osheshi ondjovo yOmwene oya tukifa nge noya shekifa nge omutenya aushe. 9Ndelenee eshi nda tya: Ame inandi hala vali oku mu diladila noinandi hala vali okupopya medina laye, opo nee momutima wange omwa fa mwa xwama omundilo tau xwike wa kwatelelwa momakipa ange. Ame onda hetekela oku u lididimikila fiyo nda loloka, ndelenee nda nyengwa. 10Osheshi ame onda uda omalundilo avahapu, omatilifo keembinga adishe! Mu hololeni! Natu mu holole! Nookaume kange aveshe tava kala nokunangela nge, ndi punduke. Vo otava ti: Kashiimba tashi dulika a tulwe moulai, nena hatu mu dulu eenghono ndele hatu polifile muye ehandu letu. 11Ndelenee Omwene Oye oku li pamwe naame ngaashi omuladi omunaenghono. Onghee ovataataai vange tava ka punduka, vo itava dulu sha. Ove nokufifwa ohoni shili, osheshi inava kala neendunge. Elengaifo lavo otali kala alushe, itali dimbuwa. 12Ndelenee, Omwene womatanga ovakwaita, Ove ou to konakona omuyuki, oho tale neefiyo nomutima. Itavela, ndi mone ehandu loye kuvo, osheshi eyukifilo moshinima shange onde li ku efela. 13Imbileni Omwene! Hambeleleni Kalunga, osheshi Oye a xupifa omwenyo wohepele momake ovakolokoshi.
14Efiku olo nda dalwa nali fingwe, nefiku olo meme a dala nge nali kale inali nangekwa noupuna. 15Na fingwe omulumenhu ou a etela tate eenghundana dehafo nokutya, ove wa dalelwa omona okamati, nokwe mu hafifa pombada. 16Heeno, omulumenhu ou na ningwe ngaashi oilando inya ya hanaunwa po kOmwene ehe nonghenda. Na ude onghuwo mefimbo longula neweelelo loita omutenya, 17osheshi ye ina dipaela nge medimo lameme, ngeno meme a ninga ombila yange, oufimba waye ngeno wa kala fiyo alushe. 18Omolwashike ame onda pita mo medimo lameme ndi mone oudjuu noluhepo, ndi xulife omafiku ange nokufifwa ohoni!
Currently Selected:
JEREMIA 20: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
