San Mateo 22
22
Ejempluꞌ tucu eluchia
(Lc. 14:15-24)
1Chequie unilá Jesuse bee ejemplu lubeei nú uninu:
2―Elurnibiyaꞌ Diose neca xineca tucu arre enu uriꞌi tucu tsaꞌa nú uchia enduꞌlla. 3Nu uxeꞌlalla bee mosoꞌlla para nú chetucu beei bee bene enu nezeneꞌ lu tsaꞌa zeꞌe, pero lá zela bee bene zeꞌe achaa. 4Chequie uxeꞌlalla xiucu xuna bee mosoꞌlla, nu unilla lubeei: “Uniꞌhua lubee bene enu nezeneꞌ lu tsaꞌa nú necalula nú acu bee bene. Unibiyaꞌlá nú unguti bee uꞌnaꞌ enu mase neruꞌcu, cuna beelá bee nañia enu mase neruꞌcu, nu ye bee nucuaꞌ necala, uniꞌhua lubeella nú yeꞌta beella lu eluchia.” 5Pero bee bene enu nezeneꞌ lu tsaꞌa zeꞌe né riꞌi caso beei nú uni bee mosoꞌ arre zeꞌe lubeei. Tucu bene zeꞌe nza nzebiꞌya yuuꞌ, nu stucui nzequienu berexeꞌ, 6nu texcuaꞌa beei unaꞌtse bee mosoꞌ enu uxeꞌla arre zeꞌe, nu uzeteꞌcheꞌ beei bee mosoꞌ zeꞌe hasta nú unguuti beei bee nzeꞌe. 7Chequie chiquiꞌ ule arre zeꞌe, nu uxeꞌlalla bee sundadoꞌlla nú utibeei bee bene enu unguuti bee mosoꞌlla, nu tsiquiꞌ beei lachi bee bene zeꞌe. 8Che unilla lubee mosoꞌlla: “Neca listola yeene para nú aca tsaꞌa, pero bee enu uzeneꞌ nú yeꞌta lu tsaꞌa la yala nú yeꞌta beei. 9Uquiahua lubee calle nu ye bee bene enu llaꞌcahua uniꞌhua lubeella nú yeꞌta beella lu tsaꞌa.” 10Chequie nzue bee mosoꞌlla uquieteꞌsaꞌ ye bee bene enu ullaꞌca beei lubee calle, sia bee bene nzeꞌca nu sia bene enu necha rriꞌi, scua uche niꞌi arre zeꞌe elu unga tsaꞌa.
11’Nu chenu uyuꞌu arre zeꞌe liñi niꞌi para nú lañiꞌlla bee bene enu nezeneꞌ lu tsaꞌa, che ulañiꞌlla tucu bene enu la nutu laquie nú rutu bene enu nezeneꞌ lu tsaꞌa. 12Che uni arre lu bene zeꞌe: “Amigo, ¿xa uyuꞌulu caꞌa, nu la nutulu laquie nú riala utulu lu tsaꞌa?” Pero lecalí xi ucuaqui bene zeꞌe lu arre. 13Chequie uni arre lubee bene enu rricuꞌ bee elubacu lu mexa: “Ulliꞌcaꞌcuhua cuchiuꞌ benequieꞌ cuna yai, nu utsiꞌquihuai eliꞌyaꞌ elu necabe, elu unaꞌi nu aculayai.” 14Xne huaxi bee bene enu nezeneꞌ, pero lleꞌnatsia bee bene enu chuꞌu.
Equie cuendaꞌ impuesto
(Mc. 12:13-17; Lc. 20:20-26)
15Chenu ulaxu nú uni Jesuse bee ejemplu. Che uchiuꞌu bee fariseo luhuare zeꞌe nu ubedichiaꞌ beei equie cuendaꞌ nú xi nibeei lu Jesuse, para nú ninu tucu bedichiaꞌ nu xa taꞌ quiya beei liꞌinu. 16Che uxeꞌla bee fariseo cuaꞌ chiucu chuna bee beneꞌ beei lu Jesuse, cuna chiucu chuna bee beneꞌ Herodes, nú nibeei lunu:
―Maestro, nediyaꞌru nú neli beenú rnilu nu neli seteꞌlu nú xa niarquiꞌ Diose nú huañi bee bene, sin nú riꞌi casolo nú rni bee bene, xne la biꞌyalu nú xa rnaa bee bene. 17Neequie uniꞌ luru: ¿Neca nzeꞌca nú dixiuru impuesto lu arre Cesar la, o la neca nzeꞌcae la?
18Pero uriꞌi Jesuse beyaꞌ nú necha neca elliebacuꞌ beei, enzeꞌe uninu lubeei:
―Nequichiaꞌhua, ¿xinu rriꞌihua preu liꞌá scua? 19Ulubeꞌhua tucu melu nú riaxu impuesto lua.
Che chu udeteꞌ beei tucu denario yanu. 20Chenu ulañiꞌnu melu cuaꞌ, che unedichiaꞌnu lubeei:
―¿Tiluu nú nequie lu melu quieꞌ nu ti lee enu nequie lue?
21Nu ucuaqui beei nú unibeei lunu:
―Arre Cesar nucuaꞌ.
Che uni Jesuse lubeei:
―Udeꞌtehua lu arre Cesar lunú neca cuendaꞌ arre César, nu udeꞌteꞌhua lu Diose nú neca cuendaꞌ Diose.
