San Marcos 4
4
Chenu uni Jesuse ejempluꞌ tucu bene enu nzetuꞌ nii
(Mt. 13:1-9; Lc. 8:4-8)
1Stucu bese uquixie Jesuse seteꞌnu bee bene ruꞌu inzatuꞌ Galilea. Lunú uyetesaꞌ huaxi bee bene lunu, enzeꞌe uyuꞌunu liñi tucu barco nú nzu lu inzatuꞌ zeꞌe, nu chu uzucunu liñii, diqui nú nucuaꞌa ye bee bene ruꞌu inzatuꞌ zeꞌe. 2Che uzeteꞌnu huaxi bee ejemplu lubee bene zeꞌe. Chenu uzeteꞌnu bee bene uninu lubeei:
3―Uquieꞌe diacahua ninguieꞌ. Tucu bichia uchiuꞌu tucu niyu nzetuꞌ nii lu yuꞌlla. 4Chenu rduꞌ niyu quieꞌ nii uzanaꞌ lleꞌna ebichi lu inziu nu chu ulaca bee iñi udacue. 5Lleꞌna ebichi uzanaꞌ leta quiee, elu leca huaxi yuu. Enzeꞌe yexetsia uliñi ebichi quieꞌ xne leca huaxi yuu zeꞌe. 6Pero chenu unga nelee uriꞌi beꞌ bichia nú unguꞌlune. Lunú la aca aquié nzene lue enzeꞌe ubichii. 7Lleꞌna ebichi uzanaꞌ leta aca eche, chenu uruꞌcu aca eche. Nézela aca eche cuaꞌ nú aruꞌcue enzeꞌe né ayue. 8Pero ebichi nú uzanaꞌ lu yuu nzeꞌca, uruꞌcu nzeꞌcae nu chiquiꞌ ñia unguyuꞌe. Texcuaꞌa bee ebichi cuaꞌ unguyuꞌ ala llichiꞌi ebichi nu texcuaꞌe unguyuꞌ sesenta ebichi nu texcuaꞌe unguyuꞌ tucu ayuꞌu ebichi.
9Leꞌca uni Jesuse lubee bene zeꞌe:
―Tatse bene enu niarquiꞌ nú yeneꞌ nú rnia quieꞌe diaca nzeꞌe che.
Udixiuleꞌe Jesuse xinu uninu bee ejemplu
(Mt. 13:10-17; Lc. 8:9-10)
10Chequie chenu uyaꞌnasca lleꞌna bee bene cuna Jesuse cuna chiꞌchiucu bee beneꞌnu, unidichiaꞌ beei lunu:
―Xa rni bee ejemplu nú uninu.
11Che ucuaquinu nu uninu lubeei:
―Liꞌihua uliquiꞌ Diose nú riꞌihua beyaꞌ xa neca nu rnibiyaꞌnu lunú lascaꞌ riꞌihua beyaꞌ. Pero bee bene enu la chili arquiꞌ Diose, setea liꞌibeei puro tsia ejemplu. 12Xne mase riꞌya beei, nu mase rieneꞌ beei. Pero leca xunga riꞌi beei beyaꞌ. Scua la benchilaꞌ arquiꞌbeei lu Diose, nu la riꞌinu perdona stula beei che.
