JESAJA 63
63
Oiwana tai ka handukilwa
1Olyelye ou ta di muEdom nomuBosra, a djala oikutu itilyana? Oye tuu ou a wapalelela, a djala oshikutu shoulenga ndele ta ende neshushu meenghono daye dihapu.
Aame ou, handi popi ouyuki nondi na eenghono okuxupifa.
2Omolwashike oshikutu shoye oshitilyana? Noikutu yoye otai kala ngahelipi ngaashi yomukoli womaviinyu?
3Oshikolelo nde shi kolela Ame andike, kapa li pe na nande umwe womoiwana a kwafa nge. Ndele Ame onde va lyataula mehandu lange, onde va nyanyaula noupyuhandu wange, ndele ohonde yavo ya twiyaukila koshikutu shange, nonda nyikifa oikutu yange aishe ohonde. 4Osheshi efiku longhone ola kala momutima wange, nomudo wovakulilwa vange owa fika. 5Ndele ame onda li kutalatala, ndelenee kapa li omukwafi, nosha kumwifa nge, ndelenee inapa monika ou a yambidida nge. Opo okwooko kwange okwa kwafa nge, noupyuhandu wange wa yambidida nge. 6Ndele Ame nda lyataula oiwana mehandu lange nonde va kolwifa moupyuhandu wange; nohonde yavo onde i tilashi medu.
Omafiku onale taa dimbulukiwa
7Ame nda hala okuudifa omauwanghenda Omwene, oilongatumbalo yOmwene, aishe ei Omwene e tu ningila, nouwa waye muhapu keumbo laIsrael, ouwa ou e tu hololela pafilonghenda laye, nopaunene womauwanghenda aye. 8Osheshi okwa tya: Ovo ovanhu vange, vo ovana ava ihava fufya. Osho Ye a ninga Omukulili wavo. 9Momaluhepo avo aeshe okwe va nyikila oluhodi nomweengeli wokoshipala shaye okwe va xupifa. Okwe va kulila molwohole yaye nomolwolukeno laye. Ndele okwe va toola nokwe va humbata momafiku enya aeshe onale. 10Ndelenee vo ove mu twila ondubo ndele va nyikifa Omhepo yaye Iyapuki oufiye, onghee Ye okwe lishitula omunaita navo, ndele Ye mwene okwe va lwifa. 11Opo ovanhu vaye ova dimbulukwa omafiku avo onale aMoses, ou e va endifa mefuta. Oku li peni pamwe novafita woshuunda shaye? Ou a tula muye Omhepo yaye Iyapuki, oku li peni? 12Ou e va endifa keke laMoses lokolulyo nokwooko kwaye koshinge nokwa kandula omeva komesho yavo, opo e liningile edina laalushe; 13Oye ou e va endifa momeva madjuu, va enda ngaashi onghambe tai ende mombuwa, ndele vo inava punduka? 14Ngaashi oimuna tai filukile mefilu, osho yo Omhepo yOmwene Ye va twala ketulumuko lavo. Nosho yo wa findikila ovanhu voye u lidikile edina la fimana.
Elidilululo nealuko laIsrael
15Omukali meulu, tala poshi u tale onhele yoye iyapuki noi noshinge! Ouladi woye noilonga yeenghono doye oi li peni? Okuhala kwoye komonhulo yoye nokufilwaonghenda kwoye we ku kelela nge. 16Osheshi Oove Tate, osheshi Abraham ke tu shii, naIsrael ine tu shiiva. Akutu Omwene, Oove Tate yetu, Omukulili wetu, olo edina loye konale. 17Omwene, oshike we tu efela tu puke neendjila detu? Omitima detu owe di efela shike, di likukutike, fye tuhe ku tile? Aluka ko, Ove u alukile kovapiya voye nokomapata efyuululo loye! 18Okafimbo okaxupi kongaho oshiwana shoye sha hoololwa sha nangala edu lasho, novatondadi vetu ova lyataula ouyapuki woye. 19Fye otwa fa ava Ove ino tu pangela nande nale, notwa fa ava inatu lukilwa edina loye.
Currently Selected:
JESAJA 63: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
