2 OMAFIMBO 6
6
Eyapulo lotembeli
1Opo nee Salomo ta ti:
“Omwene okwa tile a hala okukala momulaulu,
2ndelenee ame nde ku tungila ongulu yokukala mo,
nonhele omo u kale fiyo alushe.”
3Ovaisraeli aveshe ova li ofika, nohamba ya taalela kuvo ndele tai va indilile enangeko noupuna kuKalunga. 4Ndele oya tya: “Omwene, Kalunga kaIsrael na hambelelwe, omake aye a wanifa osho a udanekela tate David eshi a tile: 5‘Okudja efiku linya Ame nda pitifa mo medu laEgipiti oshiwana shange, inandi hoolola nande oshilando shimwe medu laIsrael ndi tungilwe mo otembeli omo ndi na okufimanekelwa, ile ndi hoolole nande oumwe a wilike oshiwana shange shOvaisraeli. 6Ndelenee nda hoolola Jerusalem, edina lange li kale mo, ndele nda hoolola David, a pangele ovanhu vange Ovaisraeli.’ 7Hano tate David eshi a diladila momutima waye okutungila edina lOmwene Kalunga kaIsrael, ongulu, 8ndelenee Omwene okwa lombwela tate David: ‘Ove wa ninga nawa, eshi wa diladila momutima woye u tungile edina lange ongulu. 9Ndelenee haave to ka tunga ongulu, ndelenee omona woye, ou ta di momatundji oye, ye ota ka tungila edina lange ongulu.’ 10NOmwene okwa wanifa ondjovo yaye e i popya. Onghee hano nde uya ponhele yatate David, ndele handi kala omutumba kolukalwapangelo lOvaisraeli. Ndele nda tungila edina lOmwene, Kalunga kaIsrael ongulu, 11ndele nda tula motembeli Oshikefa Shehangano, omo mu nehangano lOmwene, e li ninga noshiwana shaIsrael.”
12Opo nee Salomo a ya ndele ta kala ofika komesho yoaltari yOmwene ta taalele oshiongalele ashishe shOvaisraeli ndele ta yelula omake aye. 13Osheshi Salomo a ninga oshipundi shoshikushu shokukala ofika nokwe shi tula pokati kolupale. Oule washo eemeta nhano, nounene washo omaludimbo atano, noule wopombada oludimbo limwe. Ndele oko a londa ta kala ofika ndele ta tu eengolo, a taalela oshiongalele ashishe shOvaisraeli nokwa yelula omake aye keulu 14ndele ta ti: “Omwene, Kalunga kaIsrael, meulu nokombada yedu alishe kaku na ou e ku fa, ou to diinine ehangano loye nouwanghenda woye kovapiya voye ovo hava ende koshipala shoye nomutima wavo aushe, 15ou wa wanifa osho we shi udanekela omupiya woye, tate David; nena ondjovo keshe oya wanifwa. 16Wanifa yo, Omwene Kalunga kaIsrael, omaudaneko makwao aa wa udanekela tate David, nokutya: ‘Itapu ka pumbulukwa ohamba moludalo loye, oyo tai pangele Ovaisraeli, ngeenge tava diinine ondjila yange nokweenda momhango yange ngaashi ove wa enda koshipala shange.’ 17Hano paife nee, Omwene Kalunga kaIsrael, ondjovo oyo we i lombwela omupiya woye tate David, nai ninge yoshili.
18“Ndelenee Kalunga, oto dulu ngaho shili okukala kedu mokati kovanhu? Eshi neulu loovene itali ku wanene okukala mo, hano oto wana ngahelipi motembeli ei nda tunga? 19Omwene Kalunga, ame omupiya woye; pwilikina eilikano lange, u pe nge osho handi ku pula. 20Omutenya noufiku omesho oye naa pashukile ongulu ei, onhele ei we i hoolola okufimanekelwa mo. Ude nge ngeenge handi taalele otembeli nokwiilikana. 21Uda hano omailikano ange nomailikano ovanhu voye ngeenge tava taalele onhele ei nokwiilikana. Heeno, meumbo loye meulu tu uda u tu dimine po.
22“Ngeenge pe na ou ta nyono kumukwao, ndele ye ta etwa poaltari yoye motembeli a yandje eano laye, nokutya ina nyona sha, 23Omwene, mu uda hano meulu, u tokole omupiya woye. Handukila ou e na okuhandukilwa, ove u mangulule ou ehe na etimba.
