JEREMIA 19
19
Okuhanaunwa po kwaJuda ongaashi oshiyuma
1Omwene okwa popya ndele ta ti ngaha: Inda u ke lilandele oshitoo shedu komuhongi woitoo, ndele to kufa ovakulunhu vamwe voshilongo novakulunhu vamwe vovapristeli, 2ndele inda mefilu laBen-Hinnom li li pOshivelo shoikangwa, ove u va lombwele eendjovo odo handi ke di ku lombwela. 3Ndele ove u nokutya: Pwilikineni ondjovo yOmwene, akutu nye eehamba daJuda noonakukalamo muJerusalem! Omwene womatanga ovakwaita, Kalunga kaIsrael ota ti ngaha: Tala, onhele ei ohandi i etele oshiponga, nakeshe ou te shi udu, omatwi aye otaa duma, 4osheshi vo ova efa nge nova lundulula onhele ei nova xwikila omayambo oikalunga, inai shiivika kuvo, voovene nooxekulu neehamba daJuda, ndele va yadifa onhele ei nohonde ihe netimba, 5ndele va tungila Baal oikulundu yomayambelo ndele va xwikila Baal ovana vavo omaxwikiloyambo, osho Ame inandi shi va lombwela noinandi va tongela nongaashi inashi uya mo momutima wange. 6Onghee hano, tala, omafiku otae uya, Omwene osho ta ti, onhele tuu ei itai ifanwa vali Tofet naBen-Hinnom, ndelenee: Edipaelofilu. 7Ndele omhangela yaJuda noyaJerusalem ohandi i ningi yongaho monhele ei, ndele handi ke va dipaifa eongamukonda omoipafi yovatondadi vavo, ndele handi ke va yandja momake aava hava nangele omwenyo wavo, noimhu yavo ohandi ke i yandja eendja keedila dokeulu nokoifitukuti, 8noshilando tuu eshi ohandi ke shi ninga ehalufo longaho noshiyolifa. Keshe ou ta ende po ote shi halukile note ke shi shikila omwilwa omolwoiponga yasho aishe. 9Ndele Ame ohandi ke va fininika va lye ombelela yovana vavo ovamati noukadona, notava ka lya ombelela yamukwao nomukwao mefininiko nomoudjuu tava fininikwa kovatondadi vavo, ovo tava kongo eemwenyo davo. 10Ove ou nokutatula oshitoo osho moipafi yovalumenhu ava we uya navo, 11ndele u va lombwele u tye: Osho ngaha ohandi ka tatula ovanhu ava noshilando eshi, ngaashi oshitoo tashi tatulwa, sho shihe fi vali okuhondjwa. Ndele muTofet omo tamu ka pakwa, osheshi pamwe pe lili kape na vali onhele apa tamu pakwa. 12Hano osho ngaha handi ka ningila onhele ei, Omwene ta ti, noonakukalamo muyo noshilando eshi ohandi shi ningi ngaashi Tofet. 13Neengulu domuJerusalem neengulu deehamba daJuda otadi ningi ngaashi onhele yaTofet, nokutya keenduda deengulu odo adishe ova yambela ongudu yeulu nova tilila oikalunga oikunwayambo.
14Opo nee Jeremia a aluka kuTofet, oko Omwene e mu tuma a ka xunganeke, ndele ye e uya moluumbo longulu yaKalunga, ndele ta lombwele ovanhu aveshe ta ti: 15Omwene womatanga ovakwaita, Kalunga kaIsrael ota ti ngaha: Tala, Ame ohandi etele kombada yoshilando eshi nokombada yoilando ikwao aishe ei i li mepangelo lasho oshiponga, nde shi shi xunganekela, osheshi ova kukutika eefingo davo, ndele inava pwilikina eendjovo dange.
Currently Selected:
JEREMIA 19: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
