San Marcos 2

Chenu uriꞌiyeca Jesuse tucu bene enu neati cuerpoꞌ

(Mt. 9:1-8; Lc. 5:17-26)

1Xiucu xuna bichia lu zeꞌe, uyuꞌu zeca Jesuse eyeche Capernaum nu ungabiyaꞌ bee bene zeꞌe nú nzucunu tucu niꞌi. 2Che yexetsia uyetesaꞌ huaxi bee bene ruꞌu niꞌi elu nzucunu zeꞌe, nu uchee liñi niꞌi zeꞌe, niꞌ ruꞌu puerta la acaꞌ riña beelá bee bene, nu udixiuleꞌenu Stichiaꞌ Diose lubee bene zeꞌe. 3Zeꞌe uriñayuu tacu bene enu nuyaꞌ tucu niyu enu neati cuerpoꞌ. 4Pero né riꞌi beei ana nú a riña beei hasta lu Jesuse, xne nucuaꞌa huaxi bee bene liñi niꞌi zeꞌe. Enzeꞌe uxaꞌla beei equie niꞌi zeꞌe, nu cuna camilla ulaca beei niyu enu riti zeꞌe hasta elu nzu Jesuse. 5Chenu ulañiꞌ Jesuse nú nzeli arquiꞌbeei liꞌinu, che uninu lu niyu enu riti zeꞌe nu uninu:

―Niyu uriꞌá perdona stulalu nee.

6Pero zeꞌe nucuaꞌa bee ulaxcuela enu reca leyꞌ Moisés nu uriꞌi beei elliebacuꞌ nú unibeei: 7“¿Ti neca nucuaꞌ? Nú rni nucuaꞌ tucu nú neca nucuaꞌ Diose. Xne tucutsia Diose rriꞌi perdona xtula bee bene.” 8Pero hora zeꞌe uriꞌi Jesuse beyaꞌ lunú rriꞌi beei elliebacuꞌ. Enzeꞌe uninu lubeei:

―¿Xinu uriꞌihua ellibacuꞌ scua? 9¿Ta nú mase neriñaꞌ nú aca nú nia lulla: “Uriꞌá perdona xtulalu”, urre nia lulla: “Uzetee, nu unaꞌtse camiyaꞌlu nu uquiaꞌa”? 10Pero nee lubea luhua nú liꞌá Bene enu uxeꞌla Diose rluꞌcua nú rnibiyaꞌa lu iliulabe, para nú riꞌá perdona stula bee bene.

Uni Jesuse lu niyu enu riti zeꞌe:

11―Nia lulu nú uzetee nu unaꞌtse camiyaꞌlu nu uquiaꞌa niꞌlu nee.

12Hora zeꞌe uyecaꞌ niyu zeꞌe nu unaꞌtsei camillaꞌi nu chu uchiuꞌi liñi niꞌi zeꞌe. Ulañiꞌ ye bee bene enu nucuaꞌa zeꞌe nucuaꞌ nu unibeei bedichiaꞌ nzeꞌca lu Diose. Nu chiquiꞌ uyanu arquiꞌ ye bee benecuaꞌ lunú ulañiꞌ beei nu unibeei.

―Lascaꞌ lañiaꞌhua niꞌ tucu bese lunú ulañiaꞌhua nee.

Ubixia Jesuse tucu bene enu lee Leví

(Mt. 9:9-13; Lc. 5:27-32)

13Cheelá nza zeca Jesuse ruꞌu inzatuꞌ Galilea. Zeꞌe uyetesaꞌ huaxi bee bene lunu nu uzeteꞌnu liꞌibeei. 14Chenu udetenu zeꞌe, ulañiꞌnu Leví necai llianaꞌ tucu bene enu lee Alfeo. Leví quieꞌ nzucui elu rriꞌi cubre equie bee impuestos lubee bene nu uninu lui:

―Ute quie liꞌá.

Nu chu utsuli Leví nu nzai cuna liꞌinu.

15Chenu nzucu Jesuse lu mexa liñi niꞌi Leví, cuna bee beneꞌnu udacununu huaxi bee bene enu rriꞌi cubre equie bee impuestos cuna bee bene enu la nehuañi tucu nú rnibiyaꞌ leyꞌ Moisés, xne nzequie huaxi bee bene cuaꞌ liꞌinu. 16Chequie nucuaꞌa chiucu chuna ulaxcuela enu reca leyꞌ Moisés cuna bee fariseo enu ulañiꞌ nú racunuu Jesuse bee benecuaꞌ. Che unibeei lubee beneꞌnu:

―¿Xinu racunuu maestroꞌhua cuna bee bene enu rriꞌi cubre equie bee impuesto? ¿Cuna bee bene enu la nehuañi tucu nú rnibiyaꞌ leyꞌ Moisés?

