San Marcos 3

Uriꞌiyeca Jesuse tucu bene enu ubichicuꞌ ya

(Mt. 12:9-14; Lc. 6:6-11)

1Stucu bese chenu uyuꞌu Jesuse liñi tucu induꞌ bee bene Israel. Zeꞌe nzucu tucu niyu enu ubichicuꞌ tucu chú ya. 2Chequie bee bene enu nucuaꞌa zeꞌe. Nucuaꞌa tsiꞌña beei tunu riꞌiyeca Jesuse niyu zeꞌe bichia nú sulachi beei, para nú scua xana bitsi beei lu cuendaꞌnu. 3Che uni Jesuse lu niyu enu ubichicuꞌ ya zeꞌe, nu uninu:

―Utsuli lubee bene cuaꞌ nee.

4Nu uninu lubee bene zeꞌe:

―¿Xi riala riꞌi bee bene bichia nú sulachi bee bene? ¿Nú neca nzeꞌca la urre nú necha neca la? ¿Tsilaꞌa bene nú la ati tucu bene la, urre tsanaꞌ arquiꞌ bene nú ati tucu bene la?

Pero lecaxi ucuaqui bee bene zeꞌe. 5Chequie ubiꞌyanu lubee bene zeꞌe nu chiquiꞌ uleenu cuna nú chiquiꞌ nehuana utsu arquiꞌnu xne la huaꞌa arquiꞌbeei bee bene, nu uninu lu niyu enu ubichicuꞌ ya zeꞌe:

―Ulí yalu nee.

Nu chu ulí niyu zeꞌe yai nu hora zeꞌe uyecaꞌ yai. 6Pero chenu uchiuꞌu bee fariseo zeꞌe, uyete saꞌ beei cuna bee beneꞌ Herodes nu uriꞌi beei elliebacuꞌ xneca riꞌi beei para nú uti beei Jesuse.

Chenu nucuaꞌa huaxi bee bene ruꞌu inzatuꞌ Galilea

7Chequie chu nza Jesuse cuna bee beneꞌnu ruꞌu inzatuꞌ Galilea, nu nzequie huaxi bee bene liꞌinu, bee bene Galilea cuna bee bene Judea, 8cuna bee bene Jerusalén, cuna bee bene Idumea, cuna bee bene enu nucuaꞌa stucu chú reꞌcu Jordán, cuna bee bene enu nucuaꞌa lu iliu Tiro, cuna bee bene enu nucuaꞌa lu iliu Sidón, uya huaxi bee benequieꞌ lunu, xne unga biyaꞌbeei nú rriꞌinu bee milagro nú chiquiꞌ neca equie. 9Enzeꞌe uninu lubee beneꞌnu, nú tsu tsiña beella tucu barco para nú chuꞌunu liñi barco zeꞌe, para nú la taꞌcu bee bene liꞌinu. 10Xne uriꞌiyecanu huaxi bee bene. Enzeꞌe ye bee bene enu riti uricuya beei lunu, para nú tiꞌ beei ya beei liꞌinu.

11Chequie bee bene enu nchiñi benechiquiꞌ arquiꞌ chenu ulañiꞌ beei Jesuse, utsulliqui beei lunu nu urixialibeei nú unibeei:

―¡Necalu Lliꞌñi Diose!

12Pero unibiyaꞌ Jesuse lubee benechiquiꞌ nú la ixiuleꞌe beei nú ti necanu lubee bene.

Chenu ucañi Jesuse chiꞌchiucu bee apóstolꞌnu

(Mt. 10:1-4; Lc. 6:12-16)

13Cheelá uquie Jesuse equie tucu dañi, nu ubixianu bee bene enu niarquiꞌnu nú cha cuna liꞌinu nu uyabica bee benequieꞌ lunu. 14Che ucañinu leta bee bene zeꞌe, chiꞌchiucu bene para nú chenu bee benequieꞌ liꞌinu, cuna nú xeꞌlanu liꞌibeella para nú chetixiuleꞌe beella Stichiaꞌ Diose lubee bene. 15Udeteꞌnu nú rnibiyaꞌnu lubeella para nú riꞌiyeca beella bee bene enu riti cuna nú lua beella benechiquiꞌ arquiꞌ bee bene. 16Bee ningiueꞌ neca chiꞌchiucu bee bene enu ucañi Jesuse tuculla lee

Simón enu leꞌca uhualenu, Pedro.