Udixiuleꞌe Jesuse nú xneca neca ejemplu nú uninu
(Mt. 13:18-23; Lc. 8:11-15)
13Leꞌca uni Jesuse lubeei:
―¿Xieꞌ la riꞌihua beyaꞌ xa neca lunú rnia scua la? ¿Xa riꞌihua beyaꞌ beela bedichiaꞌ nú niilá luhua che? 14Bene enu uduꞌu nii neca xi neca tucu bene enu rixiuleꞌe Stichiaꞌ Diose lubee bene, 15nu nuꞌ bee bene enu rieneꞌ Stichiaꞌ Diose, pero la zela bezeꞌlu nú chenala beei Stichiaꞌ Diose. Neca bee bene quieꞌ xi neca ebichi nú uzanaꞌ ruꞌu inziu. 16Texcuaꞌa bee bene neca xi neca ebichi nú uzanaꞌ leta quiee. Rieneꞌ beei Stichiaꞌ Diose nu ñia uyucu arquiꞌbeei. 17Pero liꞌibeei neca beei xi neca ebichi nú leca huaxi luu. Chequie chenu siꞌi beei lunú seca beei, urre chenu seꞌta bee bene liꞌibeei sanaꞌ arquiꞌbeei Stichiaꞌ Diose. 18Texcuaꞌa bee bene neca xi neca ebichi nú uzanaꞌ leta aca eche, rieneꞌ beei Stichiaꞌ Diose. 19Pero máse nzenu arquiꞌbeei lunú nuꞌ lu iliulabe. Sequienu beei leꞌcatsia liꞌibeei, xne niarquiꞌ beei nú luꞌcu beei yeene. Chequie chenu nchiñi ye bee nucuaꞌ elliebacuꞌ beei, sanaꞌ arquiꞌ beei nú rieneꞌ beei Stichiaꞌ Diose. Lecaxi zibiꞌ nú ubeneꞌ beei Stichiaꞌ Diose che. 20Pero nuꞌ bee bene enu rieneꞌ Stichiaꞌ Diose, cuna nú sucuꞌ beei nú rnii, liꞌibeei neca beei xi neca ebichi nú uzanaꞌ lu yuu nzeꞌca. Texcuaꞌa beei chenu rixiuleꞌe beei Stichiaꞌ Diose lubee bene rriꞌi beei ana huaxi bee bene. Neca beei xi neca ebichi nú unguyuꞌ ala llichiꞌi ebichi urre xi neca ebichi nú unguyuꞌ sesenta ebichi urre xi neca ebichi nú unguyuꞌ tucu ayuꞌu ebichi.
Chenu udixiuleꞌe Jesuse ejempluꞌ quinqué
(Lc. 8:16-18)
21Leꞌca uni Jesuse lubeei:
―¿Leca modo nú duꞌ llieꞌe tucu quinqué, tunu tsacuꞌ bene tucu caja equiee, urre tsu benene liñi luna? Rquiꞌña, nú zucu quinqué cuaꞌ elu ayaa, para nú duꞌ llieꞌe diqui luhuare. 22Leꞌca scua, niꞌ tucu beenú aꞌchi neca la yaꞌna nucuaꞌ scuatsia riña nú aca che ye bee nucuaꞌ, nu niꞌ tucu beenú aꞌchiꞌ neca la yaꞌna nucuaꞌ scuatsia riña nú acabiyaꞌ ye bee nucuaꞌ. 23Tatse bee bene enu niarquiꞌ nú yeneꞌ nú rnia quieꞌe diaca nzeꞌe che.
24Leꞌca uni Jesuse lubeei:
―Uriꞌihua elliebacuꞌ equie bee bedichiaꞌ nú rieneꞌhua. Xne tunu rriꞌihua caso Stichiaꞌ Diose. Leꞌca liquiꞌnu nú maselá riꞌihua beyaꞌ stichiaꞌnu. 25Xne bee bene enu rriꞌi beyaꞌ Stichiaꞌ Diose riña nú maselá riꞌi nzeꞌe beyaꞌ stichiaꞌnu pero bee bene enu lleꞌnatsia rriꞌi beyaꞌ Stichiaꞌ Diose, cuna nu la riꞌi caso beei stichiaꞌnu. Hasta lunú uriꞌi beei beyaꞌ lleꞌna niti nucuaꞌ arquiꞌbeei.
