HESEKIEL 1
1
Emoniko lomuxunganeki pomulonga waKebar Oinamwenyo ine yomeulu
1Momudo omutimilongo nhatu mohani onhine, mefiku etitano kohani, fimbo nda li mokati kovapika pomulonga waKebar, eulu la yeuluka ndele ame nda mona omamoniko aKalunga. 2Mefiku etitano kohani, nokutya omudo omutitano woupika wohamba Jehoiakin, 3ondjovo yOmwene ye uya komupristeli Hesekiel, omona waBusi, medu lOvakaldea pomulonga waKebar. Neke lOmwene la kala kombada yaye.
4Ndele nda mona, tala, koumbangalanhu kwa dja oshikungulu, oshilemo shinene shi nomundilo tau lafaula. Noshilemo sha dingililwa kevadimo, nomokati komundilo omwa li mu na sha sha foshikushu. 5Ndele mokati kasho mwa monika omalupe oinamwenyo ine, ndele olupe layo la fa olupe lomunhu, 6ndele keshe shimwe sha li shi noipala ine nakeshe shimwe sha li shi nomavava ane. 7Nomaulu ayo a yukilila, neemhadi dayo ngaashi omakondo onhana. Ndele yo oya vadima ngaashi oshikushu tashi vema. 8Ndele koshi yomavava ayo ya li i nomake omunhu keembinga nhee. Ndelenee oipala yayo aishe ine nomavava ayo a li ngaha: 9omavava ayo a twaafana. Mokweenda kwayo inai punguluka. Keshe shimwe sha enda nokuyukilila komesho. 10Ndele oipala yayo ya li ngaashi oshipala shomunhu. Ndele yo aishe ine kolulyo ya li i noshipala shonghoshi, nokolumosho yo aishe ya li i noshipala shongobe. Nosho yo aishe ya li i noshipala shonhwa. 11Ndele omavava ayo a li a tanganana a yuka pombada. Keshe shimwe sha li shi nomavava avali a twaafana, naavali ya tuvika nayo omalutu ayo. 12Ndele keshe shimwe sha enda nokuyukilila komesho. Keshe apa omhepo ya hala i ye, oko ya ya. Mokweenda kwayo inai punguluka. 13Omalupe oinamwenyo a li ngaha: olupe layo la li ngaashi omakala a xwama omundilo, ngaashi eenyika tadi i komesho nokonima pokati koinamwenyo, nomundilo wa li u toka, nomwa dja omaluvadi. 14Ndele oinamwenyo ya vilauka kombinga nombinga nokutalwa ngaashi oluvadi.
15Ame eshi nda dakamena oinamwenyo: tala, okuulu kumwe kwetemba kwa li pedu poinamwenyo koshipala shakeshe shimwe. 16Okutalwa kwomaulu nokupangelwa kwao okwa li ngaashi okrisolit. Naaishe ine ya li ya faafana. Natango okutalwa nokupangelwa kwao kwa li ngaashi ngeno okuulu ku li meni lakukwao. 17Yo eshi ya enda, oya enda keembinga adishe nhee. Mokweenda kwayo, inai punguluka. 18Nomaulu ayo a li male nokwa tilika. Nomaulu aaishe ine a li e yadi omesho keembinga adishe. 19Ndele oinamwenyo eshi ya enda, nomaulu yo a enda nayo. Ndele oinamwenyo eshi ya yeluka pedu, nomaulu yo a yeluka. 20Keshe apa omhepo ya hala i ye, oko ya ya nokuyukilila kombinga ei omhepo ya hala. Ndele omaulu a yeluka mefimbo tuu limwe nayo, osheshi omhepo yoinamwenyo oya li momaulu. 21Oinamwenyo eshi ya enda, oo a enda yo. Naashi ya kanghama, oo a kanghama yo. Ndele yo eshi ya yeluka kedu, omaulu a yeluka yo oshita nayo, osheshi omhepo yoinamwenyo ya li momaulu.
22Ndele kombada yomitwe doinamwenyo kwa li sha sha fa evalelwa, tali vilima ngaashi okristali tai kumwifa, la yalwa kombada yomitwe dayo. 23Ndele koshi yevalelwa, omavava ayo a yukililafana. Nakeshe shimwe sha li shi nomavava avali a tuvika kombinga ei, nakeshe shimwe avali a tuvika kombinga inya omalutu ayo. 24Ndele yo eshi ya enda, ame nda uda epopolo lomavava ayo ngaashi epopolo lomeva mahapu, ngaashi engungumo lOmunaenghono adishe, epopolo ngaashi euyaano lomatanga oita. Eshi ya kala ofika, oya endjelelifa omavava ayo. 25Ndele ondaka ya dja kombada yevalelwa, oyo ya li kombada yomitwe dayo. Eshi ya kala ofika oya endjelelifa omavava ayo. 26Ndele kombinga ei yokombada yevalelwa oyo ya li kombada yomitwe dayo, pa kala sha sha fa emanya lasafir, molupe lolukalwapangelo. Nomolupe lolukalwapangelo nda mona olupe lwa fa omunhu. 27Ame onda mona sha sha fa oshikushu tashi vema sha fomundilo wa dingililwa koluvala okudja kwasho sha foshiya nokuyuka kombada. Nokudja kwasho sha foshiya nokuyuka koshi onda mona sha sha fa omundilo wa dingililwa kevadimo. 28Ngaashi outa wodula hau monika moilemo mefiku lodula, osho ngaha evadimo ola li le shi dingilila. Osho olupe levadimo lOmwene la li mokutala. Ndele ame eshi nde shi mona, onda wila po eombe ndele nda uda ondaka yaumwe ta popi.
Currently Selected:
HESEKIEL 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