17Stuculla lee Jacobo,

nu stuculla lee Juan, neca rucu benequieꞌ llianaꞌ bene enu lee Zebedeo.

Uhualee Jesuse rucu llianaꞌ Zebedeo, Boanerges, nu rni nucuaꞌ bee lliꞌñi beziyuꞌ.

18Leꞌca ucañi Jesuse Andrés,

Felipe,

Bartolomé,

Mateo,

Tomás,

Tadeo,

Simón, enu ulletse leta tucu partido nú lee cananista,

19cuna Judas Iscariote enu udeteꞌ cuenda Jesuse.

Uni bee bene nú uluꞌcu Jesuse lunú rnibiyaꞌ bezeꞌlu

(Mt. 12:22-32; Lc. 11:14-23; 12:10)

20Chenu ulaxu nú ucañinu chiꞌchiucu bee benecuaꞌ uriñayunu liꞌibeella ruꞌu tucu niꞌi, ruꞌu niꞌi zeꞌe stucuaꞌla bese uyetesaꞌ huaxi bee bene lubeella. Hasta nú né lluꞌchaꞌnu acununu cuna bee beneꞌnu. 21Chenu ungabiyaꞌ bee saꞌa Jesuse nú reca zeꞌe. Nzetucu beella liꞌinu leta bee bene zeꞌe, xne rni bee bene nú secanu ichia loco.

22Pero bee ulaxcuela enu reca leyꞌ Moisés, nzeꞌta beei enza Jerusalén nu unibeei lusaꞌbeei:

―Benequieꞌ rlua benechiquiꞌ arquiꞌ bee bene cuna poder nú rluꞌcu bezeꞌlu enu rnibiyaꞌ lubee benechiquiꞌ.

23Che ubixia Jesuse liꞌibeei nu uninu lubeei:

―¿Xa modo nú hua bezeꞌlu leꞌca saꞌ bee bezeꞌlu? 24Tucu ubiernu enu rleꞌe saꞌa siempre rliunu saꞌa beei nu tunu rliunu saꞌbeei, laxu nú rnibiyaꞌ ubiernu quieꞌ che. 25Leꞌca esquie bee bene tucu niꞌi tunu liunu saꞌa beella laxu bee bene quieꞌ che. 26Leꞌca esquie tunu tiliacaꞌ bezeꞌlu leꞌca saꞌ bezeꞌlu ulaxu nú rnibiyaꞌ bezeꞌlu che.

27’Nu lecati aca chuꞌu niꞌ tucu bene enu naaqui para nú cachiꞌ beei steneꞌlla, tunu la llicaꞌcuxu beei liꞌilla. Scua si riꞌi beei ana nú cachiꞌ beei steneꞌlla che.

28’Ixiuleꞌa luhua nú ye bee dula nú rriꞌi bee bene, nuꞌ perdonaꞌ bee dula cuaꞌ. Leꞌca nuꞌ perdonaꞌ ye bee bedichiaꞌ chiꞌquiꞌ nú rni bee bene. 29Pero tatse bee bene enu nichiꞌquiꞌ lu Espíritu Santo, lecaꞌ perdona para bee benecuaꞌ. Nzuquietsia beei castiyaꞌ beei nú leca xunga laxu.

30Uni Jesuse scua xne unibeei nú nchiñi benechiquiꞌ arquiꞌnu.

Chenu uni Jesuse nú ti neca naꞌnu cuna bichinu cuna zananu

(Mt. 12:46-50; Lc. 8:19-21)

31Hora zeꞌe uriña naꞌ Jesuse, cuna bee bichinu elu nzunu. Pero uyaꞌnatsia beella eliꞌyaꞌ nu uni beella lubee bene enu nucuaꞌa zeꞌe nú nibeei lu Jesuse para nú yeꞌtanu rixia beella. 32Nu unibee bene enu nucuaꞌa abenchilaꞌ lunu:

―Nzu naꞌlu cuna bee bichilu eliꞌyaꞌ rlaꞌna beella liꞌilu.

33Pero uninu lubeei:

―¿Ti neca naa nu ti neca bee bichia?

34Chequie ubiꞌyanu lubee bene enu nucuaꞌa diqui abenchilaꞌnu nu uninu:

―Caꞌa nucuaꞌa bee bichia cuna naa. 35Puese tatse bene enu sucuꞌ lunú riuꞌ arquiꞌ Diose, neca bene zeꞌe bichia cuna zanaa cuna naa.

Currently Selected:

San Marcos 3: zpl

Highlight

Copy