San Marcos 5

Chenu uhua Jesuse benechiquiꞌ arquiꞌ tucu bene eyeche nú lee Gadara

(Mt. 8:28-34; Lc. 8:26-39)

1Chenu uriña beella stucu chú inzatuꞌ zeꞌe, lu yuꞌu bee bene eyeche Gadara. 2Hora nú uchiuꞌu Jesuse liñi barco zeꞌe uyachaꞌcalu tucu niyu enu nchiñi benechiquiꞌ arquiꞌ liꞌinu, uchiuꞌu niyu quieꞌ liñi pantiuñi. 3Xne siempre nehuañi niyuquieꞌ leta bee eluhuaꞌ bee bene nguti. Nu lecati riꞌi ana lui, mase nú ullicaꞌcuu bee bene liꞌi cuna cadena. 4Huaxi bese ullicaꞌcuu bee bene cadena yai cuna cuchiuꞌi, pero chu uchiecuꞌi cadena nu unga pedasue, nu lecati riꞌi ana lui. 5Bichia si rulaꞌ enzei leta bee eluhuaꞌ bee bene nguti cuna liñi dañi, rixialii nu uchiecuꞌi liꞌi cuna quiee. 6Pero chenu ulañiꞌi Jesuse, nú entanu istuscaꞌ chequie xexuꞌi nze chaꞌcalui liꞌinu, nu chu utsulliquii lunu. 7Che juerte urixialii nu uni:

―¿Xinu riuꞌulu cuna liꞌá Jesuse lliñi Diose liñibe? Ziquia lulu nú la duꞌlu nú nehuana zecaa.

8Uni niyucuaꞌ scua, xne rnila Jesuse nú rninu:

―¡Benechiquiꞌ uchiuꞌu arquiꞌ niyu cuaꞌ!

9Chequie unidichiaꞌ Jesuse lu niyu zeꞌe nú uninu:

―¿Ti leelu?

Che ucuaqui niyu zeꞌe:

―Liꞌá lea Legión xne huaxi necaru.

10Chiquiꞌ uziquiee niyu zeꞌe lu Jesuse, para nú la xeꞌlanu bee benechiquiꞌ zeꞌe enza istu luhuare zeꞌe. 11Axu dañi zeꞌe nucuaꞌa huaxi bee cuchi enu racu bee huañi. 12Chequie uziquiee bee benechiquiꞌ zeꞌe lu Jesuse nú unibeei, uzela nú chuꞌuru arquiꞌ bee cuchi cuaꞌ. 13Che uzela Jesuse nú uchiuꞌu bee benechiquiꞌ arquiꞌ niyu zeꞌe, nu uyuꞌu beei arquiꞌ bee cuchi. Neca bee cuchi quieꞌ tucu chiucu mili beeí. Nu uyecaxuꞌu beeí nu utsundiqui beeí ruꞌu qiuee laa nu uzanaꞌ beeí hasta lu inza nu chu unguti beeí lu inza zeꞌe.

14Hora zeꞌe uyecaxuꞌu bee bene enu rriucu bee cuchi zeꞌe nzetixiuleꞌe beei lubee bene eyeche zeꞌe cuna lu ye bee bene enza zeꞌe lunú unga. Che uyabiꞌya huaxi bee bene lunú unga zeꞌe. 15Chenu uriña bee bene zeꞌe elu nzu Jesuse, ulañiꞌ beei nú uyecaꞌlaꞌ niyu enu ulletse benechiquiꞌ arquiꞌ cuna nú nutulai xucui nzucui zeꞌe. Nu chiquiꞌ ulliqui bee bene zeꞌe. 16Che bee bene enu ulañiꞌ nú xa unga lu niyu enu ulletse benechiquiꞌ arquiꞌ cuna nú xa unga lubee cuchi, udixiuleꞌe beei nucuaꞌ lu beelá bee bene. 17Chequie uquixie beei nú uziquiee beei lu Jesuse para nú chiuꞌunu lu iliuꞌbeei.

18Chenu nze chuꞌu Jesuse liñi barco uyabica niyu enu ulletse benechiquiꞌ arquiꞌ lunu, nu uziquiei lunu para nú chenunu liꞌi. 19Pero né zela Jesuse nú chenunu niyu zeꞌe nu uninu lui:

―Uyaꞌa niꞌilu para nú zucunulu bee beneꞌlu, nu ixiuleꞌelu lubeei lu ye nú uriꞌi Diose cuna liꞌilu, nu cuna nú uhuaꞌa arquiꞌnu liꞌilu.

20Chequie chu nza niyu zeꞌe, nu uquixiei udixiuleꞌi lubee bene lu iliu Decápolis, lu ye nú uriꞌi Jesuse lui. Che ye bee bene zeꞌe uyanu arquiꞌ lu cuendaꞌ nucuaꞌ.