Uni Jesuse tucu ejemplu nú xa enta ruꞌcu tucu ebichi
26Leꞌca uni Jesuse lubeei:
―Elurnibiyaꞌ Diose, neca xi neca nú secaa tucu bene chenu nze tuꞌlla nii lu yuꞌulla. 27Xne mase raꞌtse bene quieꞌ rulaꞌ nu bichia rriꞌilla riñaꞌ. Bichia si rulaꞌ rliñi ebichi cuna nú enta ruꞌcue, pero la riꞌilla beyaꞌ xa enta ruꞌcue. 28Xne liꞌi yuu zeꞌe rriꞌi nu enta ruꞌcu ebichi, rluti rliñii nu recae huañi, cheelá enta tuu lue nu cheelá rayue. 29Nu chenu necane ulaꞌcu, che xiecuꞌ bee benene xne necala tiembu nú yeteꞌ saꞌe.
Uni Jesuse tucu ejempluꞌ ebichiꞌ mestaza
(Mt. 13:31-32; Lc. 13:18-19)
30Leꞌca uni Jesuse lubeei:
―¿Xa nia luhua para nú riꞌihua beyaꞌ xa neca lunú rnibiyaꞌ Diose? ¿Nu xi lubea luhua para nú riꞌi nzeꞌcahua beyaꞌ xa necane? 31Ixiuleꞌa luhua xa neca nú rnibiyaꞌ Diose. Necane xi neca ebichiꞌ mestaza. Ebichi quieꞌ chenu riuꞌe lu yuu, meꞌelae lu ye bee ebichi nú nuꞌ lu iliulabe. 32Pero chenu uyuꞌu niila ebichi cuaꞌ, chequie enta ruꞌcue nu máse rruꞌcue lu ye bee huañi hasta bee iñi nuꞌ modo nú rrecheꞌe beeí exliaꞌtseꞌ beeí lu ellutsa lue cuna nú sulachi beeí lu xcaꞌlaꞌe.
Xinu uzeteꞌ Jesuse puro bee ejemplu
(Mt. 13:34-35)
33Scua uzeteꞌ Jesuse Stichiaꞌ Diose lubee bene. Uninu huaxi bee ejemplu, hasta lunú uriꞌitsia beei beyaꞌ. 34Siempre uninu bee ejemplu chenu uzeteꞌnu bee bene. Pero chenu nzu liꞌitsianu cuna bee beneꞌnu udixiuleꞌenu lubeella xa neca lunú uninu lubee bene scua.
Uzucuꞌ bii cuna inzatuꞌ nú uni Jesuse
(Mt. 8:23-27; Lc. 8:22-25)
35Leꞌca bichia zeꞌe chenu uyuꞌu rulaꞌ uni Jesuse lubee beneꞌnu nu uninu:
―Chaꞌahua stucu chu inzatuꞌquieꞌ.
36Che utsaꞌna bee beneꞌnu bee bene zeꞌe nu uyuꞌu beella liñi barco cuna Jesuse. Leꞌca nza texcuaꞌa bee barco cuna liꞌibeella. 37Chequie unga tucu bii juerte lu inzatuꞌ nu utsuli lu inza zeꞌe nu uquixie uyuꞌe hasta liñi barcoꞌ beella. 38Pero raꞌtse Jesuse nuxunu enza rquiꞌ barco zeꞌe nu necuꞌcunu tucu almohada. Che ucuaꞌñi beella liꞌinu nu uni beella lunu:
―¡Maestro! ¿Xinu la riꞌi casolo lunú seꞌcaꞌahua nzee chatseꞌahua lu inza?
39Chequie uzetee Jesuse nu utsuxenu bii, nu uninu lu inzatuꞌ zeꞌe:
―¡Aca xee!
Nu chu unga xee bii cuna inzatuꞌ zeꞌe. 40Cheelá uninu lubee beneꞌnu:
―¿Xinu chiquiꞌ xiquihua? ¿Xieꞌlascaꞌ chili arquiꞌhua liꞌá la?
41Pero chiquiꞌ ulliqui beella nu unidichiaꞌ beella lusaꞌ beella:
―¿Ti neca niyu quieꞌ nú hasta bii cuna inzatuꞌ sucuꞌ nú rni nucuaꞌ?
Currently Selected:
San Marcos 4: zpl
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