17Chenu ubeneꞌ Jesuse nucuaꞌ, uninu lubee bene cuaꞌ:

―Bee bene enu la aca riti, la zecalaꞌchaꞌ bee nzeꞌe tucu doctor. Pero bee bene enu riti, rquiꞌña bee nzeꞌe tucu doctor. Enzeꞌe nzela nee, para nú bixia bee bene nú cheꞌe arquiꞌbeei lu dula nú rluꞌcu beei. Lá yela lubee bene enu rriꞌi elliebacuꞌ nú la luꞌcu dula.

Udixiuleꞌe Jesuse xa neca equie cuendaꞌ chenu la acu bee bene lunú rluꞌcu beei ulaꞌna lu Diose

(Mt. 9:14-17; Lc. 5:33-39)

18Tucu bichia udeteꞌ bee beneꞌ Juan Bautista cuna bee fariseo bichia nú né acu beella equie nú rluꞌcu beella ulaꞌna lu Diose, nu uriña chiucu chuna bee bene lu Jesuse nu unibeei lunu:

―Udeteꞌ bee beneꞌ Juan cuna bee fariseo bichia nú né acu beella equie nú rluꞌcu beella ulaꞌna lu Diose. ¿Xiquie nú la riꞌi bee beneꞌlu scua?

19Chequie ucuaqui Jesuse lubee bene zeꞌe nú uninu:

―¿Xieꞌ la acu bee bene enu nezeneꞌ lu tucu tsaꞌa chenu xia tucu bene chenu nzucuscaꞌ bene enu xia zeꞌe la? Lunú nzuscaꞌ bene enu xia zeꞌe. Enzeꞌe rquiꞌña nú acu bee bene zeꞌe. 20Pero riña bichia chenu la nzuaꞌ bene enu xia cuna bee bene. Che si deteꞌ beella bichia nú la acu beella equie nú rluꞌcu beella ulaꞌna lu Diose.

21’Lecati quielaꞌ tucu laquie uxu cuna teleꞌe laquie cuqui xne chenu uxuꞌ laquie cuqui riꞌi nú tsaa laquie uxu. 22Leꞌca la chuꞌu biñu cuqui liñi iti uxu xne riꞌi biñu cuqui cuaꞌ nú tsaa iti uxu, che nitilu biñu cuaꞌa cuna iti uxu. Enzeꞌe rquiꞌña nú chuꞌu biñu cuqui liñi iti cuqui.

Unguxi bee beneꞌ Jesuse tuu lu trigo bichia nú sulachi bee bene Israel

(Mt. 12:1-8; Lc. 6:1-5)

23Tucu bichia nú sulachi bee bene, udetenu Jesuse bee beneꞌnu lu yuu elu nuꞌ trigo nu uquixie bee beneꞌnu unguxi beella tuu lu trigo. 24Chequie unibee fariseo lu Jesuse:

―Biꞌyacuru, ¿xiquie nú rriꞌi bee beneꞌlu lunú la yala riꞌi beella bichia nú sulachi bee bene?

25Pero uni Jesuse lubeei:

―¿Xieꞌ lascaꞌ ulahua elu rni nú xa uriꞌi David cuna bee bene enu nuulla tucu bese chenu uliaꞌnaꞌ beella la? 26Tiembu nú unga Abiatar uleꞌya, enu rnibiyaꞌ lubee uleꞌya uyuꞌu David liñi induꞌ Diose nu udaculla pá nú necaleꞌya lu Diose. Añinzuca nú uleꞌyatsia nuꞌ modo nú acu pá cuaꞌ. Pero udeteꞌlla pácuaꞌ udacu bee bene enu nuulla.

27’Urecheꞌ Diose bichia nú sulachi bee bene, pero lá recheꞌenu bichia cuaꞌ para nú nehuana zeca bee bene bichia cuaꞌ.

28’Liꞌá Bene enu uxeꞌla Diose leꞌca rluꞌcua nú rnibiyaꞌa lu bichia nú sulachi bee bene.

Currently Selected:

San Marcos 2: zpl

Highlight

Copy