Uriꞌiyeca Jesuse tucu unaꞌa cuna enduꞌ bene enu lee Jairo

(Mt. 9:18-26; Lc. 8:40-56)

21Chenu uriña zeca Jesuse stucu chu inzatuꞌ zeꞌe liñi barco, uyetesaꞌ huaxi bee bene lunu zeꞌe. Che uyaꞌnanu ruꞌu inzatuꞌ zeꞌe. 22Chequie uriña tucu bene enu rnibiyaꞌ liñi induꞌ bee bene Israel lunu, leella Jairo. Chenu ulañiꞌlla Jesuse utsu lliquilla lunu. 23Nu chiquiꞌ uziquieella lunu nú unilla lunu:

―Mero ati endua chaa nee ricuꞌlu yalu equie endua para nú yecaꞌnchu nu la atinchu.

24Che nzenu Jesuse liꞌilla enza niꞌlla nu nzequiee huaxi bee bene liꞌinu hasta nú utaꞌcu bee bene liꞌinu zeꞌe. 25Leta bee bene zeꞌe nza tucu unaꞌa enu riti, ungala chiꞌchiucu lana nú rlaca rene liꞌinchu. 26Chiquiꞌ nehuana ulleꞌca unaꞌa quieꞌ nu uyanchu lu huaxi bee doctor, hasta nú ulaꞌxunchu ye bee steneꞌnchu ungüitinchu. Pero né aca bee doctor a riꞌiyeca liꞌinchu, aꞌla mase rriꞌi elichiaꞌnchu. 27Enzeꞌe chenu ubeneꞌ unaꞌa quieꞌ lu cuendaꞌ Jesuse, che uyabicanchu diꞌchinu leta bee bene nu utiꞌnchu yanchu tsuꞌ xucunu. 28Xne uriꞌinchu elliebacuꞌ: “Tunu tiꞌyaa tsuꞌ xucunu, scua yecaa uriꞌinchu elliebacuꞌ.” 29Hora zeꞌe utsuxee nú rlaca rene liꞌinchu nu utsiꞌnchu nú uyecaꞌlaꞌnchu. 30Che uriꞌi Jesuse beyaꞌ nú uriyecanu tucu bene cuna poderꞌnu, nu ubelletanu ubiꞌyanu lubee bene zeꞌe nu uninu:

―¿Ti utiꞌ yaa tetsuꞌ xucua?

31Nu uni bee beneꞌ Jesuse lunu:

―Nediyaꞌlu nú nucuaꞌa huaxi bee bene caꞌa rtaꞌcu liꞌilu: ¿Xinu rnidichiaꞌlu nú tii utiꞌ yaa tsuꞌ xuculu?

32Pero riꞌyascaꞌ Jesuse diqui abenchilaꞌnu para nú lañiꞌnu tii utiꞌyaa tsuꞌ xucunu. 33Chequie chiquiꞌ reca tseꞌtse unaꞌa zeꞌe nú xiquinchu xne nediyaꞌnchu lunú uriꞌinchu, nu uyabicanchu lu Jesuse, che chu utsu lliquinchu lunu, nu uninchu ye nú ulleꞌcanchu lunu. 34Che uni Jesuse lunchu:

―Endua lunú uchili arquiꞌlu liꞌá enzeꞌe uyecaꞌlu, uquiaꞌa nu la lliquilu uyecaꞌliꞌlu elichia nú ulleꞌcalu nee.

35Rniscaꞌla Jesuse lu unaꞌa zeꞌe chenu uriña bee bene enu nucuaꞌa niꞌi Jairo nu unibeei lu Jairo:

―Unguutila enduꞌlu nee. La niaꞌlu lu maestro.

36Pero chenu ubeneꞌ Jesuse lunú uni bee bene zeꞌe. Che uninu lu Jairo:

―La lliquilu uchilitsia arquiꞌ liꞌá.

37Pero né zela Jesuse a chaa bee bene zeꞌe cuna liꞌinu niꞌ Jairo. Nzenutsianu Pedro, cuna Jacobo cuna Juan bichi Jacobo. 38Chenu uriña beella niꞌi Jairo, ulañiꞌ Jesuse nú nixi bee bene nu rixiali beei cuna nú runaꞌ beei. 39Chequie uyuꞌu Jesuse liñi niꞌi Jairo nu uninu lubee bene zeꞌe:

―¿Xinu nixihua cuna nú runaꞌhua? Né ati enduꞌ quieꞌ ratse tsianchu.

40Pero ulliꞌchinuu bee bene zeꞌe liꞌinu, nu unibiyaꞌnu nú chiuꞌu ye bee bene zeꞌe eliꞌyaꞌ, nu uyuꞌu nutsianu paꞌ enduꞌ zeꞌe cuna naꞌnchu cuna bee beneꞌnu elu nchiucuꞌnchu. 41Che unaꞌtse Jesuse ya enduꞌ zeꞌe, nu uninu lunchu:

―Talita, cumi ―rni bedichiaꞌ quieꞌ: Enduꞌ, nia lulu nú, uzetee nee.

42Hora zeꞌe uzetee enduꞌ zeꞌe nu utseenchu, nza enduꞌ quieꞌ chiꞌchiucu lana, che chiquiꞌ uyanu arquiꞌ yebee bene zeꞌe nucuaꞌ. 43Pero unibiyaꞌ Jesuse nú la ixiuleꞌe beella lu niꞌ tucu bee bene nú ungae scua. Leꞌca unibiyaꞌnu nú deteꞌ beella nú acu enduꞌ cuaꞌ.

Currently Selected:

San Marcos 5: zpl

Highlight

Copy