24“Ndele ovanhu voye Ovaisraeli, ngeenge tava tewa kovatondadi, shaashi va nyona kwoove, ndele tave lialuluka ndele tave lihepaulula melininipiko nokupula ediminepo, 25va uda hano meulu, ndele dima po okunyona kwovanhu voye Ovaisraeli ndele va alulila medu eli, ove we li va pa nooxe.
26“Eulu ngeenge to li idile, nodula itai loko, shaashi ovanhu voye va nyona kwoove, opo nee ngeenge tave lialuluka ndele tava taalele kotembeli ei, nokwiilikana melininipiko, 27va uda meulu u dime po omatimba ovapiya voye ovanhu voye Ovaisraeli, Ove u va longe eshi sha yuka, ndele Omwene, tuma odula koshilongo eshi shoye we shi pa ovanhu voye va kale mo alushelushe.
28“Ngeenge ondjala i li moshilongo, ngeenge oudu wolutapo, koshikukuta ile onhimba ile okahaudjololo ile oshipaxu, ile ngeenge ovanhu va ponokelwa kovatondadi, ile ngeenge ope na oudu ile omukifi mokati kavo, 29Ngeenge mefimbo olo pena umwe womOvaisraeli ou a fya oluhodi nota yelula omake aye kotembeli nokwiilikana, 30uda eilikano laye. Va pwilikina meumbo loye lomeulu; va dimina po, Ove auke wa shiiva omadiladilo momitima dovanhu. Ningila keshe umwe ngaashi e lilongela, 31opo ve ku tile, efimbo alishe eli tava kala medu eli we va pa nooxe.
32“Heeno, nomunailongo yo, ke fi womoshiwana shoye shOvaisraeli, ta di moshilongo shokokule omolwedina loye linene, omolweke loye li neenghono, omolwokwooko kwoye kwa yeluka, ye ngeenge te uya ndele ta ilikana nokutaalela ongulu ei, 33mu uda hano meulu, monhele yokukala kwoye, u ninge ashishe osho omunailongo te shi ku indile, opo oiwana aishe younyuni i shiive edina loye noku ku tila ngaashi oshiwana shoye shOvaisraeli, ndele va shiive nokutya, ongulu ei ame nde i tunga ya tambulwa medina loye.
34“Ovanhu voye ngeenge to va tumu moita okulwifa ovatondadi vavo, ndele tave ku indile keshe opo ve li, va taalela koshilando eshi wa hoolola, nokotembeli ei nde ku tungila, 35pwilikina omailikano avo. Va uda meulu nou va pe efindano.
36“Vo eshi tava nyono kwoove, osheshi kape nomunhu ou ita nyono, ndele to va handukile ndele to va yandje kovatondadi vavo nde tave va twala eenghwate koshilongo nande oshokokule, 37pwilikina omaindilo ovanhu voye. Moshilongo shoukwatwa, ngeenge tave lialuluka, ndele tave ku indile nokuhepaulula tava ti: ‘Fye twa nyona, fye twa ninga osho inashi yuka, ndele twa li tuhe na Kalunga,’ 38ndele ngeenge tava aluka kwoove nomutima aushe nomwenyo aushe moshilongo shoukwatwa wavo, ndele vo otava ilikana nokutaalela koshilongo osho we shi pa ooxe nokoshilando osho we shi hoolola nokotembeli ei nde ku tungila, 39uda hano meulu, monhele yokukala kwoye, eindilo lavo nomailikano avo, ndele va pa ounongo ndele dimina po ovanhu voye osho ve shi nyona kwoove. 40Kalunga kange, omesho oye naa pashukile eilikano lomonhele ei nomatwi oye naa pwilikine eilikano lomonhele ei. 41Ndele paife: Omwene Kalunga, fikama u uye monhele yoye yetulumuko, Ove noshikefa sheenghono doye! Ovapristeli voye, Omwene Kalunga, nava kale va djalekwa exupifo, novayuki voye nava hafele ouwa woye. 42Omwene Kalunga, ino ekelashi omuvaekwa woye! Dimbulukwa omaudaneko onghenda we a pa omupiya woye David.”
Currently Selected:
2 OMAFIMBO 6: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.