Efesios 5

Xa riala huañi bee beneꞌ Diose

1Scua tucu nú necalahua lliꞌñi Diose enu secanu, ulaꞌnahua nú riꞌihua tucu nú rriꞌinu. 2Huañi nzeꞌcahua, uzecahua bee saꞌhua tucu nú seca Jesucristo liaꞌahua nú udeteꞌ cuendanu liꞌinu nú ungutinu equie cuendaꞌahua, nu unganu xi neca tucu uꞌna nú ñia rlia para Diose.

3Liꞌihua enu necala bee beneꞌ Diose, la tsu neyiꞌhua nu niꞌ la yala nihua bee bedichiaꞌ nú necha see, cuna yelu beenú lecaxi zibiꞌ. 4La nihua bee bedichiaꞌ nú necha see, niꞌ bee bedichiaꞌ nú lecaxi zibiꞌ nu bee bedichiaꞌ nú la yala nihua, xne la neca nzeꞌca bee nucuaꞌ. Mejora udeꞌtehua cheꞌtsa lu Diose. 5Xne nediyaꞌlaꞌhua nú bee bene enu nehuañi lu eluhuexe, nu bee enu rriꞌi nú necha neca, nu bee enu neyiꞌ rcuaꞌa nu niarquiꞌ luꞌcu huaxi beenú luꞌcu, máse seca beei bee nucuaꞌ luquelá Diose, leca modo chuꞌu bee nzeꞌe elurnibiyaꞌ Jesucristo nu Diose. 6La zelahua nú ti zequienu liꞌihua cuna bee bedichiaꞌ nú lecaxi zibiꞌ, xne equie beenú lecaxi zibiꞌ cuaꞌ nzeꞌta castiyaꞌ Diose lubee bene enu la zucuꞌ stichiaꞌnu. 7Enzeꞌe la riꞌihua tucu nú rriꞌibeei.

8Ante uhuañihua xi neca bene enu necabe elliebacuꞌ, pero nee lunú neca tucu necatselahua cuna Jesucristo enu neca ellieꞌe luhua. Enzeꞌe uhuañihua xi nehuañi bee bene enu nzenala ellieꞌe cuaꞌ, 9xne lunú nzenala bee bene ellieꞌe cuaꞌ, che rriꞌilla nú neca nzeꞌca, tucu nú rialane nu tucu nú neli neca. 10Ucuaꞌnahua nú riꞌihua tucu nú riuꞌ arquiꞌ Diose. 11La riꞌihua beenú la zibiꞌ nú rriꞌi bee bene enu necabe nzu elliebacuꞌ, sino que uniꞌhua lubeei para nú riꞌibeei beyaꞌ lunú rriꞌibeei. 12Xne hasta rtuꞌbene ni lunú rriꞌi aꞌchiꞌbeei. 13Pero equie cuendaꞌ stichiaꞌ Jesucristo chu riꞌibeei beyaꞌ lunú rriꞌibeei. 14Xne equie cuendaꞌ stichiaꞌnu rriꞌi bee bene beyaꞌ yeene. Enzeꞌe rni lu ichiꞌ Stichiaꞌ Diose:

Udeꞌteꞌ ellieꞌe liꞌilu enu nza inziu nú necha neca,

utsanaꞌ arquiꞌ stulalu che xaꞌla Jesucristo elliebacuꞌlu.

15Enzeꞌe ubiꞌyahua xa nehuañihua, xne la neca nú lia nehuañihua sino que ubiꞌyahua xa nehuañihua. 16Diquila nú nehuañihua la zelahua nú lia xleꞌe dete bee bichiaꞌhua, uhuañihua tucu nú riala huañihua, xne tiembu quieꞌ necha nehuañi bee bene. 17Enzeꞌe la huañihua lunú necatsia elliebacuꞌhua, sino que ucuaꞌnahua nú riꞌihua beyaꞌ xa niarquiꞌ Diose nú huañihua. 18La lluchiꞌhua, xne elu xuchiꞌ cuaꞌ rnitilu bene, mejora uzelahua nú nibiyaꞌli Espíritu Santo luhua. 19Uniꞌhua lubee saꞌhua bee Salmo, cuna bee himno, cuna bee canto nú neca para Diose, nu diquinuꞌ arquiꞌhua ulaꞌhua nu uzuꞌcuꞌ ayahua Diose. 20Nu equie cuendaꞌ Jesucristo udeꞌtehua cheꞌtsa lu Paꞌahua Diose ye bichia equie ye beenú rriꞌinu luaꞌahua.

Xa riala nú huañi bee bene enu nzeli arquiꞌ Jesucristo

21Uzuꞌcuꞌhua nú rni bee saꞌhua equie nú rluꞌcuhua ulaꞌna lu Jesucristo.

22Nu liꞌihua bee unaꞌa enu nechia uzuꞌcuꞌhua nú rni bee niyuꞌhua, tucu nú sucuꞌhua nú rni Jesucristo. 23Xne niyu rnibiyaꞌ lu unaꞌi, tucu nú rnibiyaꞌ Jesucristo lubee bene enu nzeli arquiꞌ liꞌinu, liꞌinu enu utsilaꞌa liꞌibeei. 24Nu leꞌca scua tucu nú sucuꞌ bee bene enu nzeli arquiꞌ Jesucristo stichiaꞌnu, leꞌca scua bee unaꞌa enu nechia rquiꞌña nú zucuꞌhua nú rni bee niyuꞌhua tucu nú rialane.

25Leꞌca liꞌihua bee niyu enu nechia uzecahua bee unaꞌhua, tucu nú seca Jesucristo bee bene enu nzeli arquiꞌ liꞌinu, nu hasta ungutinu equie cuendaꞌbeella. 26Para nú uquieenu liꞌibeella lu cuendaꞌ stula beella. Uquieenu liꞌibeella equie cuendaꞌ stichiaꞌnu nu cuna equie cuendaꞌ elu rrinza, 27para nú ñia naa beella riña beella lunu nu lecaxi na beella, sin niꞌ tucu equiya nu niꞌ xitse stucu bee dula, sino que lecalí xi naa beella sin dula. 28Leꞌca scua bee niyu enu nechia rquiꞌña nú zeca beella unaꞌa beella, tucu nú seca beella liꞌibeella. Nu enu seca unaꞌa seca leꞌca liꞌi. 29Xne niꞌ tucu bene la chana arquiꞌ leꞌcatsia liꞌi, sino que rebaculla liꞌilla nu riꞌyalla liꞌilla, tucu nú rriꞌi Jesucristo cuna liaꞌahua enu nzeli arquiꞌ liꞌinu, 30equie nú neca tucu necatseꞌahua cuna liꞌinu. 31Enzeꞌe tucu nú rni lu ichiꞌ Stichiaꞌ Diose: “Tsaꞌna niyu paꞌlla cuna naꞌlla para nú aca tucutsialla cuna unaꞌlla, nu rucu beella aca beella xi neca tucutsia bene.” 32Chiquiꞌ neriñaꞌ nú riꞌi nzeꞌca bee bene beyaꞌ bee bedichiaꞌ quieꞌ, pero rniine xne leꞌca scua neca Jesucristo cuna bee beneꞌnu. 33Nee bee niyu uzecahua bee unaꞌhua tucu nú secahua liꞌihua, nu liꞌihua bee unaꞌa uluꞌcuhua ulaꞌna lubee niyuꞌhua.

Currently Selected:

Efesios 5: zpl

Highlight

Copy