22Chenu ubeneꞌ beei nú uni Jesuse scua, chiquiꞌ uyanu arquiꞌbeei, che utsaꞌna beei liꞌinu nu chu nzuebeei.
Equie cuendaꞌ nú huañi zeca bee bene enu unguti
(Mr. 12:18-27; Lc. 20:27-40)
23Leꞌca mismo bichia zeꞌe uya chiucu chuna bee saduceo lu Jesuse. Nu bee saduceo lachili arquiꞌ nu huañi zeca bee bene enu unguti. Enzeꞌe unedichiaꞌ beei lu Jesuse nú unibeei:
24―Maestro, Moisés uni nú tunu ati tucu niyu nu uyaꞌna unaꞌlla nu né luꞌcu beella enduꞌ, che rquiꞌña nú chia bichi tuxie zeꞌe unaꞌa zeꞌe para nú luꞌcu beei enduꞌ enu aca xi neca enduꞌ tuxie zeꞌe. 25Letaꞌahua nucuaꞌa tucu familia enu uluꞌcu achi bichi. Bichi rlu beei uyucu unaꞌa pero ungutilla. Nu né luꞌculla enduꞌ cuna unaꞌalla, chequie uyucu bichi rruculla unaꞌa zeꞌe. 26Leꞌca scua ulleꞌca bichi rrucu beella, cuna bichi rriuna beella, hasta nú unguti luzaꞌ achi bichi beella. 27Luzeꞌelá, leꞌca unguti unaꞌa zeꞌe. 28Neequie, chenu huañi zeca bee bene enu unguti, ¿ta luzaꞌ achi bee bene cuaꞌ neca niyuꞌ unaꞌa zeꞌe, xne ye beella uchia beella unaꞌa zeꞌe?
29Nu ucuaqui Jesuse lubee saduceo zeꞌe nú uninu:
―Rnihua scua xne la riꞌihua beyaꞌ Stichiaꞌ Diose nu la chuluhua xneca neca lunú rnibiyaꞌ Diose. 30Xne chenu huañizeca bee bene enu unguti, la yucuaꞌ bee bene saꞌ bee bene, nu la deteaꞌ bee bene enduꞌ bee bene chia, sino que acatsia bee bene xi neca bee ángeleꞌ Diose liñibe. 31Pero equie cuendaꞌ nú huañi zeca bee bene enu unguti, ¿xieꞌ lascaꞌ ulahua lu ichiꞌ Stichiaꞌ Diose elu rninu? 32“Liꞌá neca Diose lu Abraham, lu Isaac cuna lu Jacob.” Nu Diose la necanu Diose lubee bene enu unguti, sino que necanu Diose lubee bene enu nehuañi.
33Chenu ubeneꞌ ye bee bene zeꞌe lunú uni Jesuse, chiquiꞌ nzenu arquiꞌbeei lunú xa seteꞌnu.
Mandamiento nú máse neca equie
(Mr. 12:28-34)
34Chenu ungabiyaꞌ bee fariseo nú lecaꞌ xi allela arquiꞌ bee saduceo uni lu Jesuse, uyetesaꞌ beei. 35Nu tucu bee fariseo cuaꞌa enu neca ulaxcuela enu reca ley. Unedichiaꞌ lu Jesuse para nú deteꞌi preu liꞌinu, nu uni lunu:
36―Maestro, ¿ta mandamiento nú mase neca equie enta lu ley?
37Che uni Jesuse lui:
―“Uzeca Paꞌlu Diose diquinuꞌ arquiꞌlu, cuna diqui lunú necalu cuna diqui nuꞌ elliebacuꞌlu.” 38Ninguieꞌ neca mandamiento rluti, nú mase neca equie. 39Nu casi iguaelee cuna mandamiento rrucu nú rni: “Uzeca saꞌlu tucu nú secalu liꞌilu.” 40Enzeꞌe titse bee bene enu sucuꞌ rucu bee mandamiento quieꞌ sucuꞌla nzeꞌe ye nú rni ley, cuna ye nú uquieꞌe bee profeta.
¿Ta lubee familia nzeꞌta Cristo?
(Mr. 12:35-37; Lc. 20:41-44)
41Chenu neyeteꞌsaꞌscaꞌ bee fariseo luhuare zeꞌe, 42che unedichiaꞌ Jesuse lubeei:
―¿Xa rriꞌihua elliebacuꞌ lu cuendaꞌ Cristo? ¿Ti lu familiaꞌ nzeꞌtanu?
Che unibeei lunu:
―Lubee familiaꞌ David nzeꞌtanu.
43Chequie uni Jesuse lubeei:
―Pero, ¿xiquie nú equie cuendaꞌ Espíritu Santo uni David lunu, liꞌilu rnibiyaꞌlu lua? Xne uni David:
44Diose uni lu liꞌinu enu rnibiyaꞌ lua:
“Uzucu cueꞌtsea chube,
hasta nú riꞌá ana nibiyaꞌlu lubee bene enu rle lulu.”
45¿Enzeꞌe tunu neca Cristo enduꞌ David, xinu rni David lunu, liꞌilu rnibiyaꞌlu lua?
46Nu niꞌ tucu bee bene enu nucuaꞌa zeꞌe né cuaqui niꞌ tucu bedichiaꞌ lunu, nu desde bichia zeꞌe lecaꞌ xi unedichiaꞌ beella lunu.
Currently Selected:
San Mateo 22: zpl
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
