2 OMAFIMBO 7
7
Oshinge shOmwene tashi yadifa otembeli
1Ndele Salomo eshi a xulifa eilikano laye, omundilo wokeulu wa wila poshi, ndele wa lungwinifa exwikiloyambo nomatomenoyambo. Noshinge shOmwene osha yada otembeli; 2novapristeli va nyengwa okuya mo mongulu yOmwene, osheshi oshinge shOmwene sha yada ongulu yOmwene. 3Novana aveshe vaIsrael eshi va mona nhumbi omundilo noshinge shOmwene sha wila motembeli vo ova twa eengolo ve linyongamena oipala yavo poshi molupale lomamanya, ndele va ilikana nokupandula Omwene. Shaashi Ye omuwa nouwanghenda waye tau kalelele fiyo alushe.
4Nohamba Salomo novanhu aveshe va yamba omayambo kOmwene. 5Oya yamba omayambo eengobe omayovi omilongo mbali naavali needi omayovi efele nomilongo mbali. Nohamba novanhu aveshe va yapula ongulu yaKalunga 6fimbo ovapristeli va kala ofika meenhele davo nOvalevi yo noishikomwa yOmwene oyo ya ningwa kohamba David okuhambelela Omwene nomaimbilohambelelo aDavid nokutya ouwanghenda waye tau kalelele fiyo alushe. Ovapristeli va kala ofika ve va taalela ndele va shika omanghuma oshikushu, nOvaisraeli aveshe va kala ofika.
7Ndele Salomo okwa yapula endiki olo la li komesho yotembeli yOmwene. Noko a yambela omaxwikiloyambo, nomakaadi omahanganifoyambo, shaashi oaltari yoshikushu kaya li ya wana okutulwa omaxwikiloyambo aeshe aa. 8Osho ngaha hano Salomo okwa dana oshivilo mefimbo tuu linya, omafiku aheyali, nOvaisraeli aveshe pamwe naye, oshiongalele shinene, okudja komhito yokuya kuHamat fiyo okokamulonga kaEgipiti. 9Ndele mefiku etihetatu vo va dana oshivilo, osheshi eyapulo loaltari ve li dana omafiku aheyali noshivilo omafiku aheyali. 10Ndele mefiku etimilongo mbali netitatu mohani onhiheyali okwa lekela ovanhu va ye komatwali avo. Va hafa nokushambukwa komwenyo omolwoinima iwa Omwene a ningila David naSalomo noshiwana shaye Israel.
Omwene te lihololele vali Salomo
11Ndele Salomo eshi a xulifa ongulu yOmwene nongulu yohamba, naaishe Salomo e i diladila momutima waye oku i longa mongulu yOmwene nomongulu yaye, e i wanifa nawa, 12Omwene okwe lihololela Salomo oufiku ndele ta ti kuye: “Ame nda uda eindilo loye, nonhele ei Ame nde i hoolola i ninge ongulu yokuyambela mo. 13Ame ngeenge handi idile eulu, odula itai loko, ile Ame ngeenge handi lombwele oshipaxu shi lye po oshilongo ile ngeenge handi tumu oudu u nolutapo movanhu vange, 14ndele ovanhu vange, ava va lukilwa edina lange, otave lininipike ndele tava indile ndele tava kongo oshipala shange ndele tave lialuluka keendjila davo dii, Ame ohandi ka uda meulu nokudima po omatimba avo nokuvelula oshilongo shavo. 15Paife omesho ange taa ka pashukila onhele ei nomatwi ange taa pwilikine eilikano lomonhele ei. 16Osho ngaha ongulu ei nde i hoolola noku i yapula, edina lange opo li kale mo fiyo alushe, nomesho ange nomutima wange tau ka kala mo alushe. 17Ndele ove ngeenge ho ende koshipala shange ngaashi xo David a enda, ndele to ningi aishe oyo nde ku lombwela ndele to diinine eenghedimhango dange nomalombwelo ange, 18opo nee Ame ohandi ka pameka olukalwapangelo loye, ngaashi nda udanekela xo David, eshi nda tile: ‘Ove ito ka pumbwa nande omulumenhu ou ta pangele Ovaisraeli.’ 19Ndelenee ngeenge tamu liteeka nge ndele itamu diinine oipango neenghedimhango odo nde i mu pa, ndele tamu fimaneke oikalunga noku i linyongamena, 20opo nee Ame ohandi ke va duda mo moshilongo shange eshi nde shi va pa, nongulu ei nde i yapulila edina lange, Ame ohandi ke i ekelashi koshipala shange, ndele handi i ningi oshitevo neimbilo lesheko mokati koiwana aishe. 21Nopongulu tuu ei ya li ya tumbala, keshe umwe ta ende po, ota ka tumhauka omaxwilili ndele ta pula: ‘Omolwashike Omwene a ningila oshilongo eshi nongulu ei ngaha?’ 22Opo nee ovanhu tava ka nyamukula: ‘Omolwaashi ve liteeka Omwene, Kalunga kooxe, ou e va pitifa mo medu laEgipiti, ndele va ama koikalunga imwe noku i linyongamena, onghee hano Omwene okwe va tumina omupya ou.’ ”
Currently Selected:
2 OMAFIMBO 7: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.