JESAJA 64
64
Ekemo laIsrael
1Akutu, ngeno u pombaule eulu ndele to kulukile poshi neemhunda ngeno di tengauke koshipala shoye, 2nongaashi oukuni tava xwama komundilo nongaashi omeva taa fulukifwa komundilo, opo u hololele ovatondadi voye edina loye noiwana i kakame koshipala shoye, 3eshi ove to longo oitilifalonga ei inatu i teelela! Akutu ngeno u kulukile poshi opo eemhunda di tengauke koshipala shoye! 4Okoshito nale inapa udika ile inapa shiivika, ile eisho ngeno la tala Kalunga umwe ehe fi Ove auke, ou ha longo ya tya ngaha kwaava have mu teelele. 5Ove to mu shakeneke ou ha wanifa nehafo ouyuki ndele ta kala te ku dimbulukwa meendjila doye. Tala, Ove we tu handukila, nafye otwa nyona, osho otwa kala efimbo lile; ohatu ka xupifwa tuu? 6Ndelenee fye atushe otwa li ngaashi ovanyatekwa, nouyuki wetu aushe owa kala ngaashi oshikutu sha kaka. Otwa kukuta ngaashi omafo, nomanyonauno etu okwe tu twala ngaashi omhepo. 7Ndele inapa kala nande umwe ou a ifana edina loye, ou a penduka okukanyatela kwoove, osheshi owe tu holeka oshipala shoye, ndele we tu efela tu notelwe koulunde wetu. 8Ndelenee Omwene, Oove Tate, fye elova, naave Omumi wetu, fye atushe oshilonga sheke loye. 9Omwene, ino tu handukila unene Ove ino dimbulukwa alushelushe oulunde wetu. Tala, heeno, tala, fye atushe ngaashi tu li ofye ovanhu voye. 10Oilando yoye iyapuki oya ninga omaputu, Sion osha ninga eputu, Jerusalem osha ninga omuulu. 11Otembeli yetu iyapuki noya fimana, omo ootate ve ku hambelelela mo, oya lungwina komundilo, noinima yetu aishe ya fimana oya ninga onduba yomakuma. 12Nande ongaha Omwene, oto dulu tuu okulididimika, oto dulu tuu okumwena noku tu findila poshi fiyo alushe?
Currently Selected:
JESAJA 64: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
